تحضير الشاورجل فى البيت بمنتهى السهولة
السلام عليكم ورحمته وبركاته
استكمالا لسلسة بدايل المنتجات او تصنيع المنتجات والمنظفات فى البيت
بدال مانشتريها جاهزة النهاردة هنعمل الشاورجل اوصابون الاستحمام السايل
بطريقة تانية اسهل من اللى قلناها قبل كدا لان فى ناس مش عارفة تجيب الخامات
هنستخدم صابون وش اى نوع او ممكن بواقى الصابون كمان
الخامات
صابونة دوف او اى نوع
معلقتين نشا
ازازة مية ورد
ازازة جلسرين
زيت عطرى فل اوورد
طريقة تصنيع شاور جل بالصور والخطوات
الطريقة مفيش اسهل من كدا
هتاخدى الصابون دا وتبشريه بمبشرة انا مخصصاها ليه طبعا مش للاكل
ودا علشان يدوب بسرعة ومياخدش وقت تمام كدا
وهنحط لتر مية ونحط عليه ازازة مية الورد وفي حلة عالنارلحد ما يغلوا وبعدين ننزل عليهم بمعلقتين نشا مدوبين في ربع كوب مية ونقلب لحد القوام ما يبقى لزج شوية وبعدين تضيفى الصابون المبشور وتقلبى
لو لقيتيه سايل سيبيه شوية هتلاقيه ابتدى يتقل ويبقى له قوام متماسك كدا
ولو لقيتيه تقيل هتزودى مية وتقلبى تانى لحدمايفك ويبقى قوامه مناسب
دلوقتى بقى حطى اللون اللى يريحك انا حطيت برتقالى
هتضيفى شوية شوية لحد ماتلاقى السمك بتاعه بقى تمام لاتقيل ولاخفيف
طيب لو خفيف زودى بشر صابون و لو تقيل زودى مية لماتوصلى للسمك اللى عايزاه
اضافة الرائحة المميزة للشاور
اخر حاجة ضيفى الريحة اللى تحبيها اناباعمل فل اوياسمين اوخوخ او تفاح اولافندر تحفة
او فراولة اللى تحبيه حسب ذوقك لوفراولة هتحطى لون احمرطبعا
هو كدا تمام اوووى بقى جاهز للاستعمال عاوزة تزودى حاجة لزيادة الترطيب حطى معلقتين جلسرين مع انه مش محتاج لان صابون دوف فيه ربع كريم مرطب اصلا
بعد كدا باصبه فى اى شفشق عندى واعبى بيه الازايز
ياخراشى على جماله دامش شاور داعصيرمانجه ههههههههه
بعد مايبرد خالص تجيبي كل ازايز الشاور والشامبو الفاضية وقمع بلاستيك وتعبي الازايز
بس طبعالانى باعمل كتير فباحطه فى جركن زى دا
والف مبرووووووك عليكى شاور رخيص وريحة حلوة حسب ذوقك وكمان بيفتح علشان ا لنشا وينعم ويرطب علشان الجليسرين وينضف علشان الصابون
احسبيها بقى صابونتين دوف او كامى بكام و2جنيه معطر بس خلاص
اظن مفيش ارخص من كدا والاهم احلى واصح من كدا
عملنا شاور رخيص وسهل وبخامات متاحة وموجودة و الاهم بالريحة اللى انتى عاوزاها وكمان هتتجنبى اضرار الكيماويات وهتستفادى من الترطيب والنعومة والتبييض كمان
لان الجلسرين بينعم الجسم جدا
تعليقات
إرسال تعليق