طريقة عمل حمام محشى رزبالمكسرات

شرح طريقة عمل الحمام

النهاردة هنتعلم نعمل وصفة سهلة وجميلة جدا تشرفك فى العزومات
انالسه عاملاها فى عزومة وماشاء الله عجبت الناس اووى
طبعااناباعمل الحمام بكذا طريقة مشوى او طاجن مع الرز المعمر
او مع الخضار فى الفرن اما المعتاد عندنا فهو المحشى سواء رز او فريك
الجديد بقى المرة دى لان كان عندى مكسرات للرزبالخلطة انى ضفت للحشوة مكسرات فرقت اوى فى الطعم والله ياريت تجربوها

المقادير والطريقة

حمام حسب عددالافراد

رزمصرى كل حمامة ملوكف ايدك رز

ملح وفلفل اسود

بصل مفروم

كبدوقوانص او لحمة مفرومة

سمنة بلدى اوقشطة

جوزة الطيب

ورق لورى

حبهان

مستكة

مكسرات مشكلة

زبيب

سودانى

لوز

شرح طريقة التحضير

طبعا الحمام هنجيبه متنضف بس هنعيد عليه تانى اذا كان فيه ريش
ولا حاجة من جوه ونسلك بين الجلد واللحم علشان نحشيه
ويتغسل كويس بالملح والدقيق من بره ومن جوه ونشطفه

هناكنت عاملة 7 أجوازماشاء الله

ونخرط بصلة وعليها ملح وفلفل اسود وندعكها علشان تنزل ميتها

ونتبله بيها من جوه ومن بره الخطوة دى بتدى له تست عالى اوى

ونخليه على جنب على ما نحضر الحشوة بتاعته

وبعدين هنجهزالمكسرات الموجودة عندنا اى حاجة سودانى زبيب

لوز طبعا جميل جدا كنت هاعمل رز بالخلطة وكان متوفرعندى

هنغلى مية وبعدين نسقطه فيها ياخدغلوة واحدة بس

وبعدين هتقشريه بسهولة جدا زى كدا

وبعدين باقسمه بالسكينة نصين واشوحه فى معلقة سمنة بلدى بيبقى خطير والله

كدا كله تمام بقى

نغسل الرز ونصفيه ونسيح معلقتين زبدة وننزل عليها بالبصل ونشوحه شوية

ونضيف له الكبد والقوانص

وتتقلب لحد ما تستوى نص سوا

نضيف لها الملح والفلفل ونقلبها

وبعدين نضيف لها الرز

ونشوحه كويس علشان يبقى مفلفل

وبعدين نضيف المكسرات بتاعتنا
ونغطيه برضه لحد ما يتشرب المية

ونضيف له ملح وفلفل وشوية مية بسيطة
مش كتير علشان لسه هيكمل سوا فى الشوربة

وبكده يكون جاهز اللى تحب تزود بهارات عادى بس انا احط ملح وفلفل بس
ولو تحبيه دسم اكتر وطعمه يكون مميز ضيفى للرز معلقتين قشطة وقلبيه هتسيح من السخونية ويبقى مالوش حل واللى بيبتبقى منه بعدالحشو باسويه واحطه تحت الحمام

طبعا كلكم عارفين طريقة الحشو وسهلة واللى متعرفش بقى تدوس على الصورة دى

هتلاقى طريقة الحشو والتقفيل بكذا طريقة وكمان الحمام بالفريك والرزالعادى

http://omamrkhaled.blogspot.com.eg/2015/12/how-cook-pigeons-stuffed.html

وبعدين هننسقطه فى مية مغلية ونضيف له البصل والفلفل وورق اللورى والحبهان
والمستكة واى توابل تحبيها ونسيبه على نار متوسطة لحد ما يستوى ونوارب
غطا الحلة علشان ميفرقعش مننا

وممكن تسيحى معلقة سمنة بلدى وتنزلى عليهابالحمام الاول يتشوح ويتقفل من السخونية وبعدين تزودى عليه المية المغلية والبهارات بتاعتك شوفى الطريقة اللى تريحك من دول

هتعرفى ازاى انه استوى هتمسكى الجناح او الرقبة وتحاولى تكسريه لو اتكسر
معاكى بسهولة يبقى كده تمام

هننشله من الشوربة ونحطه فى مصفاة علشان نتخلص من الشوربة الزيادة
اللى فيه فلما نحمره ميعملناش مشاكل لاقدر الله

اما التحمير يا اما زيت او سمنة بلدى اللى يريحك
وهتحمريه فى طاسة غويطة وتقفى بعيد علشان لو فيه شوربة او طالع منه رز هتلاقيه بيفرقع فى الزيت فخلى بالك ولما تيجى
تقلبيه على الناحية التانية ياريت تهدى النار خالص او تشيلى الطاسة من على النار واقلبيه ورجعيها تانى