كيفية حل بعض مشكلات الغسالة الاتوماتيك ودورة الخل

تعليم طرق حل معظم مشاكل الغسالات الاتوماتيك بالصور 

السلام عليكم ورحمته وبركاته 

معظم الستات اللى عندهم غسالات اتوماتيك بيقابلهم بعض المشاكل ومبيعرفوش يتصرفو ازاى .. انا جبتلكم حلول بعض المشاكل اللى قابلتنى وانا بتعامل مع غسالتى الاتوماتيك , فلوغسالتك فيها مشكلة من دول يبقى الحل هنا , لو ريحة الهدوم وحشة او مبتصرفش مية او كفائتها قلت , الغسالة لازم لازم لازم تعملى لها صيانة دورية بنفسك كل شهر حتى علشان تحافظى عليها طول العمرانا بتاعتى بقالها 8سنين بسم الله ماشاء الله زى الفل 

شرح عمل دورة تنظيف الغساله الاتوماتيك بالخل

هنعملها دورة خل شهريا ودى ليه بقى لانها عمليه نظافه عامه للغساله الفول اوتوماتيك وهى تحافظ على رومان بلى الغساله وتحافظ على عمر الحله الداخليه تجيبى كوباية خل وتحطيها فى درج المسحوق وعليها شوية كربوناتو لو عندك وتشغليها دورة غسيل كاملة على درجة حرارة 60 وليكن ساعة او ساعة ونص اللى بيحصل ايه بقى لما الغسالة سحبت الخل وبدات الدوران وتقليب الخل بالماء وهو على درجه الحراره العاليه الخل بعمل ايه بيدوب الاملاح والترسبات من الحله الداخليه ورواسب المتحجرة بتاعة المسحوق واللى ممكن تسد المواسيرالداخلية فيها ومتصرفش المية وكمان تلاقى الريحة الوحشة فى الهدوم مهما استعملتى معطر
 , سبب تانى  انك بعد ما تخلصى غسيل بتسيبيه جوا الغسالة ومن الكتمة والحرارة اكيد ريحته هتقلبفانتى لو مش فاضية تنشريه طلعيه يتهوى فى سبت الغسيل احسن طبعا
ومتنسيش تنضفى الجوان البلاستيك بتاع الباب بحتة قماشة بعدكل غسلة دا لانه بيكون فيه مية واوقات اوساخ كمان مع الوقت بتعمل ريحة وحشة 
بعدماتخلصى الغسيل ياريت تسيبي الباب مفتوح ولو ساعة كدا بحيث الغسالة تتهوى ولو فيها مية تنشف كمان 

خطوات تنظيف فلتر الغسلات الاتوماتيك بالصور

ودا مهم جدا لو لقيتى ان الغسالة مبتصرفش مية يبقى يااماالفلترمسدود او الصرف بتاعها من ورا اسحبى الخرطوم وشوفيه برضه 

دايما هتلاقى الفلتر فى الغسالة من تحت اناغسالتى ال جى كورى وعرفته بالصدفة كدا من كام سنة كنت باقول الباب دا بتاع ايه فتحته ولقيت بلاوى بقى المهم هتعملى ايه هنفتح باب الفلتروهتلاقى الغطا دا نليفه ناحيه الشمال عكس عقارب الساعه

 

 هيتفتح نطلعه ونلاقي جواه ايه اي خيوط او وبر من الهدوم وممكن تلاقي التكلسات الجيريه اللي دوبتها دوره الخل او فلوس زى ماانتوا شايفين كدا القرد الصغيربتاعى كان حاططها فى جيبه ههههه , نضفيه خالص ونشفيه واقفليه تانى وده لازم يتنظف باستمرار علشان او اتسد الغساله هتنزل ميه علي الارض نفتحه كل فتره ونظفه

 

نصايح هامة للحفاظ على الغسالة 

* فى حاجة اخيرة ياريت ترحموا الغسالة شوية بمعنى ان الغسالة دى جهاز له عمرافتراضى لوحافظتى عليها هتقعدمعاكى مدة كبيرة طبعا الغسالة متمليهاش هدوم للاخر بمعنى ان هى حمولتها 7كيلو يبقى احط 7كيلو هدوم لا طبعا اعملى حساب المية لسه وحطى الهدوم وتدخلى ايدك كدا وتوقفى كفك على سيفه دايكون فراغ بين الهدوم والحلة من جوه

* مهم جدا جدا لاتحطى اقل من كدا ولا اكترمن كدا ولو عندك شوية غسيل صغيرين واقل من نص الغسلة استنى لماتكمليهم او حتى حطى حاجة نضيفة معاهم المهم ميكونش اقل من نصها هدوم 

* مهم جدا جدا برضه الوقت بين كل غسلة والتانية ميقلش عن ساعتين انا كبيرى اغسل مرتين صبح وليل ودلوقتى جبت واحدة عادية باغسل عليها زى الفل وباريح دى شوية بتنجز معايا لانها اكبر وبتوفرمية ومسحوق وكهرباء اكيد هههههه

انا شفت ناس بتغسل بالاربع دورات ورا بعض حرام والله الرحمة حلوة