تنضيف وغسل التلاجة باسهل طريقة بالصور
النهاردة هنتكلم عن تنضيف التلاجة باسهل طريقة بدون تعب ولا مجهود كبير
اولا هنفصلها من الكهربا
في ناس بقي بتجيب طبق ومية وليفة وصابون وتقعد تدعك التلاجة وبعدين تشطف وبعدين تنشفها كانها هتحميها وطبعا كتر المية غلط ويخلي التلاجة تاكلها البارومة , انا باعمل ايه بافضيها خالص وارص الحاجة علي رخامة المطبخ ودي سهلة خالص لان كل حاجتي باحطها في علب تلاجة او اطباق بلاستيك , وبعدين باشيل الارفف كلها وعلي الحوض باغسلها الاول هي والمفارش واركنها تنشف علي جنب
وبعدين ببخاخة الخلطة بتاعتنا (مية وصابون وملح ليمون وكربوناتو وخل )
يابنات الكربوناتو ليها اكتر من اسم علشان متتلخبطوش (بيكربونات الصوديوم اوصودا الخبز اوبيكنج صودا )
او مية وصابون وخل اوكلور علشان التعقيم وارشها من جوه وامسح بفوطة نضيفة من بره ومن جوه مفيش ٥ دقايق هتلاقيها فلة وزي القشطة
يابنات الكربوناتو ليها اكتر من اسم علشان متتلخبطوش (بيكربونات الصوديوم اوصودا الخبز اوبيكنج صودا )
او مية وصابون وخل اوكلور علشان التعقيم وارشها من جوه وامسح بفوطة نضيفة من بره ومن جوه مفيش ٥ دقايق هتلاقيها فلة وزي القشطة
تنظيم التلاجه بعد تنظيفها بالصور
ونرص الحاجة بنظام وفنوالخضار اللي في الادراج تحت بافرش تحته مناديل مطبخ وارص وبين كل رصة ورصة مناديل بكدا تحافظي عليها مدة كبيرة والطماطم تخلي الزهرة من تحت علشان متخسرش منك
اول رف تحت الفريزر لللبن والاجبان واللنشون وحاجات العشا والفطار دي
تاني رف باحط الفاكهة
التالت لو في خضرة اوخضار زايد من الادراج او اكل
والترتيب دا مهم علشان تدرج الحرارة وتوزيعها
وطبعا كل ماتكون فيها فتحات احسن
هتلاقوا اخر رف فيه ورق جورنال ودا لفيت بيه الخضرة علشان متدبلش بتقعد بالاسبوع زى الفل هى والملوخية والسبانخ المهم ميطولهاش اى نقطة مية , بالنسبة للاجبان والحاجات دى ياريت تحفظيها فى حاجة ازاز او استانلس بلاش الاطباق الفل دى خالص اول ماتجيبيبها فضيها على طول لانها ضارة وكمان الاكياس البلاستيك لو جبتى فول او بليلة تفضيها برضه
وحاليا انا جبت بلاستيك صحى جميل جدا للتلاجة والاكل وصحى ازاى يعنى تمسكى الحاجة وتبصى تحت هتلاقى مثلث فيه رقم ياريت يكون 5 دا احسن بلاستيك صالح لحفظ الماكولات
اخيرا بقي للتعطير وعلشان تتخلصى من ريحة الاكل هتحطي حتة فحم في التلاجة علشان تمتص الروايح او قشرليمون وبرتقال او عودين قرفة
او لوعندك الحاجات دي يكون افضل فحم وفانيليا ورشة كربوناتو واقفلي عليهم في حته قماشة مسامها واسعة زي الفانلات البيضا او قطعة شاش
وادعي لي بقي علي النضافة والريحة
ومتنسيش طبعا تنضفى الجوان بتاع التلاجة من جوه ومن بره علشان متديش فرصة لاى حشرات تتكاثر فيه اللهم احفظنا
بالنسبة للفريزر او الديب فريزر بتطلعى الحاجة منه على جنب او الادراج ونفس طريقة التنضيف بتاعة التلاجة
طبعا دا لو نوفروست انما الديفروست بيكون فى تلج ولازم يتشال بصفة دورية علشان كفاءة التبريد فى التلاجة و اكيد مينفعش
نسيب المفرزات بره الديب فريزر اوالفريزر لمدة طويلة يبقى الحل ومش هياخدخمس دقايق ايه
بافتح باب الفريزر ومعلقة خشب مسطحة وانزل التلج لو طبقة كثيفة علشان اختصرالوقت وبعدبن اجيب مروحة واشغلها واثبتها على الفريزر هتلاقي التلج ساح فى لمح البصر والله
نشفى بقى وطهرى ورصى حاجتك تانى وادعى لى
وكمان فوق التلاجة باقف على سلم وانضفه ودايما باحط عليه يا مفرش وزهرية ورد او ورق فويل والزقه بسلوتيب بيحاافظ عليها جدا اوعى واوعى اياك تحطى ورقة جورنان زى مافى ناس بتعمل ليه بقى يا حلوة منك ليها لان ورقة الجورنان مع التراب والزيت والدهون من القلية هتتراكم عليها حضرتك وتجيب لك صراصير
وبلاش الله يكرمكم العادة بتاعة المصريين اللى بيعاملوا التلاجة زى المطبقية ويركنوا عليها اطباق وبلاستيكات واى حاجة مش عاوزينها المنظر يع خالص الصراحة غير انها برضه بتدى فرصة للصراصير تعشش فيها
المهم انا كنت سيبت التلاجة مدة كبيرة من غير تنضيف لانى كنت تعبانة اووووى وكمان كنت شايلة فى التلاجة مصيبة سودا اسلحة كيماوية اكيد عرفتوه فسيييييييييخ بس علشان باحط الفحمة بتاعتى فى التلاجة الريحة مش مقرفة للدرجة دى وطبعا احنا كنا اخرالشهر فمعلش التلاجة خاوية على عروشها هههههههههههه
فى ناس هتقول ماهى التلاجة زى ماهى اهى مفيش فرق فى الصورتين اللى فى الاول اقولك فعلا ودا لانى ايدى دايما فيها ومحافظة عليها والصور دى اقسم بالله التلاجة كان بقالها شهر مااتنضفتش وكنت قرفانة جدا منها بس الحمدلله لما جيت انضفها لقيتها زى الفل كانها لسه متنضفة امبارح
تعليقات
إرسال تعليق