الحمام المحشى فريك والارز

شرح عمل حمام محشى فريك بالصور

السلام عليكم ورحمته وبركاته

اهلا يا بنات النهاردة هنعمل حمام محشى
بالتفصيل وخطوة خطوة

الحمام بيتعمل بكذا طريقة مشوى او طاجن مع الرز المعمر
او مع الخضار فى الفرن اما المعتاد عندنا فهو المحشى سواء رز او فريك

المقادير

حمام حسب عدد الافراد

رز او فريك للحشو

(كل حمامة لها ملو كفة ايدك )

بصلتين متقطعين مكعبات

طماطماية مكعبات

كبد وقوانص

او لحمة مفرومة

سمن او زبدة

معلقتين قشطة لوعندك

فصين مستكة

ورق لورى

حبهان

ملح

فلفل

خطوات تحضير الحمام المحشى ارز او فريك

ودى الطريقة بالفيديو اتمنى تنوروا القناة

الطريقة

طبعا الحمام هنجيبه متنضف بس هنعيد عليه تانى اذا كان فيه ريش
ولا حاجة من جوه ونسلك بين الجلد واللحم علشان نحشيه
ويتغسل كويس بالملح والدقيق من بره ومن جوه ونشطفه

ونخرط بصلة وعليها ملح وفلفل اسود وندعكها علشان تنزل ميتها

ونتبله بيها من جوه ونخليه على جنب على ما نحضر الحشوة بتاعته

تحضير حشو الفريك
هننقى الفريك كويس ونغسله كذا مرة وننقعه فى ميه حوالى ربع ساعة
ونسيح معلقتين زبدة او سمنة بلدى وننزل عليها بالبصل ونشوحه شوية
ونضيف له الكبد والقوانص او اللحمة المفرومة وتتقلب لحد ما تستوى نص سوا
ونضيف لها الفريك ننشله من الميه بالراحة واخر جزء ياريت ميتحطش لان
غالبا بيكون فيه رمل ويتقلب مع الخلطة ونضيف له ملح وفلفل والطماطم
وشوية مية ونغطى الطاسة لحد ما يتشرب المية ويدخل فى السوا

تحضير حشو الارز

نغسل الرز ونصفيه ونسيح معلقتين زبدة وننزل عليها بالبصل ونشوحه شوية
ونضيف له الكبد والقوانص وتتقلب لحد ما تستى نص سوا ونضيف لها الرز
ونشوحه كويس علشان يبقى مفلفل ونضيف له ملح وفلفل وشوية مية بسيطة
مش كتير علشان لسه هيكمل سوا فى الشوربة
ونغطيه برضه لحد ما يتشرب المية

وبكده يكون جاهز اللى تحب تزود بهارات عادى بس انا احط ملح وفلفل بس
ولو تحبيه دسم اكتر وطعمه يكون مميز ضيفى للرز معلقتين قشطة وقلبيه هتسيح من السخونية ويبقى مالوش حل

على فكرة الحشوة طعمها جميل الولاد بياكلوها ويسيبوا الحمام علشان كده باعمل كتير وباسويه لوحده

طريقة الحشو الحمام بالفريك

انا عادة باشتغل بايدى بس علشان الحشو سخن هنجيب معلقة شاى صغيرة
وناخد بيها الحشو ونحشى الحمامة من جوه

وبعدين نحشى بين الجلد واللحم بالشكل ده ومتكبسيهاش اوى علشان الفريك
ياخد راحته والجلد ميتقطعش منك
نفس الحكاية مع حشوة الرز مع اختلاف بسيط انك هتحشيها من جوة لحد النص بس
علشان الرز بيزيد لما يستوى وبحط راس الحمامة او بصلة صغيرة فى الاخر علشان تحجز الرز
وميخرجش منها

طرق تقفيل الحمام المحشى بالفريك او الارز

الطريقة الأولى

انا طبعا بحب اكتف الطيور بالطريقة المعتادة
ازاى بتاخدى رجل الحمامة اليمين وتدخليها فى الفتحة دى
وبعدين الرجل التانية

الطريقة التانية

هنعمل لها عملية جراحية بتقفليها بخيط ابيض وابرة وهنحط الرجلين على بعض كده ونربطهم بالخيط

الطريقة التالتة

هنجيب خلة الاسنان ونقفلها
ودى مبفضلهاش الا اذا كنت هاسويه فى الفرن اما لو هتسلقيها فى الحلة
فالخلة ممكن تشك الحمامة اللى جمبها وتتفتح والحشو يخرج منها
نسقطه فى مية مغلية ونضيف له البصل والفلفل وورق اللورى والحبهان
والمستكة واى توابل تحبيها ونسيبه على نار متوسطة لحد ما يستوى ونوارب
غطا الحلة علشان ميفرقعش مننا

هتعرفى ازاى انه استوى هتمسكى الجناح او الرقبة وتحاولى تكسريه لو اتكسر
معاكى بسهولة يبقى كده تمام

هننشله من الشوربة ونحطه فى مصفاة علشان نتخلص من الشوربة الزيادة
اللى فيه فلما نحمره ميعملناش مشاكل لاقدر الله

اما التحمير يا اما زيت او سمنة بلدى اللى يريحك
وهتحمريه فى طاسة غويطة وتقفى بعيد علشان لو فيه شوربة او طالع منه رز ولا فريك هتلاقيه بيفرقع فى الزيت فخلى بالك ولما تيجى
تقلبيه على الناحية التانية ياريت تهدى النار خالص او تشيلى الطاسة من على النار واقلبيه ورجعيها تانى
ولو حصل والزيت طرطش على ايدك الحقيه بشوية دقيق فى كيس من الفريزر هتلاقى اللسعة خفت وما سابتش اى اثراانا دايما حطاه فى الفريزر للطوارىء او مرهم ميبو دا تحفة للحروق برضه
طبعا بعد ما يتحمر هتشدى الخيط او تشيلى الخلة قبل التقديم متفضحيناش يا جميل قدام سى السيد
ودا شكله لما اتحمر دا لما باكون مستعجله باحمره فى الزيت