طريقة عمل الصابون السايل( بديل البريل)

تصنيع صابون غسيل المواعين 

ازيكم يابنات استكمالا لسلسلة بدايل المنتجات وتصنيع المنظفات 

النهاردة هنعمل حاجة مهمة جدا ومنقدرش نستغنى عنها خالص 

وهى الصابون السايل او صابون المواعين زى ماناس بتسميه  

هنعمله فى البيت بطريقة سهلة وبسيطة واقتصادية

 مش هاقدر اوصف لكم جماله ولا توفيره ولا نضافته والاهم الامان طبعا 

لان فى ناس بتعمله وتلاقيه يااما مبينضفش يااما بيسود الايد ويعمل حساسية 

انا هنا بقى هاعلمكم ايه الاسباب للمشاكل دى وتتحل ازاى 

الخامات اللازمة

1كيلو سالفونيك شفاف 10جنيه
1/2 كيلو تكصابون (رغوة صابون )7جنيه
1/4 كيلو صودا كاوية سائلة 2جنيه
او قشور
ورقة الاختبار ph نص جنيه
جليسرين 1جنيه(اختيارى)
ريحة ليمون او خوخ او تفاح او نعناع 1جنيه(اختيارى)
لون احمر او ازرق او اصفر 1جنيه (اختيارى)
جردل بلاستيك
معلقة خشب او ايد مقشة
6ونص لتر مية

مقادير لعمل 4لتر فقط 

4لتر ماء

125 جرام سالفونيك

75ج تكسابون

7جرام صودا سايله

10ج تايلوز

3معالق كبار ملح  

اى ريحة ولون تفضليها

طريقة تحضير الصابون بالتفصيل

 خلينا نتفق على كام حاجة قبل مانشتغل
السلفونيك اناباشتغل بالفاتح بنى او عسلى غامق كدا هتلاقى فى  اغمق عادى مفيش مشكلة اختلاف موردين

السالفونيك هو المادة الفعالة والاساسية الاولى فى صناعة الصابون وليس لها بدايل حتى الان 

التايلوز فى المقدار التانى هنستخدمه كمغلظ وله بدايل كتير زى البولي أو سي ام سي لكن التايلوز هو أفضل مغلظ و التايلوز الالمانى من أفضل الأنواع

 الصودا الكاوية واسمها العلمى  هيدروكسيد صوديوم ياريت تكون سايلة علشان متتعبيش وانتى بتدوبيه وياخد وقت السايل اسهل وبينجز معاكى  بس لو مفيش وجبتى القشور حطي شوية مية فى كوباية بلاستيك وحطيهاعليها بس خلى وشك بعيد وانتى بتحطيه وسيبيه واخرجى خمس دقايق يهدى وترجعى تقلبيه هتلاقيه داب خلاص 

دى الريحة

دى ورقة المعادلة ph ب7جنيه وفيها 20 واحدة وبتتباع الواحدة بنص جنيه بس ودى مهمة جدا للشغل بتاعنا 

هتجيبى واحدة و قطعيها رفيع خالص كذا حتة علشان هنحتاجها كتيرنعادل بيها لحدمانوصل للمعادلة المظبوطة 

 

الادوات زى ماقلت بلاستيك وخشب اوعى تستخدمى حاجة معدن علشان الصودا متتفاعلش معاها

1-هتاخدى التكصابون ودا اللى بيدينا الرغوة بتاعة الصابون وتدوبيه بايدك فى لتر ونص مية 

مهم جدا بقى الطريقة  اللى هتدوبيه بيها متعصريهوش بايدك هياخد وقت ويغلبك لمايدوب 

امال نعمل ايه هتفردى كف ايدك زى كدا بطريقة أفقية وتدوسى عليه لتحت بطريقة دائرية وبالراحة خالص علشان ميعملش رغوة جامدة ويضايقك

هو معلش هياخد وقت لانه تقيل زى الجل كدا فلازم تدوبيه وميبقاش فيه كلاكيع خالص واحنا فى الشتا اصلا فى الصيف بيدوب اسرع وممكن تسيبيه للصبح فى المية يدوب براحته

بعدفترة هتلاقى حجمه قل وداب معظمه واتبقى جزء بسيط زى دا كدا 

 

خليكى وراه لحدمايدوب خالص علشان ميبقاش الصابون فيه كلاكيع
وعندك طريقة اسهل من كل داخالص هتضيفى شوية ملح على التكصابون وتقلبى هيدو ب ويحل معاكى بسرعة بس فى الحالة دى هنستعمل تايلوز كمغلظ ومتخن والطريقة تحت

2-وبعدين نضيف السالفونيك ونسيب منه قدمعلقة صغيرة ممكن نحتاجها بعدين ونقلب فى حركات دائرية واتجاه واحد  وسيبيه حوالي ساعتان أو ثلاثه علشان تتاكدى انه داب كويس

3-وبعدين نضيف الصودا الكاوية ونسيب برضه معلقة كدا احتياطى ونقلب تانى برضه هتلاحظى ان الجردل سخن منك علشان المواد دى حمضى وقلوى واتفاعلت مع بعض متقلقيش خالص

 

 وهتلاحظى انه تقل معاكى عن الاول 

 4-هاتى بقى ورقة الاختبار واغمسيها فى الصابون وشوفى لو اتغير لونها للون لون احمر يبيقي السلفونيك زيادة ومحتاج يتزود صودا حطى نقطة وقلبى

5-واختبريها تانى لو اداكى لون ازرق او اسود يبقي الصودا زيادة ومحتاج يتزود سالفونيك زودى برضه نقطة وقلبى 

ومتزهقيش خليكى وراه نقطة نقطة كدا 

لحد ما تلاقى لون الورقة بقى اخضر او اصفر زى ماهو مااتغيرش يبقى احنا كدا تمام والمعادلة مظبوطة ونسبة السالفونيك متعادلة مع نسبة الصودا

 

 عارفين بنعمل كدا ليه اقولكم بقى لو كمية الصودا كتير اللى هيستخدمه هيلاقيه بيلسع فى الايد وممكن يعمل حساسية كمان وحرق لاقدرالله 

ولو كمية السالفونيك اكترهتلاقى ايدك بتقشر لان كمية الحامض كبيرة 

6-هتسيبي الجردل يهدى بقى ساعتين تلاتة حسب الجو وتضيفى 5 لتر مية وتقلبى عاوزة تزودى المية ويبقى خفيف براحتك الخامات دى لو عاوزاه زى اللى بره خفيف هتعملك 10 كيلو او اكتر
7-سيبيه تانى بعدماضفتى المية هتلاقيه تقل معاكى هوكدا تمام عاوزة تضيفى لون اوكى  دوبى اللون فى كوباية مية وضيفيه عليه علشان ميكلكعش 

انا اللون كان خلص عندى عملت بيه شاور ودا اللينك لودوستى على الصورة هتلاقيه بالتفصيل 

عاوزة تضيفى ريحة ماشى 

عاوزة تضيفى حليسرين علسان ميبوظش ايدك مش هيضر يا مزة
8- لو مش لاقية ورقة الاختبار مفيش مشكلة خالص المقاديردى بالمسطرة ودايما بتظبط معايا

 شايفين جماله وتقله ازاى عسل نحل مش صابون ههههههههههه

 وطبعا اللون حسب راحتك

 الخامات دى عملت الكمية اللى قدامكم دى 4جراكن حوالى 12كيلو

 وانا باستخدمه باخففه بمية وخل وكربوناتو (بيكربونات الصوديوم اوصودا الخبز اوبيكنج صودا دى كلها اسماء ليها)
وملح ليمون اللى هى الخلطة بتاعتنا

 موجودة فى الصورة دى 

طريقة تانية باستخدام التايلوز

هنجيب المية وعليها الملح ونقلبه كويس لمايدوب وبعدين نضيف التايلوز واحدة واحدة علشان ميكلكعش منك 
وتقلبى بعدها تضيفى التكصابون وهتلاحظى انه بيفك اسرع لان الملح والتايلوز بيسهلوا دوبانه 
بعدها تضيفى الصودا  السايلة وقلبى والسالفونيك اخرحاجة وبعدين اللون والريحة اللى تحبيها 
الطريقة دى ميزتها انها سهلة وسريعة جداجدا مش هتاخد 5دقايق والله 
وبعدالتصنيع هتلاقيه عمل حوالى 5لتر مش 4 كمان وهنا مش هتحتاجى ورقة المعادلة لاننا عاملينه مظبوط بالجرامات ان شاء الله 

تطبيق الغالية Om Youmna Hopa على صفحتنا على الفيس 
لوصفة الصابون السايل والبرسيل جل  برافووووووو عليكى حبيبتى الله ينور تسلم ايديكى الحلوين 

اهو دا الشغل ولابلاش ياجماعة والله الموضوع سهل جدا وموفرجدا جدا كمان

لويااجماعة حد عمل صابون وبعدمدة لقاه خفيف يزود له فى الازازة ساعة الاستخدام ملح طعام او ملح ليمون بيتقله اوى وفى مواد لو تعرفى تجيبيها بتدى تقل ولزوجة اكتر مادة اسمها Cmc او تزودى تكصابون او بولى وعندك معزز للرغوة لو تحبى تضيفيه اسمه kdكمبرلان ولو استخدمتى تايلوز ممكن تضيفى معاه ملح انجليزى سلفات ماغنسيوم وهو البديل للملح العدى بتاعنا اللى هو بيستخدم فى اللزوجه والتتقيل للصابون لان كلوريد الصوديوم بيخلى الصابون مغبش ومش رايق ولوقعدفترة بيرسب تحت

اماكن بيع الخامات 

الخامات دى متوفرة عند اى حدبيصنع منظفات وهتلاقيهابالجملة فى شارع الجيش باب الشعرية  وفى شركة النصرتبع الجيش ومحلات جملة وقطاعى كمان وعندكم العتبة

-2-من شركه الزهور فى دار السلام عند المترو وتركب من شارع ابو طالب الى مواصله فايده كامل وتقوله انزل شركه الزهور ماشى وهتلاقى هناك كل حاجه من المنظفات موجوده جمله وقطاعى

  3-من المنصوره ودى تجيبها من عطارة النقيطى اللى فى الشيخ حسانين  او عند عطارة ابراهيم سليم اللى هيا فى اخر شارع الجلاء قبل بوابه تربيه بتاع جامعة المنصوره تمام

 4- اللى جنبها اى فرع لكلية الزراعة تسال هناك او اى فرع لشركة للموادالكيماوية  

 5-اللى قريبة للمطرية تشوف عند اولاد غيتة ممكن تلاقى