طريقة طبخ الكرشة بالصلصة(الكمونية)
كل سنة وانتم طيبين نضفنا الكرشة الموضوع اللى فات النهاردة هنطبخها بقى
ودالينك التنضيف باكترمن طريقة وبسهولة جدا دوسى عالصورة هتحولك للموضوع بالتفصيل
نسم الله كدا ونخش عالمقادير
كرشة متنضفة
بصل
توم
عصيرطماطم
ملح وفلفل اسود
كمون
جوزة الطيب(اختيارى)
جنزبيل فريش او بودرة (اختيارى)
طريقة الطبخ بقى ليها كذا طريقة مسلوقة او بالصلصة او بالحمص او محشية
1-طريقة عمل الكرشة المسلوقة
المسلوقة هترفعى مية على النارتغلى وبعدين تحطيها فى المية المغلية وتاخد غلوتين وترميها علشان نتخلص من الريحة
وبعدين ترفعيها تانى عالنار وتحطى اى منكهات وتوابل تحبيها فلفل وحبهان ورق لاورى قرفة وياريت جنزبيل فريش بيضيع اى ريحة خالص وتنزلى عليها بمية مغلية
لما تستوى تضيفى الملح فى الاخر طبعا
2-طريقة الكرشة بالصلصة(الكمونية)
تانى طريقة وهى الاشهر والاطعم كمان بالتسبيكة
وانا باعملها بطريقتين حسب نوع الكرشة لو كبيرة وهتاخد وقت فى السوا
باسلق الكرشة الاول زى ماقلت فوق وبعدها اعمل التسبيكة بتاعتها اشوح البصل فى الزيت او السمن طبعا قليل خالص لان هى فيها دهن برضه
وبعدين انزل بتوم مفروم وفلفل حامى لوعندى وبعدها عصيرطماطم اوصلصة وجنزبيل فريش او بودرة لانى بحبه اوى وفلفل اسود وكمون
ويدوبك غلوة واحدة وانزل بالكرشة بعد مااصفيها من المية علشان عاوزاها تاخد من طعم الصلصة واسيبها تاخد وتدى شوية لما تستوى اضيف الملح
طريقة طبخ الكرشة البتلو العجالى
الطريقة التانية لو الكرشة دى بتلو صغيرة يعنى مباسلقهاش باشوحها على طول مع بصل وتوم وفلفل ورشة جوزة الطيب قرفة جنزبيل اى حاجة تحبيها وبعدين هتلاقيها نزلت ميتها استنى شوية لماتشربهاتانى انزلى بعصيرالطماطم ولماتستوى الملح
ودوقى اطعم طبق كرشة بالف هنا وشفا
اللى مالوش فى الكرشة ميزعلش عندنا ممبار يلا بسم الله
دوسى عالصورة تحولك للموضوع
اللهم اجعل اعمالنا فى موازين حسناتنا
تعليقات
إرسال تعليق