طريقة عمل الرز بلبن

رزبلبن ولا اروع لاتقولى مالكى ولاغيره

 النهاردة وصفتنا بناء على طلب ناس كتير من حبايبى فى الجروب بتاعنا على الفيس 

الرزبلبن  واناباعمله بطريقة مختلفة شوية عن الوصفة التقليدية بتاعتنا

فى ناس بتسلقه فى مية وبعدين تضيف اللبن بس انا مبحبهاش خالص لانه كدا رزمسلوق وعليه لبن طعم اللبن مبيبقاش باين اوى اماطريقتى هتلاقى الحباية متشربة لبن من جوه وكمان بيدوب فى البق وطعمه كريمى خالص

كفاية رغى بقى ونخش فى المهم 

الطريقة بالتفصيل والتكات 

1كوب رزمصرى

2معلقة سمن بلدى او زبدة

 مستكة

2كيلو لبن مغلى

فانيليا اوماء ورد او ماء زهر

سكرحسب الرغبة

2كيس لبن نيدو

او فنجان قشطة

او كيس كريم شانتى بودر

او كيس ايس كريم فانيليا

للتزيين

مكسرات مجروشة

فاكهة مشكلة

شيكولاتة

مربى او صوص فراولة

الطريقة بالتفصيل والتكات والحركات

طبعا استغربتوا المقادير العجيبة المريبة دى سمنة ومستكة وكريم شانتى حاجات غريبة طبعا

بس خليكوامعايا للاخر وهتدوقوا احلى واطعم رزبلبن فى حياتكم داوعد منى

 

نبتدى بسم الله هنغسل الرز مرة واحدة بس علشان النشا اللى فيه متنزلش ولو اكياس وضامنة نضافته ممكن ميتغسلش اصلا

وبعدين نسيح السمنة 

وفيها المستكة لازم كدا لان المستكة لو اتحطت فى سائل مبتسيحش وتلزق فى الحلة حتى لو تيفال لو الحبة كبيرة اطحنيها الاول

المستكة دى ياجماعة مستوردة من اليونان تحديدا جزيرة خيوس وبتيجى بالجرام على فكرة الكيس فيه 10 جرام ب20جنيه يعنى الكيلو ب2000جنيه لواقل من كدا حضرتك دى مغشوشة وش كداايوا مغشوشة متقاوحيش 

وبعدين ننزل بالرز ونشوحه كأننا هنعمل رزمفلفل 

لحدماتلاقى كل رزاية اتغلفت خلاص بالسمنة والمستكة واتشربت النكهة 

تنزلى بقى بكبشة لبن واحدة وتقلبى لحدماالرزيتشربها 

تزودى واحدة تانى وهكذا لحدمايستوى الخطوة دى مهمة جدا

 ولو مكسلة اومفيش وقت يبقى تحطى نص كمية اللبن وطفى عليه النار وسيبيه نص ساعة كدا هتلاقيه اتشرب كل اللبن وتقريبا استوى 

هنابقى تدوبى اللبن النيدو وتضيفيه او الكريم شانتى او الايس كريم الموجود عندك 

وتقلبى لما الرزيلف معاكى

وبعدين السكريدوبك تقليبتين وخلاص يسيح متخليهوش كتيرعلى النار علشان الرزميصفرش منك

وبعدين الفانيليا او ماءالورد

لو مش عاوزة تضيفى نشا وهو اصلا مش محتاج خلاص لو عاوزة تكترى الكمية يبقى هتزودى مثلا كوبايتين مية باردة ونشا متدوبة فيها وتضيفيها عليه قبل السكر

الطريقة دى مباحتاجش احط قشطة خالص وطعمه كانه غرقان قشطة والله لان اللبن النيدو والكريم شانتى بيدوا نفس الطعم والنتيجة

والتزيين براحتك بقى اى حاجة تحبيها اناعن نفسى باكله سادة لان طعمه كدا اجمل بكتير

بس طبعابانوع كل مرة مكسرات 

 او فاكهة

  او حتى شيكولاتة بيضاء بابشرشوية عليه وهو سخن تسيح 

او قرفة اوكاكاو

او مربى فراولة او صوص فراولة بس تقللى السكرفيه وهوبيتعمل

طبعا وكل واحدة حسب ذوقها

ها كفاية كدا ولاعاوزين تانى يلا مش خسارة فيكم انتواحبايبى برضه

وطبعا لازم يبرد شوية قبل مايتحط فى التلاجة وكمان لازم يتغطى علشان ميكرفش منها

فى حاجة اخيرة لوبتحبى جوزالهند حطى ربع كوباية مع اللبن وهوبيغلى بيدى له نكهة حلوة اوى 
طبعا اللى هتقولى الطريقة متعبة ومكلفة هاعلقها فى النجفة هههههه لان علبة الرز بلبن عندى ب3جنيه حضرتك والمقادير دى بتعملى ييجى 15علبة يعنى حسبة 45جنية وطبعا لو شنقونى مش هاشترى بالمبلغ دا رز بلبن يعنى واناكله موجود عندى اللى هاتكلفه اللبن والنيدو ودول تمنهم 18جنيه بس

ياريت الوصفة تكون عجبتكم وامانة اللى تطبقها تقول رايها ايه او تنزل الصور