الريش الضانى فى الفرن
كل سنة وحضراتكم طيبين ويارب عيد سعيد عليكم جميعا
النهاردة هنعمل الريش الضانى المشوية
كيلو ريش ضانى
تتبيلة رقم 1
زبادى او لبن
بصل مبشور
طماطم مفرومة
ملح
فلفل
كمون
كركم
فلفل بابريكا
سماق
زعتر
روزمارى
حبة البركة
ملعقتين زيت
تتبيلة رقم 2
3 فصوص توم
ربع كوب خل أبيض
ربع كوب زيت زيتون
ربع كوب عصير ليمون
معلقة صغيرة بابريكا
معلقة قرفة
معلقة شطة
معلقة كمون
معلقة كزبرة ناعمة
معلقة ريحان ناعم
ربع معلقة قرنفل بودرة
نص معلقة زنجبيل
نص معلقةفلفل أسود
ربع معلقة توم بودرة
لو الريش بتاعتنا تخينة شوية وهنشويها على الشواية الفحم او الكهرباء يبقى هنحاول نرقها شوية زى البفتيك والبانية تمام
حطيها بين ورقتين زبدة ودقيها بالشاكوش بتاع البفتيك الخشب او الالومنيوم
وبعدين حضرى التتبيلة بتاعتك اللى تعجبك سواءالاولى او التانية وطبعا التوابل دى كلها لو مش متوفرة او مبتحبيهاش حطى الموجود
بالنسبة للتبيلة الاولى هنخلط الزبادى او اللبن ايهما ودامهمته بيخلى اللحمة طرية
ونضيف البصل والتوابل والزيت ونقلب كله مع بعضه
ونحط الريش فى الخلطة دى وياريت ميكونش اقل من ساعتين انا عادة باتبلها ليلة فى التلاجة
وبعدين هنحضرالشواية طبعا او نولع الفرن ونحطها فى صينية وخلاص وبعدماتستوى هنعمل حاجة تديها طعم المشاوى
ولعى فحمة وحطيها فى حلة او صينية وليها غطا وتعالى فى النص حطى طبق ازاز او استانلس او حتى ورقة فويل مزدوجة وحواها الفحمة دى وانزلى عليها بالزيت او الدهون اللى نازلة من الريش دى واقفلى بسرعة بالغطا علشان تتشرب طعم المشويات
طريقة الريش المشوية على الفحم
الطريقة دى مختلفة شوية هنخلط المكونات السايلة مع بعض
الخل وعصيرالليمون والزيت والتوم الفريش ونسيب الريش فيها شوية ربع ساعة مثلا
ونخلط المكونات الجافة مع بعض التوم البودرة والفلفل الاسود والزنجبيل والقرنفل البودرة وريحان وكسبرة ناعمة وكمون وشطة وقرفة وبابريكا
نطلعها من التتبيلة السايلة على خليط البهارات دا
ونولع الشواية سوا ءفحم او كهرباء تسخن كويس وبعدين نتوكل على الله ونشويها مبتاخدش وقت خالص اصلا
ولما تطلع تتقدم مع اى صوص تحبيه وخضار سوتيه
الصورة دى طبعا ريش ولحمة مع بعض
الصورة دى طبعا ريش ولحمة مع بعض
يارب تكون الوصفة عجبتكم واعذرونى لقلة الصور ان شاء الله وقت ما اعملها تانى هارفع الصور واعمل تحديث للموضوع
تعليقات
إرسال تعليق