طريقة تخليل الزيتون ( الزيتون المخلل ) بالصور
اولا كدا عندنا نوعين من الزيتون معروفين
عزيزى او عجيزى زى ماالبعض بيقول ودا بيبقى طويل ورفيع وبيكون مر شوية
و الزيتون التفاحى ودا عشقى دايما بجيبه لانه بيكون فيه لحم كتير ومش مر اوووى زى العزيزى بس عيبه ان نفسه قصير مبيقعدش كتير زى العزيزى فلمابافتح عليه باشيل الباقى فى التلاجة ولو كمية كبيرة باخزنه فى الفريزر
العزيزى يقعدمن السنة للسنة ميجرالوش حاجة
وطبعا الزيتون الاسود دا فى النوعين لما يستوى اووى بيسود مش نوع منفصل يعنى لاتكونى مفكرة فى شجرة بتطلع زيتون اسود على طول هههههههه
خلينا نتفق ننقى الزيتونة السليمة مفيهاش بقع ولاخدوش ولا اى حاجة تمام كدا
طبعا هو محتاج وقت شوية حوالى شهر لو تفاحى او شهر ونص لوعزيزى
ولو مستعجلة عليه بقى يبقى امسكى كل زيتونة ودقيها بايد الهون كدا بسيط بحيث تستوى بسرعة
او تشرحيها بالسكينة بالطول كدا
كيلو زيتون
كيس ملح
جزرمبشور (اختيارى)
حزمة كرفس (اختيارى)
توم
فلفل حامى الوان
معلقة خل
عصير ليمون او مية
عصفر وحبة البركة (اختيارى)
ربع كوب زيت للوش
شرح كيفية تخليل الزيتون بأنواعه
انا طبعا باجيبه كبير عن كدا بمراحل بس جوزى ماصدق شاف البشاير جابه على طول اصل ماعملتش السنة اللى فاتت هههههههه
المهم التفاحى مش زى العزيزى محتاج نقع كام يوم علشان المرارة تخف شوية بس برضه نقعته يومين والصبح والليل باغيرالمية بتاعته علشان مكانش عندى برطمان كبير يكفى الكمية كلها فاضطريت انتظر بقى
اول حاجة هتغلى المية وتسيبيها تبرد خالص للتعقيم طبعا وكمان علشان الريم اللى بيضايقناع الوش
وبعدين هنجهز الخلطة بتاعته اللى تحبيها مش شرط تلتزمى باللى كتباه خال معندكيش كرفس اوك مش حابة التوم مفيش مشكلة خالص المهم اساسياتك ملح وفلفل وليمون وخل
هنفرم الفلفل والتوم والملح فى الكبة
وبعدين هنبشر الجزر
ولو عندك الكرفس طبعا هتقطعيه على الخلطة انا مكنش عندى المرة دى انما كل مرة باحطه
وترصى طبقة طبقة فى البرطمان زى كدا ويفضل يكون ازاز لو تقدرى لومفيش البلاستيك شغال عادى
لو مش حابة حطيه مع الخلطة وقلبيه كله مفيش مشكلة طبعا
ودى اخرطبقة زيتون
تاخدى قشرالليمون اللى عصرناه بالايد خلى بالك مش فى الخلاط وترصيه فوق الزيتون علشان يحميه واكبسيه كويس وسيبى مكان متمليهوش اوى علشان المكونات دى هتتفاعل مع بعض وكمان الجو حر ميبهدلكيش المكان
وبعدين تحطى الملح وتدوبيه فى المية بتاعتك وتعرفى ازاى ان الملح مظبوط يااما تدوقيه يااما تجيبى بيضة مغسولة وتحطيها فى المية لونزلت يبقى لسه عاوزة ملح
لو طلعت على الوش كدا يبقى تمام كمية الملح مظبوطة
وتضيفى عصير ليمون لو عندك بنسبة تقريبا تلت وتلتين يعنى لو كوباية عصيرليمون قصادها كوبايتين مية
وتصبى السائل كله عليه بحيث المية تغطيه
و صبى عليه زيت علشان يمنع البكتريا الهوائية وميعفنش ولا يعمل ريم ابيض ع الوش
وسيبيه فى مكان مظلم الى حدما اناباحطه جنب الدولاب وباغطيه لحد ما ربنا يسهل ويستوى
طريقه اخرى لتخليل الزيتون (الطريقه العاديه)
الطريقة العادية والتقليدية بقى انك تخلليه فى مية وملح بس فلو عملتلى كدا بعد مايستوى اعملى له الخلطة بتاعتنا ملح وتوم وجزر وليمون وزيت وكرفس ودوقى احلى مخلل وادعى لى بقى اوعى تنسى هههههههه
الزيتون الاسود هاعمله موضوع منفصل لان طريقته غير دى شوية بس ربناييسر ويطلع
واناطبعا باعمل كمية علشان اهادى الحبايب
طبعا الصورة دى قديمة هو لسه عاملاه من يومين مالحقش لمايستوى هارفع صورته
تعليقات
إرسال تعليق