طريقة عمل بيتى فور زى المحلات

طريقة عمل بيتى فور زى المحلات


استكمالا لملف حلويات العيد النهاردة هنعمل البيتى فور الدايب دوب بالمكنة والمرة الجاية هنعمله بكيس الحلوانى ان شاء الله 


عملناالغريبة قبل كدا وجبت لكم كل التكات اللى تخليها دايبة زى المحلات والحمدلله ناس جربتها كتير وعجبتها لوتحبى تشوفى الطريقة اضغطى على الصورة دى 


البيتى فور مش قصة يابنات والله والمقادير مش هى السبب فى انه يطلع حلواو وحش على قدماهى بعض تكات بسيطة وصغيرة بتفرق فى النتيجة 

فانا هاقولك المقادير بالمظبوط بس الاهم من المقادير التكات اللى هاقولها لو التزمتى بيها هتديكى شغل عالى جدا زى المحلات ان شاء الله



لمشاهدة الوصفة بكل التكات

2 كوب دقيق حلويات
1 كوب زبدة حوالي 200 جرام من التلاجة
تلت كوب سكر بودرةاو نصف حسب رغبتك
1 صفار بيضة
فانيليا
نقطتين خل
ذرة ملح
ربع معلقة صغيرة بيكنج بودر(اختيارى)
2معلقة كاكاو خام 
للتزيين:
مربي مشمش اوفراولة اللى تحبيه 
فسدق حلبى او شوكولاتة خام 
او شوكولاتة فرماسيل
جوزهند مكسرات 
فواكه مجففة .

البيتى فور المظبوط جدا جدا



نضرب السكر مع الزبدة كويس جدا 


لحد ما تبقى كريمى كدا زى مابتعملى التورتة الاسفنجية


بعدين نضيف صفار البيضة مع الفانيليا والخل 


واخيرا الدقيق المضاف اليه البيكنج بودر شوية شوية 


نعجنه لما تتكون عجينة ناعمة وملساء طرية بس مبتلزقش فى ايدك


ولو عاوزة جزء بالكاكاو نضيف 2معلقة كاكاو خام الي جزء من الخليط ونشيل نفس المقدار من الدقيق


ولو لقيتي الخليط ناعم وسايح ومش عارفة تشكليه لان الجو حر  غطيه ودخليه التلاجة شوية  وطلعيه اشتغلي بيه هتكون الزبدة مسكت وبقى كويس 
وبعدين نشكله بمكنة البيتى فور زى دى فى منها نوعين بلاستيك والومنيوم


وبتعمل كذا شكل جمال جدا


هنا هتلاحظوا فى مقاسين للبيتى فور لوضغطتى ع المكنة مرة واحدة بتطلع المقاس اللى فى النص دا امالودوستى مرتين بتخليها اتخن زى اللى بره دى


لوعاوزة الشكل دا بتجيبى عجينة بيضا وسودا بالكاكاو وتلفيهم اسطوانتين جنب بعض بالطول وتحطيهم فى المكنة هتطلع البيتى فور نص ابيض ونص اسود كدا بيبقى شكله حلو اووووى 




ونرصه فى الصاج وبيتسوى على طول مبيقعدش 
ينسخن الفرن علي 200 درجة وندخله وننزلها ل180 درجة بس ويخرج بمجرد انه ياخد لون ذهبي من تحت متسيبيهوش كتير علشان مينشفش المفروض ميحمرش خالص 
طلعه علي طول ومتحطيش ايدك عليه غير لما ينشف عشان ميتكسرش
سيحى الشيكولاتة على حمام مائى 


وتلزقى كل اتنين في بعض بيها او بالمربي وزينيه بالفسدق او بالشوكولاتة الفرماسيل 

الطريقة دى باعملها من سنين حتى انا اللى عملت بيتى فور الفرح بتاعى هههههه


تكات لنجاح البيتى فور وسر نعومته 

1-لازم يكون السكر ناعم جدا مفيهوش اى حبيبات او كلاكيع علشان كدا بننخله الاول قبل مانشتغل
2-السمنه او الزبدة تكون فى التلاجه متكونش سايحة ونضربها كويس مع السكر لما يدوب خالص لانه لو ما دابش كويس ها يخلى البيتى فور يفرش وكمان يلزق فى الصاج
3- حاولى على قد ماتقدرى متستخدميش مضرب الكهرباء مدة طويلة فى عمل البيتى فور يدوبك دقيقتين بس كفاية لانك مش عايزة يدخله هواء ويصبح نافش زى الكيك
4- استخدمى صفار البيض بس مش البياض لان البياض بينفش البيتى فور وينشفه ويبقى شبه البسكوت واحنا عايزينه دايب وناعم
5- متزوديش مقدار البيكنج بودر عن ملعقة صغيرة لكيلو الدقيق وممكن نستغنى عنها خالص مش مشكلة لو هتستخدمى بياض البيض او البيضة كاملة 
6- ياريت تستخدمى الزبدة بدلا من السمن بتدى نتيجة افضل بكثير

7-لوهتعمليه بسمنة مفيش مشكلة خالص بس فى حاجة هنستخدم البيضة كاملة مش الصفاربس لان صفار البيض بيدي نعومة لكن البياض بينشف شوية عشان كده لازم تستخدمي البيضة كاملة في حال هتستخدمي سمنة لأن السمنة بتخلي العجين يفرش والبياض بيلمه 

8-  عجينه البيتى فور مش طريه اوى ولا ناشفه اوى لازم تكون  متماسكه علشان نقشتها تبقى ثابته 
9-ما نعجنش خالص لمانضيف الدقيق يدوب نجمع العجينه عشان لو اتعجنت ممكن السمنه تفصل بعد كده عن العجينه ونزود دقيق حسب ما تحتاج العجينه فى ايدينا
10- ما تزوديش دقيق كتير قوى لحد ما العجينه تلم زى ماقلت لك هتحسيها فى الاول انها طريه شوية متخافيش سيبيها ترتاح شويه وتشرب السوائل والسمنة تجمد وهتلاقيها بقت متماسكه اكتر من الاول لاننا لو زودناها دقيق كتير من الاول وسيبناها ترتاح ممكن نلاقيها جبست وبقت ناشفه
ومش ها تمشى كويس فى الماكينه وتطلع عين اهلك لمؤاخذة وتقعدى تدعى على ههههههههه
11-بعد التشكيل نخلى بالنا نسيب فراغات بين البيتى فور عشان هيزيد حاجة بسيطة مش اووى 
12-لو لقيتي البتيفور نئ من جوه او فيه فراغات يبقى عجنتي كتير فعمل عرق او عليتي عليه النار المفروض في البتيفور بتحطي الدقيق وتلمي العجينه دون عجن
13-لما تيجى تسويه هنجرب واحدتين الاول ونشوف ظهر البتى فور لو فيها ثقوب او فرشت وشكلها النقشه مش ظاهره تبقى عايزه رشه دقيق كمان ويدوبك العجينة تلم متعجنيش علشان ميعملش عرق
14- واحنا بنختبره  لو لقتيه ناشف وجامد وانتى بتكليه ومش ناعم يبقى تضيفى شويه زبده سايحه صغيرين على العجينة  لحد ماتلاقى العجينه بقت لينه اكتر فى ايدك وتجربى تانى لو لقيته فرش يبقى عاوز دقيق ضيفى معلقة معلقة وهكذا لان لوالدقيق عرقه قوى بيحتاج زبدة اكتر
15-بعدالتسوية البيتى فور او البسكويت فرش منك دا له كذا احتمال يااماالسكر كتير يااما السمنة كتير على الدقيق يااما الفرن مااتسخنش الاول ودرجة الحرارة مش مناسبة لو هادية هيفرش ولوعالية هيتحرق طبعا لازم تظبطيها كويس 
16-لو بعدالتسوية طلع ناشف ومش دايب يبقى ناقص زبدة اوسمنة 
17- لما تطلعيه من الفرن متلمسيهوش قبل ما يهدي شويه لانه بيبقي ناعم و ممكن يتكسر بسهولة
18-يفضل انك تزينيه اول باول متزينيش كل الكمية مرة واحدة لانه هياخدرطوبة ويطرى طبعا 

يارب تكون الوصفة عجبتكم

ودا تطبيق اختى وحبيبتى فى جروبنا على الفيس أم زياد تسلم ايديها الحلوين 


تعليقات