طريقة عمل برسيل جل الغسالات العادية باكثرمن طريقة

السلام عليكم ورحمته وبركاته 

استكمالا لسلسة بدايل المنتجات او تصنيع المنتجات والمنظفات فى البيت 

بدال مانشتريها جاهزة النهاردة هنعمل برسيل جل الغسالات العادية ونص اتوماتيك وفوق اتوماتيك والغسيل اليدوى 

الخامات اللازمة

نص كيلو تكصابون  20جنيه

ربع كيلو ملح شاور     3جنيه

لون ازرق                  جنيه 

ريحة مسك ابيض      2جنيه

    كلوروكس الوان          كوب      

ديتول                             

دى الروايح اللى باستخدمها دايما طبعا باموت فى  اللافندر

واسمه معطرمائى او ريحة هتلاقى منه كل الفواكه تقريبا

وكاسيليا والعود والمسك وسكيب النهاردة انااستبدلت ريحة البرسيل بالمسك واللافندر 

طبعا للتوفير انما اللى تحب تجيب ريحة البرسيل جل الاصلية تتفضل تجيب حتى تمن كيلو بس هيقعدكتير عندها لانها غالية جدا الكيلوب180جنيه دلوقتى انما دا الكيلوب30بس

اناماحطيتش تمن الديتول لانه موجود اصلا عندى واللى تحب تعمله تتفضل تشوف الطريقة بالتفصيل لودوستى على الصورة دى 

الديتول والكلوركس والخل او عصير الليمون اضافات لو تحبى تزوديها انما الاصل الخامات الاولى

وطبعالاسعارتضاعفت بدرجة بشعة التكصابون كان ب6ونص اصبح 20 جنيه

طريقة صنع البرسيل جل بالمنزل 

الطريقة الاولى 

الطريقة سهلة جدا جدا 

هنجيب التكصابون وندوبه بطريقة من اتنين 

 يااماتدوبيه فى المية بالشكل دا 

 لحدمايختفى كل التكصابون وميبقالوش اى اثر ولاكلاكيع 

او الطريقة الاسهل طبعا انك تضيفى له ملح الشاور 

وقلبى لحدمايمتزج معاه ويدوب بس بالراحة علشان ميطلعش الرغوة 

وتزودى مية بشويش كدا 

 هتلاقي الخليط امتص كل المية 

 تزودى تانى وهكذا لحدماكل الملح يدوب خالص 
وبعدين تضيفى ديتول وكلوركس الوان او خل او ليمون مغلى بالقشر ناخد المية بتاعته 

 لحدماتلاقى السمك بتاعه كويس هتضيفى الريحة اللى تفضليها المجال مفتوح قدامك

 وبعدين اللون ازرق طبعا وتقلبى 

انا اللون عندى كان سايل فضفته مباشرة لو انتى جايباه بودرة يبقى دوبيه الاول فى شوية مية وبعدين ضيفيه

ودا شكله النهائى ورغوته مالهاش حل ولاريحته والله 

الطريقة التانية  بدون ملح الشاور

لو مش لاقية ملح الشاورهنستبدله بكيس ملح ناعم عادى بتاع الاكل
وهتكون فى تغيير بسيط فى المقادير هنضيف مادة مغلظة اسمهاتايلوز علشان الملح العادى ممكن يخلى الخليط سايل تمام كدا
هتكون مقاديرنا كالاتى 

نص كيلو تكصابون 
كيس ملح صغير 
لون 
نص كيلو كلوكس الوان
 اوابيض 
او100جرام اوكسجين
100 جرام تايلوز 
ازازة خل 
ريحة 

بالتايلوز دا الكمية هتتضاعف معانا تقريبا ممكن تعمل 9كيلو او 10 حسب ماتحبيه 
لوهتعملى 5لتر مية بس هتضيفى نص ازازة الخل لو هتعملى 8لتريبقى الازازة كلها 
يبقى هنعمل ايه نفس الطريقة هندوب التكصابون بالملح وبعدين هنجيب 5لتر مية ونشتغل وممكن فى الاخر لو الخليط تقيل نزودميه 
 اوتريحى دماغك وتشتغلى من الاول بمقدار كبير وليكن 7لتر او 8حسب ماتحبى وتفتحى كيس التايلوز وتنزلى بيه واحدة واحدة على مقدار المية بتاعنا وتقلبى كويس علشان ميكلكعش اوعى تضيفيه مرة واحدة مش هتعرفى تحليه لو كلكع لازم يتضرب فى الخلاط او الهاندبليندر وشغلانة بقى  
المهم لماتلاقى الخليط بتاعنا بقى سميك وتقل ممكن توقفى ومتحتاجيش كل الكمية بتاعة التايلوز براحتك لان احناعاوزينه يدى سمك بس مش اكتر
بعدين هننزل بالخل نص الازازة او كلها حسب راحتك مش هيضر لو كتير خالص دا بيغنينا عن الديتول اصلا لومش عندك بيعقم ويطهرالهدوم روووعة 
وبعدها تنزلى بالتكصابون اللى حليناه الاول بالملح وتقلبى لحدمايمتزجوا كويس خالص وبعدها اللون والريحة وخلاص بقى جاهز وزى الفل 

 ولمايهدى شوية تعبيه فى اى جركن فاضى عندك 

والف مبروووووك عليكى برسيل جل نضافة مضاعفة علشان الكلوركس 

وتطهير علشان الديتول والريحة والتعطير كمان حاجة وهم كدا

ولو تحبى تشوفى طريقة الداونى دوسى على الصورة دى 

لوحسبتيها هتلاقيها ملاليم يعنى مش تمن كيلو واحد الكمية دى عملت تقريبا 5كيلو 
الموضوع الجاى برسيل جل للاتوماتيك 
طبعا اناعملت نص كيلو تكصابون عاوزة تعملى اقل او اكتراوك 
مش عاوزة تحطى لون برضه عادى مفيش مشكلة هتستخدميه للابيض بس حطى كلوروكس ابيض هيديكى نتيجة هايلة طبعا
انماالالوان ضفت كلوركس الوان 
لو للاسود هتضيفى كوباية خل علشان تثبيت الالوان 
ولو مش حابة تضيفى ريحة للبرسيل خالص ماشى لوهتستخدمى داونى اوكمفورت علشان اختلاط الروايح اوتعمليه بنفس ريحة الداونى هيبقى تحفة طبعا ان المسحوق والمعطرنفس الريحة
ودا طبعا شغال معانا غسيل هدوم وغسيل سجاد وكل حاجة
للامانة احنا بنعمل بديل للبرسيل جل على قدمانقدر انما طبعا مش هو البرسيل جل بمكوناته لان تحضيره فى البيت صعب تلاقى كل الخامات بتاعته  لان بيتكون من اكتر من 14مادة 

الطريقة التالتة

طريقة اقتصادية جدا جدا للبرسيل 

بالنسبة يابنات للى مش لاقية الخامات ممكن نعمله بطريقة اقتصادية جدا ومش هتكلفك اكتر من 10 جنيه بالكتير وهتعمل اكترمن 3لتر 
هنحتاج الاتى 
صابونة غسيل الابيض او صن لايت
ربع كوباية كربوناتو
ولون 
وريحة تفضليها
كلوركس ابيض اوالوان
نص كوباية عصيرليمون
كيس فانيش
كوبايتين مسحوق غسيل 
كيس برسيل جل 

اولا كدا يابنات الكربوناتو ليها اكترمن اسم منها بيكربونات الصوديوم بيكنج صودا صودا الخبز 
الوصفة دى شغالة ابيض وغسيل يدوى وغسالات عادية وتنفع للاتوماتيك كمان والالوان ممكن تضيفى كلوركس الوان 
لوهتعمليها للابيض يبقى هتستعملى كلوركس ابيض اوتزودى على الخلطة دى 5معالق ملح ليمون بيزهزه الابيض اوى صراحة
لو الوان يبقى كلوركس الوان حوالى كوباية 
هنسم الله ونبشر الصابونة بالمبشرة بتاعتنا وبعدين نضيف لها لترين مية مغلية 
وقلبى كويس جدا لمايدوب الصابون خالص انزلى بالكربوناتو وبعدين عصيرالليمون اوخل وبعدها اللون بتاعك لو مش عاوزة عادى بلاش طبعا 
وبعدهاالريحة حسب ماتحبى وسيبيه يبرد هتلاقى قوامه تقل خالص وبقى زى الفل عبيه فى اى حاجة عندك وساعة الاستخدام ابقى قلبيه او رجى الجركن تانى لانه مع الوقت بيتقل وعاوزة تضيفى ريحة تانى وقت الغسيل يبقى فى دورة الشطف او استعملى الداونى بتاعنا 
ولو عندك كيس برسيل جل جاهز حطيه عليه حلو برضه هيدى له الريحة المميزة
ولوعندك مسحوق بودر ضيفى كوبايتين تلاتة عليه وقلبيهم كويس جدا ولو لقيتيه تقيل اضربيه فى الخلاط او الهاندبليندر هيفك ويبقى جميل جدا وطبعا زودى المية حسب ماتحبى سمكه ازاى 
وياسلام لوعندك فانيش بقى ضيفى كيس هيشيل البقع وينضف جدا

اماكن بيع الخامات 

الخامات دى متوفرة عند اى حدبيصنع منظفات وهتلاقيهابالجملة فى شارع الجيش باب الشعرية  وفى شركة النصرتبع الجيش ومحلات جملة وقطاعى كمان وعندكم العتبة

-2-من شركه الزهور فى دار السلام عند المترو وتركب من شارع ابو طالب الى مواصله فايده كامل وتقوله انزل شركه الزهور ماشى وهتلاقى هناك كل حاجه من المنظفات موجوده جمله وقطاعى

  3-من المنصوره ودى تجيبها من عطارة النقيطى اللى فى الشيخ حسانين  او عند عطارة ابراهيم سليم اللى هيا فى اخر شارع الجلاء قبل بوابه تربيه بتاع جامعة المنصوره تمام

 4- اللى جنبها اى فرع لكلية الزراعة تسال هناك او اى فرع لشركة للموادالكيماوية  

 5-اللى قريبة للمطرية تشوف عند اولاد غيتة ممكن تلاقى