طريقة عمل الحلبسة ( حمص الشام )

أسهل طريقة لعمل الحلبسة

طبعا الجو برد اليومين دول وفصل الشتاء جاى بتقله ومحتاجين اى حاجة تدفينا ومش هتلاقى احسن من المشرو ب الشعبى المصرى بتاعنا الحلبسة يقوم بالمهمة دى

حمص الشام الشكل النهائى

فوايد حمص الشام

قبل مانتكلم عن الطريقة احب اقولكم ان الحمص دا من الحاجات المفيدة جدا جدا ولازم نستغلها على قدمانقدر ونعود الولاد عليها

وغير انها بتدينا احساس بالدفء ليها فوايدتانية منها

1- يساعد فى التخلص من الديدان المعوية.

2- يعمل كمسكن قوى يخلصك من الألم وخاصة آلام الظهر.

3- يساعد فى تنقية البشرة ويحد من ظهور التجاعيد.

4- يساعد فى علاج مشكلة تساقط الشعر.

5- يقى من التعرض للإصابة بالسرطان.

- يساعد فى فترة النفاس أى ما بعد الولادة فى تنقية الدم المتبقى.

ودى صورة شجرة الحمص

وده شكل بذور الحمص ماشاء الله واحنا دلوقتى فى موسم زراعته لوحد يحب يزرعه يعنى بافكر والله قبل كدا زرعت عدس وبطاطس وجرجير وشبت وبقدونس وكسبرة وملوخية وطماطم كانوا جمال جدا

ربع كيلو حمص الشام

بصلة

توم مفروم او توم بودرة

طماطم مستوية

كمون

ملح

عصيرليمون

شطة ناشفة
بابريكا

جنزبيل فريش (اختيارى)

معلقة صلصة (اختيارى)

بالنسبة للحمص انا بأفضل يكون بلدى مش افرنجى البلدى حبته صغيرة وجميل

وبانقيه الاول طبعا وبعدين اغسله كويس وانقعه مش اقل من 8ساعات وعادة بانقعه طول الليل واعمله الصبح او العكس

الخطوة دى مهمة جدا جدا جدا ياجماعة لان معظم البقوليات بتاعتنا فيها غازات وبتعمل عسر هضم وتتعب الناس اللى عندها قولون

شايفين بعدالنقع المية عاملة ازاى

فى ناس بقى بتاخده تسويه بالمية بتاعة النقع انا مبافضلش كدا خالص لانك ولا كانك عملتى حاجة انا بارميها الصراحة

المهم لومسكتى واحدة واكلتيها هتلاقهيا طرية وتقريبا خلاص مستوية نص سوا ودا بيقصر معانا مدة الطبخ

هتصفى الحمص وترفعيه على النار مع باقى المكونات دى الطريقة العادية اللى هى الحمص وعصيرالطماطم وتوم وكمون ومية وبعد ما يستوى تضيفى الملح

انا باضيف حاجة بقى جنزبيل فريش ابشرى حتة وضيفيها بتدى له تست عالى جدا وكمان لوحد تعبان واخدبرد الجنزبيل والليمون والكمون والوصفة دى كلها ملهاش حل

وكمان الاهم بالنسبة لى الدايت ياجماعة مش معنى انك عاملة دايت يبقى متاكليش حمص لا هتاكليه وهتستفيدى منه كمان ويساعدك على رفع معدل الحرق

ازاى بقى الكمون والليمون والجنزبيل معروفين بيعلوا الحرق او بيحفزوا الجسم انه يحرق والحمص متحطيش منه كتير يعنى الكوباية بتاعتك خلى فيها معلقتين بس حلو اوى

نرجع تانى لكلامنا علشان منتوهش من بعض

طريقتى مختلفة شوية بارفع الحمص على النار واضيف له التوم المفروم والكمون والبابريكا وبصلة متقطعة اربع ارباع كدا مش للاخر خليهاماسكة من تحت علشان لومش بتحبيه تنشليها وترميها انما احنا بناكله وبنحبه كمان ولوعاوزة تستغنى عنها خالص اوك مفيش مشكلة

والجنزبيل المبشور وادى له تشويحة ع السريع كدا