كيفية طبخ الملوخية الخضرة
السلام عليكم ورحمته وبركاته
النهاردة هنعمل احلى ملوخية خضراء بالطريقة المصرية التقليدية
طبعا مع التكات والحركات اللى تخليها خضرا ومتسقطش منك
المقادير
- نص كيلو ملوخية خضراء
- راس توم مفصصة
- معلقة كسبرة ناشفة
- شوربة فراخ او لحمة
- ذرة كربوناتو (اختيارى)
- معلقة سكر
شرح طريقة طبخ الملوخية المصرية خطوة بخطوة
هنشترى الملوخية طبعا ونقطفها انا بافضل انى اخد الجزء اللى فوق بس اللى فيه البرعم دا علشان الملوخية يبقى لها عرق تمام كدا الباقى مش هنرميه طبعا بس خليه على جنب فى الاخر هاقولك نعمل بيه ايه ؟
وبعدين هنغسلها كويس فى مصفاة علشان التراب والميكروبات وخليها تتصفى خالص وكمان بافردها على قماشة واخليها تنشف من المية قبل التخريط ودا هاقولك ليه برضه فى التكات
نشفت خلاص كدا نتوكل على الله ونجيب فصين تلاتة توم وتحطيهم معاها يتخرطوا
بيدى نكهة جامدة جدا ولو بتحبى الكسبرة الخضرا حطى عودين وفلفل حامى لوتحبيه ياسلام
تخرطى بسرعة طبعا وتكون المخرطة حامية علشان متسودش منك
كدا لسه شوية خشنة
كدا بقت زى الفل خلاص
ركزى معايا فى اللى جاى
هتكون الشوربة مغلية لاااااااااااااااازم مش سخنة ولا باردة
وهتفرمى التوم بالكسبرة كويس اووى
وتشوحي نص التومة فى شوية زيت ولوتحبيها دسمة يبقى سمن او دهن مفيش مشكلة
وتاخدى شوية شوربة قدمغرفتين كدا وتحطيهم على التومة ومعلقة سكر ولماتغلى تانى
انزلى بالملوخية وقلبى بسرعة بمضرب سلك علشان متكلكعش منك
لومعندكيش مضرب يبقى خدى شوية شوربة وحطيهم على الملوخية فى بولة واسعة واضربيهم بالشوكة شوية لحدمايفكوا وبعدين ضيفيهم على الشوربة المغلية
لو محتاجة شوربة ضيفى لها تانى بس مغلية برضه
وضيفى لها الكربوناتولو تحبى يكون لها عرق يابنات الكربوناتو ليها اكتر من اسم علشان متتلخبطوش (بيكربونات الصوديوم اوصودا الخبز اوبيكنج صودا )علشان تفضل خضرا
وهى غلوة واحدة بس تطفى عليها وتشيلى الريم الابيض دا وترميه
وبعدين تشوحى باقى التومة
وتطشيها بكبشة ملوخية
وترديها فى الحلة تانى
وتغطيها ثانيتين بس بحيث تاخد ريحة التومة وتكشفيها تانى بسرعة وتقلبى
وبالف هنا احلى طبق ملوخية
طريقة عمل الملوخية بالصلصة
بتجيبي حتة سمن بلدي وتنزلى عليها بالتوم المفروم وشوحيهم شويه
وبعدين شويه طماطم وتسبيهم يتسبكوا او معلقة صلصة
وبعدين تحطي عليهم الشوربه وأول ما تغلي تحطي الملوخيه وتقلبي
ومش تسبيها تغلي كتير وبعدين تجيبي شويه توم ومعلقه سمنة ف طاسة
وعليهم كسبرة ناشفة وتحمريهم شويه وتضيفيهم ع الملوخيه
نصائح عند تقديم الملوخيه
واكيد لازم بتنجان مقلى او مخلل
لمعرفة طريقة عمل البتنجان المخلل او المقلى بالتفصيل دوسى على الصورة
ورز معاها
تكات مطبخ ام عمرو خالد علشان الملوخية متسودش ولاتسقط منك
- لما تخرطي الملوخية لازم تكون ناشفة خالص مفيهاش مية
- لما تخرطيها لاتكون خشنة اوى ولاناعمة اوى لانها فى كلاالحالتين هتسقط منك انا بحب اخرطها بالمخرطة طبعا ماليش فى شغل الكبة دا مبحبهاش الصراحة
- ومتخرطيهاش قبل الطبخ بمدة كبيرة لان الفيتامينات اللى فيها هتضيع وهتسود كمان
- لما تحطى الشوربة لازم تكون مغلية مش باردة او دافية لانها هتسقط برضه
- اناقلت لك ليه حطى مغرفتين بس وممكن تطلع تقيلة وتحتاجى تانى لانها لو طلعت سايلة ملهاش حل
- طيب دلوقتى انا عملتها وطلعت تقيلة عادى ضيفى لها شوربة مغلية لحدماتوصلى للقوام المطلوب اللى تحبيه لو الشوربة مش مغلية هتفصل برضه وتسقط
- ذرة الكربوناتو بتدى لها لون اخضرجميل وتعمل عرق بس مش اساسى خالص براحتك ممكن تستبدليها بعصرة ليمون عالشوربة قبل ماتحطى الملوخية
- لما تطشى لها التومة متغطيهاش كتير زى مااتفقنا علشان برضه هتسقط يدوبك ثانيتين واكشفيها
- هى غلوة واحدة بس متسيبيهاش تغلى كتير علشان هتسقط برضه
- بعدماتستوى متغطيهاش علشان متسقطش برضه
- الملوخية بالذات مبحبش اسخنهاخالص باعملهاساعة الاكل واستحالة تبات عندى لو فضل شوية وعاوزاهم باشيلهافى الفريزر واطلعابعدين تفك واسخنها بتبقى زى الفل بس دانادرا طبعا احنا مبناكلش اكل بايت
طريقة تجفيف الملوخية
فاكرة بقى باقى اوراق الملوخية اللى قطفناها وسيبناها على جنب
هاتيها بقى يا جميلة وسيبيها على صينية كبيرة فى المطبخ او اى مكان مفيهوش شمس علشان تبقى خضرا مش سودا وكل كام يوم قلبيها لحد ما تلاقيها نشفت خالص افركيها وشيليها شايفة اللون عامل ازاى احسن من اللى بتشتريها من بره مليانة تراب
شايفين لونها عامل ازاى ماشاء الله
تسلم ايديكي ياام عمرو ---انا باحط لها ملعقه صغيره سكر بتبقي جميله قوي ----
ردحذفتسلمى حبيبتى نورتى المدونة ياغالية
حذفأكيد جميلة طبعا طالما من ايديكى الحلوين