ترتيب الاكياس والشنط فى المطبخ وازاى تقفلى اكياس المكرونة والرز

 طريقة سهلة لتنظيم الاكياس

 السلام عليكم ورحمته وبركاته 

ازيكم يابنات النهاردة هنتعلم طريقة سهلة وبسيطة نرتب بيها اكياس الشوبنج او اللى بنشترى فيها الخضار والى اكيد معظمنا ان لم يكن كلنا بنشيلها نحط فيها اى حاجة او نستعملها للزبالة تمام كدا

طبعا فى ناس بتجمع كل الشنط والاكياس دى وتحطها جوه شنطة كبيرة وتشيلها فى درج او تحت الحوض او تعلقها فى المطبخ وطبعا دا منظر مش قد كدا خالص ومبيبقاش لطيف  

فانا باجمعهم واطبقهم بطريقة شيك وسهلة وبكدا شكلهم احلى وكمان بياخدوا مساحة اقل  

طريقة طى الاكياس بالصوروبالتفصيل 

 احنا هنجيب الشنطة او الكيس بالشكل دا ونفرده على الرخامة او الترابيزة ايا كان

 وبعدين تطويها نصين بالشكل داونخرج الهوا منها

 وبعدين نطويها تانى وبرضه نخرج الهوامنها فى كل خطوة نعملها

 ونلفها زى السمبوسك بالظبط والصورهتوضح الطريقة بالتفصيل

 ونيجى عند اخر جزء دا وتدخليه جوه المثلث اللى عملناه

 هيبقى بالشكل دا

 وهكذا لحدمانخلص كل الكمية اللى عندنا

 ونشيلها فى الدرج مش هتاخد مكان خالص

طريقة قفل اكياس الرز والسكر بطريقة شيك  

تانى جزء من كلامنا بقى هيكون ازاى نقفل كيس مكرونة او رز او سكر اى حاجة عندك اخدتى منها شوية واتبقى فيه تانى طبعا بيبقى تخزينهم صعب واوقات كتير بيتدلقوا مننا وبالذات لوعندك قرد صغير زى محمد ابنى كدا هههههههه

انا مرة لقيت عندى الدبابيس دى جوزى جايبها الا علشان نمسك بيها الورق فقلت اجرب اقفل بيها كدا لقيتها جميلة جدا وفى منها احجام كتير مناسبة لكل الاحجام 

 

 وتفتحيها كانك هتلمى بيها رزمة ورق وتقفلى بيها الكيس جميلة جدا والله وعملية

 طبعا هالاقى واحدة تقولى مش لاقياها ولا اجيبها منين هاقولها مالكيش حجة يا اختى عندك مشابك غسيل طبعا سواء خشب او بلاستيك زى دى

 نفس القصة استخدميها مش هتعيط ولاتقول لأ هههههههه

الطريقتين اسهل من بعض ومش مكلفين خالص طبعا يارب تعجبكم