طريقة تنضيف البوتاجاز بأسهل طريقة

طريقة تنضيف بوتاجاز الغاز بطريقة سهلة وسريعة

السلام عليكم ورحمته وبركاته 

النهاردة ان شاء الله ميعادنا مع البوست اللى انتظرتوه كتير وهو تنضيف البوتاجاز بطريقة سهلة وسريعة والاهم بخامات متوفرة فى بيتك مش هتشترى اى منظفات ولاكيماويات خالص كالعادة 

الاخت بقى اللى عاوزة تريح نفسها وتشترى دماغها  اللى بتستسهل وتحط ورق فويل على البوتاجاز  ولا الاخت التانية اللى بتجيب لى اشى مستر ماسل وجف وكلين وباور والكلام دا تتفضل تركن على جنب مالكيش مكان هنا ياقطة ههههههههه استنى استنى متزعليش انا باهزر انت مبتهزرش يارمضان تعالى خدى فكرة لبكرة

ياجماعة فكرة الفويل غلط جدا على فكرة لانها بتخليكى تكسلى تنضفى اصلا وتسيبيه مدة وحتى لو حاجة وقعت عليه ومسحتيها من فوق بتتسرب منها جزء تحت الفويل وتتحرق مع الوقت

  خلينا نتفق مبدئيا كدا ان طالما ايدك فى البيت ومحافظة عليه مش هيغلبك ولاياخدوقت فى تنضيفه خالص

بمعنى ان انا روتينى اليومى ايه ؟ بعدمانخلص الغدا بارش البوتاجاز بخلطة الديتول والكلور لحدمااخلص غسيل المواعين الخلطة دى مجهزاها فى بخاخة فى المطبخ باستخدمها للرخامة يوميا لمااجى أفنش المطبخ والبوتاجاز بحتة منديل اوقماشة امسحه بيبقى زى الفل نضافة وتعقيم كمان لادعك ولايحزنون 

ولو باروق البوتاجاز بقى التنضيف العميق او الشهرى باعمل ايه ؟

 اسهل طريقة للتنضيف وهو لسه سخن بعدماتخلصى الاكل او الفرن يكون لسه مطفى بيسهل عليكى كتيرجدا لو هومحتاج مجهود ودعك او فى حاجة محروقة على البوتاجاز سواء استانلس او ابيض عادى هنستخدم نفس الوصفات  مفيش اى مشكلة خالص متخافيش هتحطى عليه اى حاجة من اللى هاقول ليكم عليها يتنقع والدهون تتفك يدوبك تمسحى بمنديل او قماشة بس

للمزيد من المعلومات عن وصفات وخلطات التنضيف

وصفات تنظيف عيون وسطح البوتاجاز من الدهون العنيدة والمحروقة 

سبق وعملت موضوع عن تنضيف العيون بس لوتحبى تشوفى الطريقة بالتفصيل دوسى على الصورة 

الطريقة الاولى

ملح الليمون
الكربوناتو 
الخل 
الصابون السايل 
مياه

يابنات الكربوناتو ليها اكتر من اسم علشان متتلخبطوش (بيكربونات الصوديوم اوصودا الخبز اوبيكنج صودا )
يعنى الخلطة بتاعتنا اللى كلكم عارفينها وشو ية مية

 وتخلعى العيون ماعدا واحدة وتسقطيها فيها وتسيبيها تغلى على العين اللى سيبناها وبعدين طفى عليها واخلعى العين اللى فاضلة وانقعيها معاهم من الليل للصبح او ساعتين تلاتة كدا 

 وبعدين هاتى السللك الاستانلس بتاعك او لو فيها دهون كتيرمحروقة عليها يبقى السنفرة الخشابى احسن 

وادعكيها هتلاقيها بقت زى الفل بدون تعب 

تانى طريقة

نشادر ب2جنيه
صابون سائل
مياه

 

ودى سحر بجد هايلة جدا الطريقة دى 

 شايفين العيون عاملة ازاى اصل كان عندى امتحانات ميدتيرم ومشغولة مع الولاد

 

وعلى فكرة منتج باور بتاع ماى واى فيه نشادر

باعمل ايه بقى باغلى مية ونشادر وصابون واغلي العيون فيها 

 

 واسيبها تهدى شوية مجرد مااتحمل امسكها والبس الجوانتى طبعا وبالسلكة دعكتين تلاتة هتبقى زى الفل ولو العيون عندك وسخة اوووى مرة على مرة هتنضف متتعبيش نفسك يعنى من اول مرة  علشان متبقاش اخرمرة هههههههه

تالت طريقة

 ليمون

ملح ليمون او ملح عادى
صابون + سلك مواعين 

هتيجى على العين النحاس وهى سخنة بعد ما تعملى الاكل وحطى عليها شوية ملح ليمون او ملح عادى ونص ليمونة وافركيها بيها

 وبعدين اغسليها بالصابون والسلكة هتلاقيها فلة 

او تحطي الحاجات دى فى مية وتغليها زى الطريقتين اللى فاتت واناباستغل فى الطريقة دى قشرالليمون باشيله فى الفريزر واطلعه لاغراض التنضيف 

كدا خلصنا العيون نتوكل على الله ونغسل البوتاجاز  

 اللى حطينا عليه خلطة الكربوناتو او النشادر او الليمون بالليفة الخشنة او السلك الناعم علشان ميتجرحش ولو فى اى دهون محروقة مع الخلطات دى هتدوب ان شاء الله تروحى منشفاه طبعا كويس وبعدين بمنديل مطبخ بارش ديتول والمعه تانى

كدا بقى زى الفل

نيجى للحمالات بتاعته بقى اللى فيها كل المشاكل بالذات لو زى بتاعتى كدا زهر تقيل زى الداهية وتنضيفها صعب جدا

 هننقعها فى المية اللى فيها الوصفة بتاعتنا زى كدا 

ونسيبها شوية لحدماتلاقى الدهون اللى عليها اتفككت بالمنظر البشع دا هههههههههههه

وبعدين اغسليها عادى بالسلكة هتبقى فلة ماشاء الله

تنضيف فرن البوتاجاز

دابقى سهل خالص برضه هتاخدى شوية مية مغلية وكربوناتو وخل وتحطيهم فى صينية داخل الفرن على الرف فى النص

ويفضل يكون لسه مطفى بعدماتعملى اى كيك اوصوانى علشان البخار يطلع ينضف الدهون اللى فيه من فوق تمام كدا وتشيلى الصاج وبعدين تغسليه بالسلكة وتنشفيه بقماشة طبعا هو والفرن من جوه

غسيل وتلميع زجاج باب الفرن

الازاز بقى انا بحب اشيله وانضفه براحتى بافك  المسامير بتاعته علشان اعرف انضف الازاز الخارجى من جوه

وهيلاهوب على  البانيو ياخد شاور هههههههه زى كدا

شايفة الفرق شاسع طبعا

 والازاز من بره باغسله كويس لو وسخ اووى بالخلطة بتاعتنا ولو نضيف شوية بالمعه بورقة جرنال وملمع ازاز المخصوص بتاعى طبعا عمايل اديا بس انا لزقت عليه المنظر دا لانى مباستعملوش للكيك دلوقتى مش محتاجة ابص جوه اتابع حاجة 

الازاز الفوقانى برضه بالخلطة وسلكة ناعمة وباغسله وبمنديل او قماشة امسحه زى الفل بقاله ييجى 5سنين حطاه 

الزراير اوالمفاتيح بقى باخلعها برضه وانضف تحتها واغسلها نفس الطرق اللى فاتت

باجيب سن سكينة زى كدا واحطه تحتها وامسكها بايدى تلاقيهاطلعت على طول

اغسلها واغسل مكانها كمان 

 وطبعاباغسله من الجناب كويس جدا تلاقيها ماشاء الله مراية مش عارفة اصور منها اصلا

 فى حاجة اخيرة بقى بس معرفتش اصور الصراحة كنت ملبوخة وعاوزة اخلص انا بافك وش البوتاجاز اصلا فى مسامير فى الجناب او ورا حسب بوتاجازك نوعه ايه بافكها واشيل الوش بالراحة علشان سلوك الاشعال متتقطعش وانضفه من تحت العيون السطح اللى فوق الفرن دا عارفينه اوقات بيقع اكل وفتافيت ودى طبعا احسن حاجة تعجب اخواتنا البعدا اللهم احفظنا الصراصير بيستخبوا هنا وانتى تقلبى المطبخ فوقانى تحتانى ومنضفاه زى الفل ومتعرفيش جايين منين

اخيرا بقى نرجع كل حاجة مكانها بالذوق هههههههه

 

 

شايفة الازاز عامل ازاى 

 فى طريقة بقى للى مش عاوزة كل شوية تنضف التنضيف العميق دا او مش عارفة ترجعه زى ماكان والعيون وسخة شوية مثلا ومنها تجدد شكله المهم هتعمل ايه

باجيب الفويل الخفيف بتاع الاكل واغلف بيه العيون بالشكل دا واجى بدبوس تخين واقعدافتح مكان الاخرام زى كدا

 والحوامل كمان بيبقى شكله تحفة انا عملت لكم ناحية واحدة بس علشان تشوفوا المنظر انماانا دايمابحب اغسله

 لما جيت اولعه لان الحوامل قريبة من  العيون فالنار طالتها شلت الجزء الامامى منها وسيبت الباقى

 شايفين المنظر جميل اووى عجبنى صراحة شكلها احلى كدا

كداكله تمام ياعبدالسلام واى خدمة بوتاجازك كانه لسه طالع من الكرتونة

 لوعجبكم الموضوع متبخلوش بالشير على جوجل او الفيس علشان اكبر قدر من الناس يستفاد وربنا يجعل اعمالنا فى موازين حسناتنا