طريقة عمل شربات الحلويات

طريقة تحضير الشربات لكل الحلويا ت الشرقية

 طبعا يا جماعة اى حلويات شرقى عندنا بتحتاج شربات او قطر او شيرة زى ما اخواتنا العرب بيسموه وفى ناس كتير مبتبقاش عارفة هل هو المفروض يكون تقيل ولا خفيف بارد ولا سخن فانا هاحاول ابسط الموضوع خالص لاى حد حتى لو مبتدئة فى المطبخ هتطلع الحلويات زى الفل ان شا ءالله 

انواع الشربات والمناسب لكل نوع حلويات

الشربات عندنا نوعين ياجماعة تقيل وبارد ودا بنستخدمه للكنافة والجلاش والبقلاوة وكل واشكر وصوابع زينب وبلح الشام والزلابية او لقمة القاضى او العوامة مهماكان اسمها عنداخواتنا العرب 

تمام كدا الشربات هيكون بارد والحلويات دى سخنة  

اما الشربات بتاع البسبوسة والروانى دا بيكون خفيف وسخن دا عكس كل اللى فات طبعا 

 طريقة تحضير القطر او الشيرة

 بصوا بقى خلونا نتفق مبدئيا كدا ان دايما الشيفات او اى حدبيوصف ويعمل الشربات بيبقى له مقدارين واحد للخفيف وواحدللتقيل بس انا بقى باريح دماغى واعمل نوع واحد بس واطلع منه التانى بدال وجع الدماغ هههههههههههه

 

 الشربات الخفيف 

 1كوب سكر ناعم 

1كوب مية

معلقة عصير ليمون او ملح ليمون

فانيليا(اختيارى)

معلقة سمنة بلدى (اختيارى)

كبشين قرنفل (اختيارى)

عودقرفة  (اختيارى)

2معلقة عسل جلوكوز  (اختيارى)

الشربات التقيل 

 2كوب سكر ناعم 

1كوب مية

 معلقة عصير ليمون اوملح ليمون

فانيليا(اختيارى)

معلقة سمنة بلدى (اختيارى)

كبشين قرنفل (اختيارى)

عودقرفة  (اختيارى)

2معلقة عسل جلوكوز  (اختيارى)

الطريقة سهلة خالص مالص بدون كلاكيع  

هتحطى السكر والمية على النار ومتعليش عليهم النارتكون متوسطة 

وخلى جنبك فرشاة مبلولة مية علشان لوفى سكر جه على جناب الكسرولة او الحلة امسحيه بيها وميتحرقش 

وبعدمايغلى ضيفى بقى المنكهات بتاعتنا لو تحبى القرنفل والقرفة ولماتلاقى السكر داب خالص اعصرى الليمونة عليه وقلبى وضيفى عسل الجلوكوز بيدى له تقل وسمك حلو اوى

ييجى 5دقايق او اقل حسب ماتلاقيه بقى يطلع فقاقيع كدا ويلف معاكى وقرب يستوى 

اطفى عليه ولوتحبى ضيفى فانيليا او ما ء ورد او ماء زهر براحتك

ومعلقة سمنة بلدى بتدى له تست عالى اوووى 

 وهتلاقى قوامه كدا

فى حاجة بقى اناباعمل الشربات بالطريقة الاولى يعنى خفيف ولومحتاجاه لبسبوسة او روانى باستخدم جزء منه واسيب الباقى ع الناريغلى لحدما المية تتبخر منه شوية ويتقل يبقى انا كدا عملت نوع واحد بس وطلعت منه التانى 

وطبعا فى رمضان باعمل كمية يعنى كيلو سكر مثلا واشيله فى برطمان ازاز واطلعه استخدمه كل يوم لمايخلص اعمل تانى وهكذا بيسهل عليكى الامور اوى 
بالنسبة للشكوى الدايمة من الشربات انه بيسكر دا لان حضرتك قلبتيه وداغلط هو السكربيدوب لوحده 
الشربات والكراميل مبيتقلبوش ياجماعة ولو حطيتى عسل الجلوكوز زى ماقلت لك ان شاء الله مش هيسكر وكمان هيبقى تقيل وقوامه مظبوط جدا جدا والاهم مش مسكر وزى بتاع الحلوانى تمام 
بالنسبة لعسل الجلوكوز اللى البنات سالت عليه فى جروبنا  على الفيس 
اناباستخدم نوع مش غالى اسمه فرست ب15جنيه من عندالعطار او اى هايبر هتلاقيه