سر بصل الكشرى المقرمش

بصل الكشرى المقرمش زى بتاع بره 

صباح الفل عليكم

النهاردة هاقولكم

ازاى تعملى بصل مقرمش وكرسبى للكشرى 

او اى اكلة محتاجة بصل محمر

اللى خلانى فكرت اعمله موضوع مستقل عن الكشرى ان لقيت ناس كتير بتسأل عليه والاغرب لقيت اخت بتقول انا باعمل الكشرى بس باشترى البصل من بره طبعا انا كبهير انبهرت جدا ههههههههه

لانه مش قصة ولا صعب خالص

المهم انا هاوريكم ازاى يطلع زى بتاع المحلات ب3طرق سهلين خالص مالص 

مقادير تحضير بصل الكشرى زى المحلات

بصل

زيت غزير

معلقتين نشا

معلقتين دقيق

رشة ملح

طرق عمل بصل الكشرى بالصور

الطريقة الاولى 

بصوا بقى علشان البصل يكون مقرمش معاكى يبقى تقطعيه رفيع مش تخين يا بايدك يا بالكبة اللى يريحك

وتقطعيه مكعبات عادى زى بتاع التقلية او جوليان يعنى جوانح انا باعمل الاتنين عادى 

اناهنا قطعته بالكبة لانى عملت كيلو ومفيش وقت بقى لامسحى دموعك يا امال

تمام كدا رشى عليه شوية ملح وسيبيه دقيقة كدا فى مصفاة

وبعدين سخنى زيت غزير متستخسريش مش هنرميه متخافيش ههههههه

وانزلى بالبصل 

وحمريه لحدما يوصل للون الدهبى الجميل بتاعنا دا

طلعيه فى مصفاة سلك او الومنيوم اللى عندك وسيبيه يتصفى من الزيت ويتهوى

اوعى تطلعيه على مناديل هيشرب الزيت اللى ينزله ويبقى طرى 

شايفة عامل ازاى ماشاء الله انايوم الكشرى دا بيبقى يوم عالمى باعمل حلة كبيرة ماشاء الله واهم من الكشرى البصل ولادى بيحبوه جدا وانا كمان باحمر كيلو بحاله ههههههههه

الطريقة التانية 

تانى طريقة هتقطعى البصل وترشى ملح وكمان دقيق 

وتخلطيهم كويس كدا وسيبيه دقيقة برضه 

ونفس الطريقة بتاعتنا زيت غزير ويطلع على مصفاة 

الطريقة التالتة

زى الطريقة اللى فاتت بس هنستبدل الدقيق بالنشا 

والبصل مكعبات المرة دى 

ايوا شايفاكى ورا يالى رافعة ايدك وتقولى ايه يعنى البصل مش قصة يعنى 

اصبرى على هانزلك سرالصلصة كمان وبعدها الكشرى ولماتجربيه بالتكات بتاعتى اوعدك هتنسى عنوان محل الكشرى والله 

ادى طبق تصبيرة لما اخلص الموضوع كله 

يارب اكون عرفت افيد ولو جزء بسيط جدا منكم ومش طالبة غير دعوة بصلاح الحال وهداية ولادى