شرح طريقة عمل الجبنه الفلاحى
السلام عليكم ورحمته وبركاته
اغلبنا نعرف الجبنه القريش ( الجبنه الفلاحى ) اللذيذه وطبعا معظمنا بنشتريها من الباعه جاهزه , طيب ليه منعملهاش احنا بنفسنا فى البيت بنفسنا , اتفضلى يا ستى الشرح بالكامل
الوصفات دى محتاجة لبن طبعا وكتيرمننا بيشترى لبن وبعدين يلاقيه قطع بمعنى
انه تخثر وراب بقى زى الزبادى كدا وناس بترميه بس انا باعمل منه كذا حاجة
معجنات وجبنة وكيك وبشاميل
خلينا الاول اقولك علشان تتجنبى الموضوع دا تعملى
ايه اول ماتجيبى اللبن اغليه على طول فى لبانة تكون ناشفة مفيهاش مية ولومش
متاكدة من مصدراللبن ومش عاوزاه يقطع يبقى خدى معلقة كدا وسخنيها على
النار غلى وكان حلو على خيرة الله اغليه
ولو قطع يبقى سيبيه زى ماهو فى
اللبانة على الرخامة يوم او اتنين فى الشتا لو فى الصيف يوم ودخليه التلاجة
هتلاقيه بقى زى الزبادى كدا تمام او سخنى طاجن فخار فى الفرن وحطى اللبن
فيه وسيبيه فى الفرن لومحتاجة لبن حليب ضرورى واللبن اختبرتيه لقيتيه هيقطع
لو اتغلى هاتى شوية كربوناتو على طرف المعلقة الصغيرة وقلبيها فيه واغليه
هتلاقيه رجع حليب تانى ومش هيقطع عن تجربة والله متخافيش بس ميكونش كمية
كبيرة وهتغليه مرة تانية لان مع كترالغلية لونه بيتغير ويصفر كدا عندنا اللبن القاطع
طريقة عمل الجبنه الريكوتا والفرق بين الجبنه القريش والجبنة الريكوتا
هى الجبنة القريش بس بدون ملح دا ابسط تعريف ليها تمام ودى اسهل طريقة كمان وبتستخدم لحشو اللازانيا والكانيلونى والسمبوسك وممكن التشيز كيك كمان بسيطة وسهلة خالص هتاخدى اللبن الزبادى دا وتحطيه فى شاشة تحتها مصفاة وسيبيه يصفى المية اللى فيه
اللى هى الشرش بلغتنا تمام وبعدين شيليها بعدساعة كدا بحيث يكون لسه فيها سائل مانشفتش خالص وحطيها فى علبة تلاجة واستخدميها فى اى وصفة زى ماقلنا
طريقة عمل الجبنه الفلاحى بالتفصيل
طبعا
بتتعمل فى الفلاحين دايما وبيستخدموا لها حصيرة بس طبعا لانها مش متوفرة
هنا فانا استخدمت حصيرة السوشى او بيسموها حامل السخن ودى جبتها من رنين ب5جنيه وهتلاقيها فى اى
محل ادوات منزلية
ولو مش موجودة ممكن تحطى الجبنة فى اى قالب عندك ياخد شكل
وخلاص ممكن قالب الانجلش كيك مثلا
اول طريقة
بتتعمل بمنفحة بس طبعا مش كل الناس هتلاقيها تمام
تانى طريقة
بالخل بتجيبى اللبن وقبل مايغلى بشوية تحطى لكل كيلو لبن
معلقة خل وتقلبيها هتلاقيه فصل منك والدسم بقى فوق الوش هتنشليه وتصفيه
بشاشة وتحطيه فى الحصيرة
اما الاسهل طبعا طريقتى دى
تالت طريقة
هتاخدى بقى الجبنة الريكوتا اللى عملناها دى
اوالزبادى بعدمااتصفى وتحطيها فى الحصيرة بتاعتنا
وتلفيها كدا رول كانك بتعمليها ساندوتش
وتحطى تحتها طبق كبير علشان الشرش ينزل فيه
وفى الصيف بادخلها التلاجة ولوالجو برد باسيبها على الرخامة عادى
تقريبا 5ساعات كدا هتلاقيها زى الفل
دى كدا جاهزة خلاص يدوبك ترشى شوية ملح حسب رغبتك وذوقك
وطبعا دى جميلة جدا للى بيعمل دايت وممكن تضيفى فلفل اخضر او حامى او زيتون مخلى اى اضافات تحبيها وبالف هنا وشفا
تعليقات
إرسال تعليق