طريقة تخزين وحفظ التوم باكثر من طريقة

تفريز التوم وتخزينه 

  التوم من الحاجات المفيدة جدا جدا واللى بنستخدمه تقريبا يوميا فى الاكل

وفى ناس بتحب تخزنه او تفرزه علشان يكون سهل الاستخدام وتوفروقت لوبتشتغل 
النهاردة هاوريكم تخزينه وحفظه وتفريزه بكذا طريقة واللى تعجبك استخدميها 

حفظ التوم بالطريقة التقليدية 

ودى كلناعارفينها طبعا انك بتجمعي شوية حلوين مع بعض وتربطيهم بقماشة او حبل وتعلقيهم فى البلكونة بعيد عن الشمس المباشرة علشان ميتسلقش ويبوظ 

والطريقة دى عيبها ان منظره مش حلو طبعا ومش اى حديقدريعمل كدا وكمان مع الوقت بيفضى اوبيزرع 

واحنا علشان نتجنب المشكلة دى او على الاقل نقللها يبقى وانتى بتشتريه تنقى التوم اللى راسه مش كبيرة هاتيهامتوسطة او صغيرة احسن لانها بتقعدمدة اطول من الكبيرة 

وكمان تنقى التوم اللى له شراشيب من تحت وفيه طينة كمان لانها بتعزل الراس عن الهوا فيقعد اكتر 

اما بقى قصة توم احمر ولا ابيض مش هتفرق هماالاتنين واحد نفس القيمة الغذائية 

بس الابيض دابلدى والاحمر صينى فانتى لو هتفرزى هاتى الابيض ولو هتنشفى صحيح يبقى الاحمر لانه بيقعدفترة اطول 

انا عادة مباستخدمش التوم كتير فى الاكل يدوبك فصين وخلاص علشان كدا مباجيبش كتير كبيرى 10 كيلو لوناشف زى دا و15 لواخضر 

دااختى ضفرته بالشكل دا بيبقى شكله اجمل لمايتعلق 

ولو حصل ولقيتيه قرب يفضى قشرى اللى تقدرى عليه واعمليه توم بودرة زى دا لو عاوزة الطريقة دوسى على الصورة

 

توضيح هام جدا بخصوص تفريز التوم

طبعا فى ناس كتيربتحب تفرز التوم او تخزنه زى مابنقول وطلعت اشاعة مؤخرا ان دا غلط وبيسبب السرطان والعياذ بالله لانه لمابيتفرز بتنمو بكتريا تفرز سم خاص بيها  بيحمل خلايا سرطانية والانسان لماياكل بيتسمم ويموت بالسكتة القلبية او السرطان والعياذبالله 

وبعدبحث شديدفى الموضوع توصلت الى الاتى والكلام على عهدة استاذ ميكروبيولوجى اغذية 

ان البكتريا علشان تكون جراثيم وتتكاثر لازم تكون درجة الحرارة لاتقل عن 3 او 4 مئوية فتنمو وبعدين لماتلاقى درجة حرارة مناسبة من 35 الى  59

بتتحول الجراثيم الى خلايا خضرية وبعدين تتكاثرالبكتريا وهكذ وطبعا درجة حرارة الفريزر تحت الصفر من -4 الى -18مئوية 

واصلا هى مبتتكونش فى التوم المفرز ولوفرضنا جدلا ياستى حتى انه مصاب بالبكتريا دى 

 برضه مفيش قلق خالص لان التوم هنضيفه لاكل بيتسوى على درجة حرارة عالية جدا ودا كفيل انه يقضى على اى بكتيريا وجراثيم لواتعرض لدرجة حرارة 85 لمدة 5دقايق بس واظن كل اكلنا بنطبخه على درجة حرارة اعلى من كدا بكتير بتوصل ل 120 فى قلي السمك مثلا 

معلش طولت عليكم بس كان لازم الرغى دا كله علشان الناس متصدقش اى كلام والسلام ونشغل مخنا شوية حتى لو مفيش امكانية نبحث عن صحة المعلومة 

تفريز التوم بطريقتين ولا اسهل

 انابافرزه بطريقتين سهلين خالص مالص 

الطريقة الاولى بافصص الكمية اللى اناعاوزاها وطبعاتقشيره سهل لانه جديد 

وباحطها فى كيس نايلون واقفله كويس واشيله فى الفريزر زى ماهو مفيش اى اضافات خالص ولما تحبى تستخدميه تاخديه وهو مجمد وتفرميه علشان لونه ميتغيرش ويصفر انا اصلا لانى باطبخ نى فى نى وبدون اى دهون خالص باحطه فى الخلاط مع الطماطم مش بادقه 

الحلو فى الطريقة دى انه بيبقى زى الطازة فعلا كشكل وطعم كمان ودا لان اى حاجة بتتقطع طبعا بتفقد جزء من فيتاميناتها 

تفريز التوم المفروم

تانى طريقة بقى اللى كلكم عارفينها 
بتجيبى التوم وهو اخضر علشان نستفاد بالعروق بتاعته ونستغلها 
 وطبعا باحاول لو فيه  روس صغيرة افرمها هى واسيب الكبيرة علشان لونشف مش هاعرف اقشرها اصلا وباخدهاوانضفها من بره كويس بالسكينة واشق الراس نصين علشان اطلع العود الرفيع اللي في النص دا كلنا عارفينه طبعا وباخد جزء من الاخضر كمان بيدي له ريحة جميلة

وعلي الكبة او الخلاط او مفرمة اللحمة اللي يريحك
وكل كيلو توم 
بياخد ربع كوباية زيت
و ربع ملح 
 ولحد مايبقي معجون او مفروم كدا وحطيه في عبوات بلاستيك او ازاز
متمليهاش اوى 

  او اكياس نايلون وتبططيه وتخرجى الهوا منه
وممكن تحطيه فى مكعبات تلج لومفيش عليه زيت اى حاجة يعنى يجمد وبعدين تشيلهم فى كيس 

ومتخافيش لا هيعمل ريحة ولا هيصفر منك ولا هيجمد 
ليه بقى لان الملح مادة حافظة والزيت هيعزله عن الهوا وهيخليه طري ميجمدش خالص لوقعدسنة اناوالله عندى بتاع السنة اللى فاتت زى الفل وريحته نفاذة كانه فريش 
ووقت ماتحبي خدي علي قدك منه ورجعيه تاني الفريزر 
والعلبة دى بقى الاخضر بتاعه وجبت معاهم فلفل حامى احمر وفرمتهم معاه وشيلته للبتنجان والطماطم المخللة او السمك والكبدة الاسكندرانى باطلع منه وادي له عصرة ليمون وكمون وفلفل بيبقى تحفة مالوش حل والله 
وابقى حطى قطعة فحم فى الفريزر علشان تمتص اى روايح برضه للتاكيد 

 اخر طريقة بقى لو مش حابة تفرزيه ولسه مقلقة وبرضه مش عاوزة تنشفيه فى البلكونة هاريحك ياستى والله متزعلى 
هنحفظه فى التلاجة مش الفريزر وهيقعدسنة برضه 
هتجيبى برطمان ازاز معقم طبعا وناشف مفيهوش نقطة مية وتحطى فيه التوم صحيح بعدالتقشير  
بس كدا لو هتستعمليه قريب لو هتخزنيه يبقى هتضيفى له زيت نباتى اى حاجة اللى يعجبك دوارالشمس زيت درة زيت زيتون زيت سمسم اى حاجة وتغطيه خالص بالزيت زى كدا 
طبعا لماتاخدى من البرطمان يكون المعلقة ناشفة برضه وكمان لوخلص التوم احفظى غيره عادى مفيش مشكلة 

طبعا اناشايفة الاخت اللى عاوزة تحدفنى بحاجة دلوقتى وتقولى خسارة الزيت باظ وهيترمى اقولك لا ياقطة ابسلوتيلى ههههه
الزيت دا احسن واحلى وافيد من التوم نفسه دا بقى هو زيت التوم اللى بيجيب من الاخر 
وهاقولك باعمل بيه ايه اى اكل فيه توم وهنستعمل له زيت باخد منه معلقة واستخدمه بدال الزيت النضيف ولنفرض طشة ملوخية او مسقعة او سبانخ اوبامية اى حاجة فيهاتوم ولو محطيتش توم خالص هو بيأدى الغرض 
وكمان دا تعملى بيه احلى حمام زيت لشعرك مالوش حل والله تحفة انا مجرباه بس لو متجوزة سربى جوزك عند اى حد لان ريحته كفيلة بانها تطفشه من الاوضة يومين تلاتة اللهم بلغت ههههههه 
هتجيبى الزيت دا وياسلام لو كان زيت زيتون اوسمسم وتغسلى شعرك بمية دافية بس علشان تفتح المسام وتمتص الزيت ودلكى شعرك وفروة راسك بيه والبسى عليه بونيه ويااما تشغلى الاستشوار عليه دقيقتين تلاتة كدا او تلفي فوطة مبلولة مية سخنة ومعصورة على البونية وكملى الشاور بتاعك واغسليه بعدكدا بالشامبو والماسك دا بيكثف الشعر ويقلل سقوطه خالص باذن الله 
عاوزة تزودى على الزيت دا زيت حبة البركة او زيت الخروع شغال مفيش مشكلة خالص 
اى خدمة بقى عدوا الجمايل قلبناها كوافير اهو