طريقة عمل البصل والتوم البودرة فى البيت

اعملى البصل والتوم البودرة بكل سهولة

النهاردة هنتعلم ازاى نعمل البصل والتوم البودرة فى البيت بكل سهولة 

ومش هنتكلف اى حاجة خالص طبعا لانه موجود فى البيت اصلا

تعرفوا سعر البصل والتوم البودرة من عندالعطار كام مبلغ وقدره 

اخر مرة سألت عليه كان ب40 جنيه تخيلوا 

وانا بحب استعمله كتير وكدا ميزانية تانية لوحده

نخش على المفيد بقى

انا باعملهم بطريقتين اختارى اللى يعجبك وهما الاتنين حلوين مفيش اى مشكلة خالص ولا اى فرق غير فى اللون بس يعنى اللى هتجففيه فى الفرن بيكون اغمق من اللى فى الشمس

 طريقة تجفيف البصل

هتجيبى يا ست الكل البصل وتقطعيه شرايح خفيفة جدا ياتقطعيه حلقات وتفصليها عن بعض او تاخديها من قصيرها وتقطعيه فى الكبة زى كدا 

 

وبعدين تفرديه على صينية اوشبكة عندك اللى يريحك وبعدين تغطيه بشاشة خفيفة علشان التراب والحشرات وتحطيه فى البلكونة

وكل يوم تقلبيه لحدماميته تتبخر خالص وتلاقيه بقى ناشف  

تاخديه وتفرميه فى المطحنة او الهون المتاح عندك مفيش مشكلة

 وبعدين تشيليه فى اى برطمان ازاز عندك ويفضل يكون صغير على قدالكمية علشان يفضل محتفظ بريحته الجميلة وياريت تحطيه فى التلاجة زيه زى اى توابل مطحونة لو الجو حر 

والطريقة دى طبعا لازم تكون فى الصيف علشان تكون الشمس حامية ومياخدش وقت 

طيب لو الجو برد وشتا ومفيش شمس اصلا منعملش ونشترى لاطبعا ياحلوة انتى عاوزة تهربى والسلام وبتستسهلى هههههههه مش هاديكى الفرصة دى أبدا 

المهم هنعمل ايه بقى هتاخدى البصل دا اللى قطعناه وتحطيه مفرود فى صاج فرن وتولعى الفرن على درجة حرارة متوسطة اوهادية كمان يكون احسن علشان ياخدوقته وميتحرقش منك نقول تقريبا 150 تمام كدا وبعدين كل شوية بصى عليه وقلبيه لحدالمية اللى فيه ماتتبخر وتلاقيه بقى ناشف زى الشيبسى كدا هو هياخد تقريبا ساعة او اقل على حسب سمكه وبعدين طلعيه يبردخالص  وافرميه فى المطحنة او الهون برضه  

معلش بقى الصور مش موجودة بالتفصيل مكنتش محضرة للموضوع بس جالى طلبات كتير للطريقة فقلت اعمل موضوع وخلاص  

طريقة التوم البودرة  

طريقة تجفيف التوم هى هى برضه طريقة البصل ياجماعة مفيش اى اختلاف خالص 
غير ان ممكن تضيفى له رشة ملح بسيطة لوتحبى قبل ما تجففيه باى طريقة من الاتنين اللى فوق
المرة دى بقى فى صور مش زى اللى فات أى خدمة هههههههههه
لو التوم كبير يستحب تقطعيه شرايح طولية او عرضية اللى يريحك
ولوصغير واحجامه مقاربة لبعض خلاص سيبيه مفيش مشكلة الغرض من الخطوة دى انه يستوى مع بعضه ومفيش حاجة تتحرق 

 شايفة درجة اللون دى اللى عاوزينها يكون لسه لونه مدى على اشقراوبنى فاتح مش غامق علشان ميبقاش لونه غامق لو هتستعمليه فى سلطات او صوص وكمان ميكونش طعمه مر

وبكدا بقى عندك احلى وانضف واوفر توم وبصل بودرة بطريقة سهلة خالص ومش مكلفة اصلا تقدرى بيهاتستغلى التوم لو قرب يفضى اوالبصل هيزرع ووفرتى كتيرجدا كمان واوقات تكونى محتاجاه ومش لقياه أصلا

استخدامات البصل والتوم البودرة

خلصنا كدا والحمدلله ييجى السؤال البديهى بقى هنستعمله فى ايه ؟
 بصى ياست الكل دا بيستخدم فى جميع انواع التتبيلات بتاعة اللحمة والفراخ المشوية والكنتاكى والبانيه والبفتيك والكفتة والحواوشى والشيش طاووق والشاورمة طبعا والسلطات والصوصات التومية والبشاميل وعجينة البيتزا والكشرى والمحشى كمان يعنى اى حاجة قدامك محتاجة بصل او توم