الخبز البيتى باسهل الطرق
كيلو دقيق
معلقتين خميرة بيرةأوفورية
ذرة ملح
معلقة صغيرة سكر
ميه دافيه
ربع كيلو دقيق للفرد
مبدئيا كدا انا باعمل كمية زى موضوع العيش الفلاحى على اصوله اللى فات لوتحبوا تشوفوه اضغطوا على الصورة دى
فلقيت بنات فى الجروب بتقول عاوزة كمية صغيرة وطريقة اسهل لان مش سهل يتوفر الفرن البلدى او المطرحة
بالنسبة للدقيق بقى مش متوفر البلدى بتاعنا اللى بنسميه
دقيق غلة يعنى قمح فباحط دقيق درة معاه
ودا ليه بقى لان الدقيق الفينو او الزيرو دا بينشف بسرعة وكمان مبيفردش معايا بسرعة لومفيش يبقى هتفردي العيش رفيع شوية علشان يرفع معاكى ويقب
هننخل الدقيق طبعا الاول علشان لو فى اى شوائب
ونضيف الملح عليه ووبعدين نختبرالخميرة لو فورية بشوية مية دافية وسكر لوارتفعت يبقى اوك تمام لانهابتتضاف مع الدقيق لو مش شغالة هتبوظ العجين طبعا ومش هيخمر والمية الدافية واعجن
اناكالعادة بموت فى الخميرة البيرة مش الفورية
فهنجهزها بقى ادعكهابمعلقة سكر وشوية مية دافية زى دمع العين لاسخنة تقتلها ولاباردة فميشتغلش
ودا موضوع كامل شامل عن تحضيرالخميرة منزليا وخميرة الحمص للفايش الصعيدى دوسى على الصورة لوسمحتى
وننزل بيها على العجين بتاعنا لحد ما تتوزع كويس جواه
ولواحتجنا مية تانى نضيف بالتدريج لحدماتلاقى العجينة بقى كويسة لاناشفة اوى ولاطرية اوى وليها عرق كدا يعنى متتقطعش وانتى بتشديها
غطيها بقى تخمرشوية او ممكن تقطعيها وتخمر وهى متقطعة اللى يعجبك
ومتنسيش سيبى مسافة بين كل واحدة والتانية وتغطيه بقماشة
دا بعد نص ساعة فى الصيف وساعة فى الشتا العجين فرد وارتاح ومش هيغلبك فى الفرد
نبتدى نفرده بالايد او بالنشابة
نسمى الله ونسخن الفرن اناعندى فرن غاز مجلفن احسن نوع بقاله سنين شغال معايا كل حاجة عيش صوانى طواجن فطير بيتزا جلاش صوانى بشاميل وكيك كله وبيعمل معايا احلى واجب فى الافراح والعزومات وطبعا جنبى شوية مية وقماشة وسيخ حديد بنسميه عود باسخن الفرن وامسحه بالقماشة مبلولة مية علشان اهدى حرارته والعيش ميتحرقش منى واولع تحت والجناب
هتلاقيه ابتدى يرفع ويقب كدا من الجناب وبعدين كله لو محصلش ورفع من جزء وجزء يبقى السبب يااما الفرن مش سخن كفاية او هو لسه ماخمرش كويس
وبفضل الله كله بيرفع معايا لان الخميرة كويسة والعيش خمر مرتين
دا طبعا شكله وهو مخبوز فى فرن الخبيز او الفرن البلدى
لو مش متوفر يبقى يااما فرن البوتاجاز او الفرن الكهربائى
المهم تكون اعلى درجة حرارة موجودة علشان العيش بيحتاج حرارة عالية لو الفرن حرارته هادية مش هيرفع
وكمان هينشف لانه هيقعد مدة كبيرة والسوايل هتتبخرمنه
لوهتسوى فى البوتاجاز سخنيه كويس وخلى الشبكة على اول رف وممكن تشيلى الصاجه اللى تحت خالص
وطبعاهترصى العيش على الصاج او صينية عندك وتحطيه على الشبكة يستوى من تحت ولعى الشواية يتحمر من فوق لوالفرن مبيولعوش مع بعض
اماالكهربا هتولعى تحت وفوق
لو عملتى كمية شيليها فى الفريزر وطلعى على اد الوجبة سخنيه فى الفرن هيبقى زى ا لطازة تمام
تعليقات
إرسال تعليق