طريقة عمل القطايف فى البيت بكل تكاتها

طريقة تحضير قطايف رمضان

النهاردة هنعمل مع بعض القطايف فى البيت علشان تبقى موجودة معانا طول السنة مش فى رمضان بس

 انا باعملها فى اى وقت وباعمل كميات طبعا علشان اهادى الحبايب واللى بيتبقى بافرزة لاى وقت عاوزين حاجة حلوة والظروف مش مناسبة انزل او جالى ضيف فجأة وطبعا طول رمضان الشربات معمول وجاهز فى التلاجة للكنافة والقطايف والجلاش
القطايف لها طرق كتير جدا على فكرة
فى بدقيق بس وفى ناس بتضيف دقيق سيمولينا
وفى ناس بتعملها بلبن حليب او لبن بودرة
وكمان ا لحشوات وطرق التقديم اكتر
ودا جزء منها مترتبطيش بالشكل التقليدى بتاعنا نوعى زى ماتحبى

قطايف بالمكسرات،قطايف بالتمر،قطايف بالكريمةوالمكسرات،قطايف بالقشطة ،قطايف عصافيرى بالقشطة والفستق الحلبى ،قطايف بالجبنة ،قطايف بالموز ،قطايف بالتفاح والقرفة ،قطايف بالشيكولاتة

نسم الله 

المقادير
3كوب دقيق ابيض
او 2ونص ابيض ونص كوب دقيق سيمولينا
3 كوب ماء دافىء
قطعة خميره بيرة فى حجم عين الجمل
او 2معلقه صغيره بيكنج بودر
معلقه صغيره سكر
ربع معلقه ملح
معلقة كبيرة نشا
الحشوات

مكسرات 
تمر
كريم شانتى

قشطة
جبنة
لحمة معصجة

موز

تفاح وقرفة

نوتيلا

طريقةعمل عجينة القطايف خطوة خطوة

سهلة جدا جدا مفيهاش اى صعوبة ولا كلاكيع
الاول لو هنعملها بخميرة بيرة يبقى هندوبها بمعلقة السكر فى المية الدافية لحدماتتفاعل وتعلى
ولو هتعمليها ببودر او خميرة جافة يبقى اخلطيها مع الدقيق
وبعدين هتجيبى دورق الخلاط او اى طبق بلاستيك عندك والويسك اليدوى
وتضيفى كل المكونات على بعض الاول المكونات الجافة
الدقيق الابيض والسيمولينا والملح والنشا ولو تحبى تضيفى معلقة لبن بودرة اوك 

وبعدين تنزلى عليهم بالمية وتضربى كويس لحدمايبقاش فيه كلاكيع وتنزلى بالخميرة
لو هتعمليها بالمضرب اليدوى ابقى صفيها فى اى مصفاة علشان تتاكدى ان الدقيق داب ومفيش كلاكيع
تضايقك او ممكن تضربيها فى الخلاط احسن طبعا 

وبعدين صبيه فى طبق وغطيها وسيبيها تخمر شوية 

 تعرفى ازاى انها جاهزة هتلاقيها حجمها زاد وفى فقاقيع على وشها كدا

 

هتهبطى خمرها شوية يعنى تحركى الخليط كدا بالمضرب او معلقة بحيث تخرجى الهوا منها وحجمهايقل

تبقى تمام نتوكل على الله ونجيب طاسة تيفال سميكة او سيراميك زى بتاعتى دى

هى المفروض بتتعمل على صاجة زهر

المهم عندك اختيارات كتير فى طريقة الصب بقى
يااما بكبشة او كوباية او قمع زى دا 

 

او براد او اخر حاجة عجبتنى وباعملها علشان البهدلة
ازازة من اللى بنحط فيهم الكاتشب رخيصة جدا على فكرة 

ونمسح الطاسة بمنديل فيه زيت او فرشاة سليكون وننزل بالقطايف
واعملى الحجم اللى يعجبك كبيرة متوسطة صغيرة 

وبعدين لماتلاقى فى فقاقيع على وش القطايف يبقى هى كدا تمام وزى الفل والعجينة ناجحة لقيتها متماسكة وملساء تبقى لسه عاوزة تخمرتانى شوية 

اول ماتمسك وتصفر من تحت شيليها على طول قبل ماتحمر علشان متنشفش منك ومتعرفيش تقفليها

 وطلعيها على قماشة نضيفة ا وفوطة وسيبيها تتهوى شوية

وبعدين جهزى الحشوة اللى تعجبك 

واحشيها وقفليها كويس من الاطراف علشان متفكش فى الزيت منك
لو تحبى تفرزيها شيليها كدا قبل السوا

لو هتاكليها بالف هنا وشفا يبقى تحمريها فى زيت غزير واول ماتحطيها وطى النارشوية وطلعيها لماتحمر 

مقادير الشربات

 2كوب سكر ناعم 

1كوب مية

 معلقة عصير ليمون

فانيليا(اختيارى)

معلقة سمنة بلدى (اختيارى)

كبشين قرنفل (اختيارى)

عودقرفة  (اختيارى)

معلقة عسل جلوكوز  (اختيارى)

ولماتهدى نزليها فى الشربات الباااااااااارد وطريقته هتلاقيها بالتفصيل لوضغطتى على الصورة دى 

تكات مطبخ ام عمرو خالد لنجاح القطايف
فى ناس كتير بتشتكى من ان القطايف بتكون طرية لوقعدت واحناطبعا اتعودنا تكون مقرمشة او ناشفة اوووى
لو التزمتى باللى هاقوله دا هتدوقى احلى قطايف
1-القطايف لازم تتعمل وتتحشى فى نفس اليوم
2-القطايف لو هتجيبيها من بره اختارى اللى فيها فقاقيع وخروم كتير دا دليل انها خمرانة كويس
3-لو لقيتيها ملساء كدا ومفيش فيها خروم اوعى تجيبيها ولا ببلاش دى ناقصة خمر وهتبقى ناشفة لما تحمريها
4-خلى بالك القطايف متكونش مكشوفة ولا واخدة هوا علشان هتجلد منك لازم تكون متغطية
5-جبنا القطايف او عملناها خلاص وهنقليها الزيت لازم يكون غزير ومقدوح كويس مش بارد علشان هتشرب زيت وتبقى طرية
6- اول ماتحطيها النارعالية هدى النار وسيبيها لماتتحمر من ناحية وبعدين اقلبيها
7-متستعجليش فى التحمير لازم تكون لونها احمر علشان تبقى مقرمشة
8-لما تطلع صفيها من الزيت وخليها تهدى شوية متنزليهاش الشربات وهى سخنة ولسه طالعة من الزيت علشان متبقاش طرية
9-الشربات لازم يكون تقيل مش خفيف ومايكونش ساقع من الثلاجة الافضل يكون دافى او بدرجة حرارة الغرفة (لو فى الثلاجة نطلعه قبلها بساعة علىى الاقل)
10-لماتنزلي القطايف فى الشربات سيبيها أقل من دقيقة وبعدين ارفعيها فوراً لو سيبتيها كتير حتبقى طرية

• ا11-لو كنتى هتعملى القطايف بنفسك فى البيت متضيفيش لبن حليب او بودرة لان اللبن بيخلى اى عجينة تبقى طرية وكدة مش حتقرمش