طريقة عمل الشاور جل ( سائل الاستحمام )فى البيت

تحضير الشاورجل فى البيت بمنتهى السهولة

السلام عليكم ورحمته وبركاته 

استكمالا لسلسة بدايل المنتجات او تصنيع المنتجات والمنظفات فى البيت 

بدال مانشتريها جاهزة النهاردة هنعمل الشاورجل اوصابون الاستحمام السايل

زى ماناس كتير بتسميه 

ودا ليه مش علشان قصة التوفير بس الأهم علشان نتجنب أضرارالمواد الكيماوية اللى الشركات بتستخدمها فى تصنيع الشاور والشامبوهات وباقى المنظفات دى 

والموضوع دا فوق الحصرى على فكرة لانى بحثت مش موجود خالص فى اى مكان ع النت اوك فياريت الاقى تقديروتشجيع علشان نقدرنكمل مع بعض 

والطريقة سهلة جدا والخامات بسيطة جدا فوق ماتتخيلوا ورخيصة كمان

لمشاهدة الخامات والطريقة بالتفصيل 

الخامات 

• نص كيلو تكصابون (رغوة صابون) 6 جنيه ونص 
• ربع كيلو ملح شاور                    2جنيه ونص 
• لون                                       1 جنيه 
• ريحة                                     2 جنيه

اللى فى الصورة طبعا مش ربع كيلو لانى باجيب بزيادة واشيله عندى او باعمل شاور وصابون للايدين او برسيل جل يعنى استخداماته عندى كتير جدا 
ودا المعطر المائى متزفر باكترمن ريحة وكلهم تحفة ومركز جدا وفى منه مركز ب30جنيه وفى انواع تانى اخف ب18جنيه بس وهتلاقيه عند اى هايبر او حدبتاع منظفات 

طريقة التصنيع بالتفصيل 

الطريقة مفيش اسهل من كدا هما 3خطوات بس 

اول حاجة هندوب التكصابون فى 2لترمية وهيكون شكله كدا هو مادة سايلة تشبه الجيلى وقوامه تقيل جدا فى الشتا وهو دا اللى بيدينا الرغوة بتاعة الشاور

عندنا طريقتين علشان ندوب بيهم التكصابون دا 
يااما نخلطه بالملح وندعكه جامد فهيدوب بسرعة او 
ندوبه بالمية 
ومهم جدا بقى الطريقة اللى هتدوبيه بيها متعصريهوش بايدك هياخد وقت ويغلبك لمايدوب 

امال نعمل ايه هتفردى كف ايدك زى كدا بطريقة أفقية وتدوسى عليه لتحت بطريقة دائرية وبالراحة خالص علشان ميعملش رغوة جامدة ويضايقك 

بعدفترة هتلاقى حجمه قل وداب معظمه واتبقى جزء بسيط زى دا كدا 

خليكى وراه لحدمايدوب خالص علشان ميبقاش الشاور فيه كلاكيع

كدا بقى تمام خالص

دلوقتى بقى حطى اللون اللى يريحك انا حطيت برتقالى

تالت خطوة بقى واللى هتدى تقل للشاور 

هى اضافة ملح الشاور 

هتلاقى فى برودة اول ماتحطيها وايدك سقعت 

ممكن تقلبى بمعلقة او عصاية خشب

هتضيفى شوية شوية لحد ماتلاقى السمك بتاعه بقى تمام لاتقيل ولاخفيف 

طيب لو خفيف زودى ملح لو تقيل زودى مية لماتوصلى للسمك اللى عايزاه

اضافة الرائحة المفضلة 

اخر حاجة ضيفى الريحة اللى تحبيها اناباعمل فل اوياسمين اوخوخ او تفاح اولافندر تحفة 

اوفراولة اللى تحبيه حسب ذوقك لوفراولة هتحطى لون احمرطبعا

هو كدا تمام اوووى بقى جاهز للاستعمال عاوزة تزودى حاجة لزيادة الترطيب حطى معلقتين جلسرين مثلا بعدكدا باصبه فى اى شفشق عندى واعبى بيه الازايز 

ياخراشى على جماله دامش شاور داعصيرمانجه ههههههههه  

بس طبعالانى باعمل كتير فباحطه فى جركن زى دا
طبعا المحلات بتضيف مادة حافظة اللى هى الفورمالين احنا مش هنحتاجها لان الكمية مش كبيرة للدرجة دى 

والف مبروك عليكى الشاور

يلا بينا نحسبها بقى 12جنيه بس وعملنا كام لتر اكتر من 5 لتر 

اظن مفيش ارخص من كدا والاهم احلى واصح من كدا 

عملنا شاور رخيص وسهل وبخامات متاحة وموجودة و الاهم بالريحة اللى انتى عاوزاها وكمان هتتجنبى اضرار الكيماويات وهتستفادى من الترطيب والنعومة والتبييض كمان 

لان الجلسرين بينعم الجسم جدا

الشاورجل بكمية اكبروبدون ملح شاور

لو مش موجود عندك ملح الشاور عادى هنعمله بملح طعام 
يبقى مقاديرناهتكون 
نص كيلوتكصابون
وكيس ملح كبير
لون 
ريحة

وهندوب التكصابون بالملح وبحركات دائرية فى اتجاه واحد

وبعدها نزود مية بالتدريج ونستمربالتقليب برضه

وبعدين نحط الريحة 

وبعدها اللون المقاديردى ممكن تعملى حوالى 12لتر 
لوضفنالها التايلوز حوالى 100جرام لانه مغلظ وبيدى سمك حلو اوى 
وهتجيبى لترمية وتفتحى كيس التايلوز وتنزلى بيه واحدة واحدة وتقلبى كويس بحركة دائرية وفى اتجاه واحد علشان ميكلكعش اوعى تضيفيه مرة واحدة مش هتعرفى تحليه لو كلكع 
المهم لماتلاقى الخليط بتاعنا بقى سميك وتقل
وبعدها التكصابون على التايلوز وتقلبى لحدمايمتزجوا كويس خالص وبعدين الملح وتقلبى لمايدوب وبعدها تزودى مية بالتدريج  براحتك بقى  وبعدها اللون والريحة وخلاص بقى جاهز وزى الفل لو تحبى تزودى مصدف زى الشاور والشامبو الجاهز اوك ضيفيه فى الاخر حوالى معلقتين كفاية على شوية مية وقلبى وانزلى بيه عالشاور هيدى له لمعة حلوة

 للامانة اكيد الجاهزبيضاف له مواد اضافية صعب تلاقيها زى ال kdمعزز للرغوة ودا كيلوالتكصابون بيضاف له نص كيلو kd و المصدف دا اللى بيدى الشاو روالشامبو اللمعة المميزة بتاعته والبروندكس المادة الحافظة والبولى مسؤلة عن اللزوجة وتكثيف القوام وتماسك الشامبو والشاور وطبعا المطريات مسؤلة عن تطرية الشعر والجلد لان مكونات الشاو روالشامبو متقاربة جدا وتكاد تكون واحدة وانا مبحبش اصعبها على البنات فبنمشى حالنا بالموجود وخلاص

تطبيق بعض الاخوات فى جروبنا على الفيس

1-حبيبتى Zoma Mazona

تسلم ايديهاوعنيها عملت 

الشاور 

وصابون الايد السائل

والبرسيل جل 

ودا نص كلامها حقها نفرح بيها ونشكرها ونشجعها 

جزاك الله كل خير يا ام عمرو خالد لانك افدتينى انا وغيرى كتير 

ربنا يكرمك ويرزقك كل ما تتمنى

2-

دى ست الكل الشطورة Kõtê Tõtã Ãlzõz عملت الداونى والبرسيل جل وكمان شاور جيل الله ينورعليكى 

حبيبة قلبى ربنا يخليكى وتسلم ايديكى وعنيكى ياغالية 
ميرسى على الكلام الحلو دا منحرمش منك 
أولا أنا مش لاقيه كلام اقولو للرائعه ام عمرو خالد انا اتعلمت منك وفديني كتير جدا ومملتيش من اسالتي بجد بشكرك جدا علي طوله بالك انا نفذت وحبيت اشارك معاكم الصور

اماكن بيع الخامات 

الخامات دى متوفرة عند اى حدبيصنع منظفات وهتلاقيهابالجملة فى

1- شارع الجيش باب الشعرية  وفى شركة النصرتبع الجيش ومحلات جملة وقطاعى كمان وعندكم العتبة

-2-من شركه الزهور فى دار السلام عند المترو وتركب من شارع ابو طالب الى مواصله فايده كامل وتقوله انزل شركه الزهور ماشى وهتلاقى هناك كل حاجه من المنظفات موجوده جمله وقطاعى

  3-من المنصوره ودى تجيبها من عطارة النقيطى اللى فى الشيخ حسانين  او عند عطارة ابراهيم سليم اللى هيا فى اخر شارع الجلاء قبل بوابه تربيه بتاع جامعة المنصوره تمام

 4- اللى جنبها اى فرع لكلية الزراعة تسال هناك او اى فرع لشركة للموادالكيماوية  

 5-اللى قريبة للمطرية تشوف عند اولاد غيتة ممكن تلاقى
6-اللى من اسكندرية تروح الزنقة وهتلاقى ان شاء الله