طريقة تفصيص الرمان بسهولة
فوائد الرمان للصحة العامة
الرمان من الفواكه المفيدة جدا للكبار والصغار
يكفى انه اكترغذاء يحتوى على مضادات الأكسدة 3أضعاف الشاى الأخضر ودا معناه ايه دايعنى انه مفيد جدا فى حالات خفض الوزن لان مضادات الاكسدة بتعمل على سرعة حرق الدهون وزيادة معدل التمثيل الغذائي
والاهم انه له دور كبير جدا فى مجال مكافحة مرض السرطان اللهم احفظنا وعافينا فهو بيعمل على قتل وتثبيط نمو الخلايا السرطانية والإبقاء في نفس الوقت على الخلايا الأخرى السليمة بالجسم.
مفيد جدا جدا للحامل لانه بيزود كمية الاكسجين الواصلة للجنين فبيحمى الطفل من العته وطبعا بيوفر فيتامينات أ , ج وعنصر الحديد المهم جدا طبعا فى الحمل والكالسيوم
وكمان بيعمل على الوقاية من مرض هشاشة العظام بالذات للسيدات كبار السن
وبيساعد فى خفض ضغط الدم المرتفع
يعمل عصير الرمان على تقليل مخاطر مرض السكري بالإضافة إلى مخاطر الإصابة بالأمراض المصاحبة للسكر مثل تصلب الشرايين
الرمان من المطهرات الطبيعية للكبد لأنه ينقي الكبد والدم والأمعاء وبيقلل من الغازات والشعوربالانتفاخ
حتى القشر له فوايد كمان انا بانشفه واشيله وباستخدمه فى حاجات كتيركنت باطحنه وباضيفه لاعشاب تخسيس
ومفيد لقرحة المعدة يااما يتطحن ويتحط على اللبن ويشرب صبح وليل او يتحط معلقة على كوباية زبادى والتهاب اللثة والاسنان
او تغلى القشر سليم ويتشرب بيقضى على ديدان البطن
والمغلى دابرضه بيستخدم فى تثبيت لون الحناء على الشعر اعجنيها بيه
فيه مواد قابضة علشان كدا بيستخدم فى وصفات التضييق
طبعا بعدكل الفوايد دى لازم نستغل موسم الرمان وناكل على قدمانقدر
وكمان ممكن يتخزن تفصى الكمية اللى تحبيها وتحطى لها شوية سكر وفرزيها فى الفريزر ولما تطلعيه اعصريه بيبقى حلو جدا
معلش اعذرونى على الرغى الكتير دا بس الرمان مظلوم معانا شوية فقلت لازم تعرفوا قد ايه هو مفيد جدا
النهاردة هنتعلم ازاى نفصص الرمان بطريقة سهلة وسريعة
وكمان ازاى نعمل عصير رمان بيور وفريش فى البيت احسن من بره 100 مرة طبعا
طبعا الاول هنجيب الرمان ونغسله كويس علشان التراب والميكروبات
ومش شرط الرمان يكون لونه احمر من بره علشان يبقى حلو واحمر من جوه على فكرة
انا من ساعة مااتجوزت اتهريت تفصيص رمان بطريقة بشعة ومن كتر حبهم فيه مبنشتريش بالكيلو بنجيب كرتونة او قفص مرةواحدة واعيش بقى ههههههههه
اناباعمله بكذا طريقة بس دى اسهلهم
المهم هتمسكى الرمانة وتقسميها بالعرض كدا
وتجيبى طبق غويط تحطيه تحت ايدك زى كدا وتخبطى بضهرالسكينة عليها
وتفتحى صوابعك شوية من تحتها علشان الرمان اللى هينزل فى الطبق
بس خلاص مفيش نص دقيقة هتلاقى الرمانة كلها اتفصصت
والطبق اتملى وبالف هنا وشفا
احنا بناكله كدا لانهم بيحبوه مزز لو تحبى تضيفى له سكر ومية اوك
طريقة تانية
تانى طريقة بقى للناس اللى بتحب تاكل الرمان مباشرة مش متفصص هتجيبى الرمانة كدا
وبعدين تفتحيها من فوق بالشكل دا
وتشيلى الحتة دى
وبعدين بالسكينة تمشى مع خطوط الرمانة البيضا كدا
وبعدين تشيلى الحتة اللى فوق دى هتلاقى كل الابيض اللى بين الفصوص طلع معاكى بسهولة
وتفتحيها زى البرتقالة كدا وبالف هنا وشفا
شرح طريقة عمل عصيرالرمان
هتجيبى الرمانة بالشكل دا تمام
وتدوسى عليها بايدك رايح جاى على الرخامة لحدماتبقى طرية تحت ايدك
والفصوص اتهرست وطلع منها العصير اللى جواها اوك
تجيبى شوكة زى دى وتخرمى بيها الرمانة من جهة واحدة خرمين تلات
وتجيبى كوباية مية وتحطى عليها الرمانة بالشكل دا
وتضغطى عليها بالشكل دا هتلاقى العصير بينزل منها خليكى وراها لحدما تلاقيها خلا ص
مبتنزلش اى سائل
ويااما تشربيه كدا بيور واحنا عادة بنحبه كدا
ويدوبك بس باحط تلج عليه او اسيبه يسقع فى التلاجة
الشكل النهائى لعصير الرمان الفريش
او تضيفى له سكر و يبقى نص الكوباية مية والنص عصير
وبالف هنا وشفا
انا مبافضلش خالص اعمله فى العصارة او الخلاط لانه بيكون لونه مش احمر زى لونه الطبيعى وكمان بيبقى فيه سنة مرارة علشان البذر اتخلط معاه
لو عندك عصارة فواكه صلبة زى التفاح والاناناس ممكن تستعمليها لو مش عجباكى الطريقة دى او عصارة البرتقال العادية خالص بتاعتنا
تعليقات
إرسال تعليق