كيفية عمل مخلل اللفت
النهارده هنستكمل شرح عمل جميع انواع المخللات المصرية بتاعتنا واللى هتلاقيها فى
القسم الخاص بالمخللات
وموضوع النهارده هنتعلم مع بعض ازاى نعمل مخلل اللفت بشرح سهل مع بعض النصائح المهمه وهنحل مشكلة الريم والطبقة البيضا اللى بتلاقيها على وش المخلل لماتفتحيه وتبتدى تاكلى منه
المقادير
كيلو لفت مقطع
لتر مية
ربع كوباية ملح
ربع فنجان خل
كوب فلفل احمر حامى
فصين توم (اختيارى)
عودين كرفس (اختيارى)
معلقة سكر
معلقة كركديه
معلقة كركديه
اللفت ياريت تنقيه صغير مش كبير لان الكبير بيكون شايخ يعنى فاضى من جوه ومخوخ وزى السفنج وتكون تقيلة لان الخفيفة شايخة برضه
وتجيبى اللفت اللى لونه زاهى زى دا مش هيحتاج بنجر اصلا
هتجيبى اللفت وتنضفيه وتقطعى العروق لو مش عاوزاها فى ناس بتحبها ممكن تخلليها
وبعدين قطعيه بالسكينة او بالقطاعة المشرشرة دى جميلة جداباعمل بيها كل حاجة لفت جزربطاطس كوسة ورخيصة جدا سعرهالايذكريعنى
ورشيه بشوية ملح وشطة وخليه فى مصفاة ساعتين تلاتة علشان ينزل ميته وهتلاحظى ان حجمه قل
وبعدين هنعقم البرطمان استعدادا لاستخدامه لو ازاز والخطوة دى مهمة جدا للمخلل وكمان المربى البيتى
هتغلى مية فى حلة وتسقطى فيهاالبرطمان بتاعك ياخدغلوة طلعيه بدون ماتلمسيه بايدك طبعا
ودخليه الفرن على الرف الاولانى وعلى نارهادية خمس دقايق كدا لحدماينشف من ميته
كدا بقى تمام وجاهززى الفل
هتاخدى لترالمية وتغليه وسيبيه يبرد خالص
هتاخدى بقى الفلفل والملح ولوتحبى تحطى شطة كمان وتهرسيهم فى الهون او تضربيهم فى الكبة وتريحى دماغك وخلاص
و بعدين ضيفيه على اللفت و ضيفى الكرفس والخل وباقى الملح ومعلقة السكر
وحطى المية والخل واقفلى عليه تقريبا اسبوع او 10 ايام
لقيتى لونه حلو خلاص لقيتيه مش احمر زى مانتى عاوزة
باعمل تكة حلوة بس قبل التقديم مباشرة باضيف له شوية كركديه مغلى وبارد بيتشرب اللون حلو اوووى وبيكون زاهى طبعا احسن من البنجر كمان
وممكن تضيفى الكركديه من الاول زى الصورة دى
مفيش مشكلة بس اللون مع الوقت بيقل فالاحسن ساعة مايستوى وتفتحى عليه
تكات مطبخ ام عمرو خالد
الريم دا بنتخلص منه لما نغلى المية قبل مانستخدمها وفص التوم بيدى له نكهة حلوة اوى
معلقة السكر بتخلى الخضار المخلل مقرمش مش مهرى
تعقيم البرطمان مهم جدا علشان نتخل صمن اى ميكروبات او بكتيريا ضارة
لما يستوى وتفتحى عليه ياريت تستعملى المعلقة او كبشة حتى تطلعى بيها متحطيش ايدك فى اى مخلل دا بيخليه يريم ولو مش بيعمل دود
فتحتى عليه واكلتى بالف هنا وشفا ياريت بقى تحفظيه فى التلاجة لحدمايخلص
اللفت بالشكل الجميل دا اناعملته ازاى حطيت اللفت كامل بعدما اتخلل قطعته بقى ابيض من جوه واحمرمن بره
تعليقات
إرسال تعليق