اسهل 5 طرق لتنظيف الشفاط ودهون المطبخ

تنظيف شفاط المطبخ بطرق بسيطه ورائعه بالصور

السلام عليكم ورحمته وبركاته

طبعا الشفاط دا بعبع ناس كتير بس انا بحب انضفه جدا
وجربت كذا طريقة وهاقولكم عليها واختاروا اللى يعجبكم

 شرح تنظيف الشفاط الهوائى باكثر من طريقه

 الطريقه الاولى

 اللى كنت باستخدمها دايما باخد الشفاط فى البانيو ولو فى دهون كتير باكحتها بالسكينة من على جوانب المروحة بالذات وبعدين يااما اغلى مية او اشغل السخان على اعلى درجة واسيبه تحت المية شوية

وبعدين البس الجوانتى طبعا وطبق فيه صابون وكلور او الخلطة بتاعتنا طبعا عارفينها بس نقول كمان لوحد معانا جديد (صابون وملح ليمون وكربوناتو وخل )

 يابنات الكربوناتو ليها اكتر من اسم علشان متتلخبطوش (بيكربونات الصوديوم اوصودا الخبز اوبيكنج صودا )

والطريقة لودوستى على الصورة دى هتلاقيها 

وسلك مواعين او سلك استانلس خشن وادعكه كويس لحد ما ينضف ويبقى فلة طبعا الطريقة دى متعبة شوية

طريقة تنظيف شفات المطبخ بأستخدام زيت الاكل 

الطريقة التانية

اللى هى بالزيت كان باقى عندى زيت قلية سمك وشيلته فى ازازة علشان اعمل بيه صابون المهم جبته جنبي في طبق وبليت السلكة بالزيت ودعكته

 

مفيش 5دقايق كان نضف وبقى زى الفل وبطريقة اقتصادية وسريعة 

  بعدين جبت الصابون والمية والسلكة وغسلته وشطفته بقى فلة برضه ههههههههه

المهم فى الطريقة دى يكون الشفاط ناشف لو اتبل مية مش هينفع

 

تنضيف الاتربه والاوساخ من على شفاط المطبخ بأستخدام النشادر

الطريقه الثالثه

ودى احلى واحلى هاتى  4 معالق كبار نشادر اللى بنعمل بيه بسكويت العيد 

و ميه مغليه وحطيها فيها ونصف كوب صابون سائل

 ونحطه في حلة علي النار يغلي حتلاقوه بيفور طبعا تطفوا النار علي طول و نحطها علي الشفاط ونسيبها خمس دقايق وبعدين بأسفنجة من بتوع المطبخ ومجرد مسح بس هتلاقيه فلة ولا دعك ولا مجهود ووجع قلب وهتلاقي الدهون بتنزل لوحدها من غير ما تمدي ايدك كانها سحروطبعا الميه اللي فضلت نأخدها ننظف بيها البوتجاز والحيطان والسيراميك حتلاقوا المطبخ بقي بيلمع وكمان خلاط الحنفية حيبرق بس أوعوا تضيفوا أي مستحضر تاني عليه يعني اوعوا كلور او أي سائل اخر علشان ممكن يعمل غازات سامة ويسبب اختناق لاقدر الله

تنظيف الشفاط بالجاز والتنر

الطريقة الرابعة 

ناس بتنضفه بالتنر والبنزين والجاز او نفض ومشتقات البترول وباى قماشة خشنة عندك ياريت تكون صوف بليها ونضفى بينضف بسهولة وسرعة برضه بس انا الصراحة مبافضلهاش خالص لو انتى عندك حساسية او حامل 

وطبعا ممكن تحطيه ببخاخة مكواة وترشى على السيراميك وتنضفى 

تنضيف الشفاط بالدقيق

الطريقة الخامسة 

غريبة شويتين تلاتة كدا الدقيق ايوا حضرتك الدقيق بتاعنا دا هتجيبى شوية دقيق باقى من قلى السمك او مسوس حتى اى حاجة 

 وطبعا الشفاط ميكونش عليه اى نقطة مية خالص يدوبك الدهون وبس وتفركيه بالدقيق هتلاقيه نضف على طول خديه بقى وكملى تنضيف بالمية والصابون وكلور لوعندك ديتول مفيش خلا ص هى مية وصابون وشكرا 

تنضيف الشفاط باستخدام الصابون المغربى

الطريقة السادسة 

بصابون الغار او الصابون المغربى تحفة بسلك استانلس زى مااتعودنا وبليه صابون ونضفى فى ثانية هيبرق

تنضيف الشفاط باستخدام البوتاس 

الطريقة السابعة 

البوتاس ودا سحر برضه بس طبعا لازم جوانتى وتكونى فاتحة الشبابيك علشان الريحة البوتاس يابنات اسمه العلمى هيدروكسيد البوتاسيوم ودا اللى كانت بتستخدمه جداتنا فى غلى الهدوم البيضا قبل وضعها بالغسالة وبنعمل بيه الصابون القطع كمان

هتجيبى بجنيه بس وتحطى مقدار كوبايتين مية فى طبق اوجردل بلاستيك ومعلقة بلاستيك او خشب  وتنزلى عليهم بالبوتاس وقلبى لمايدوب خالص او سيبيهم فى مكان امن يدوبوا براحتهم بعدها عبيه فى بخاخة مكواة ورشى منه على اى دهون عندك فى المطبخ هتلاقيه زى قاهرالدهون باور واحسن كمان 

بس خلى بالك المية الاول مش العكس الله يكرمك وادواتك بلاستيك مش معدن وحذار يجى على ايدك ولو لاقدرالله حصل خلى جنبك ازازة خل واغسلى ايدك بيها علشان نعادل القلوية بتاعته بالخل حمضى اوعى تحطى مية هتزود الامر سوء الطريقة دى حلوة بس للامانة لازم لها الحذر اللهم بلغت اللهم فاشهد 

الطريقة التامنة 

دى بقى للى عاوزة تشترى دماغها ومكسلة هههههه تجيب باور للدهون من ماى واى او مستر ماسل او جف او مسترشاهين او ماكس دا ارخص بكتيييير او اى منتج مزيل للدهون وترش بيه الشفاط وبدون مجهود هتلاقيه نضف باقل مسحة عليه بليفة حتى مش سلكة

خلطة لتنضيف دهون المطبخ 

كوب خل 

كوب كلور 

ماء اوكسجين تركيز 30 من الصيدلبه 

بيكربونات الصوديوم(كربوناتو) 

صابون سايل 

اخلطى كل الخامات دى مع بعض وحطيها فى بخاخة 

ونضفى بيه كل الدهون من البوتاجاز الحوائط الشفاط اي حاجه فيها دهون يعنى 

يارب الافكار تعجبكم وطبعا كل حاجة باقولكم عليها باكون مجرباها وربنا يعلم للأمانة

انا نضفته المرة دى بالزيت والله 5دقايق مش اكتر كان خلص

الصور يمكن غامقة شوية علشان الاضاءة بس هو لونه افتح من كدا بكتير

وبعدين تنشفيه طبعا وتعلقيه مكانه ودى طريقة جميلة جدا لتجديد شكله والحفاظ عليه دوسى على الصورة تحولك للموضوع