طريقة تنضيف وتلميع براد الشاى والاوانى الاستانلس باكتر من طريقة

 تلميع الاوانى الاستانلس ( تلميع برادالشاى stainless steel)

السلام عليكم ورحمته وبركاته

لو عندك اى حاجة استانلس ولونها مطفى او اصفرت مثلا (حلة او براد او كنكة ) أى حاجة هاقولك تلمعيها ازاى

انا متعودة دايما استخدم ملح الليمون والكربوناتو فى اى خلطات تنضيف وصابون المواعين تمام كدا فتلاقى المواعين عندى زى الفل ماشاء الله وخصوصا الاستانلس ستيل

الطريقة الاولى لتنظيف الاستانلس القديم ( stainless steel )

الطريقة بقى هتجيبى البراد وتحطى عليه ( ملح ليمون وشوية صابون سايل ) وتدعكى بالسلكة هتلاقيه بيبرق فى اقل من دقيقة دى كانت طريقتى الاولانية

2-تلميع وتنظيف الاوانى الاستانلس بالكركديه

المرة دى جربت حاجة تانية لان مكنش متوفر عندى ملح الليمون 

وطلعت هايلة جدا وبتدى نفس النتيجة وهى الكركدية 

هتغلى كركديه عادى جدا بس فى حلة واسعة وتحطى البراد او الحلة بتاعتك فيه

وبعدها تطلعيه وتدعكيه بصابون وسلكة واتفرجى على شكله وادعى لى بقى , والله ماعرفت اصوره خالص فى النور من اللمعة بتاعته اضطريت اطفى نور الأوضة واصوره فى الضلمة بالفلاش

طبعا انا مارميتش الكركادية دا استخدمته فى تنضيف البوتاجاز وضيفت الباقى على صابون المواعين

3-تلميع الاستانلس باستخدام الكاتشب

الطريقة دى بسيطةوسهلة ومتاحة طبعا 

صلصة الطماطم او الكاتشب ايهما وبنعتمد على تفاعل الاحماض مع الاوانى فبتنضفها جدا سواء من بره او من جوه اغليها شوية عالناروهتشوفي الفرق 

4-صابون الغسيل الابيض 

الصابون دا هايل فى كل اغراض التنضيف والغسيل 

هتجيبى حتة صابون غسيل الابيض بتاع زمان دا وادهنى الحلة او البراد بيها من بره كمية حلوة كدا وبعدين رشة دقيق عليها وسيبيها نص ساعة 

وبعدين شوية صابون مواعين ومية بسيط ادعكيها بسلك استانلس خشن هتلاقيها فلة 

او صابون ابيض وكربوناتواو بيكنج بودر وخل وصابون سايل 

وتدعك جامد

او تغلى مية وفيها صابونة مبشورة وربع كوباية كربوناتو ونص كوباية خل تفاح او تفاحة مبشورة 

وتحطى الاستانلس فيها تغلى هتلاقيها لمعت والاوساخ بتتفكك من غير دعك ولو اتبقى حاجة ادعكيها بسلك خشن

او اغلى فيها بيبسى او كوكاكولا