طريقة عمل صابون غسيل الايدين
السلام عليكم ورحمته وبركاته
استكمالا لسلسة بدايل المنتجات او تصنيع المنتجات والمنظفات فى البيت
بدال مانشتريها جاهزة النهاردة هنعمل صابون سايل لغسيل الايدين وداطبعا مبنستغناش عنه خالص اناهاعمله بطريقتى المعتمدة النهاردة وان شاء الله هاعمله بطريقة تانية اسهل وفى متناول ايدينا كلنا لو محدش قدريجيب الخامات المطلوبة بتاعته
الخامات والطريقة
الخامات المطلوبة
- نص كيلو تكصابون (رغوة صابون) 6 جنيه ونص
- ربع كيلو ملح شاور 2جنيه ونص
- لون 1 جنيه
- ريحة 2 جنيه
- جليسرين طبى 1جنيه
دا المعطر موجود عند اى حد بيبيع منظفات وبكذا ريحة اختارى اللى يعجبك انا باستخدم للصابون السايل بتاع المواعين ريحة التفاح والليمون او النعناع مناسبين اكتر
أما الشاور الخوخ والفراولة والفل والياسمين والعود وكاسيليا واللافندرتحفة بس مش بالاقيه دايما
ودا الشاور جل عملته ونزلته قبل كدا لوتحبى تشوفيه دوسى على الصورة
اماكن بيع الخامات
الخامات دى متوفرة عند اى حدبيصنع منظفات وهتلاقيهابالجملة فى شارع الجيش باب الشعرية وفى شركة النصرتبع الجيش ومحلات جملة وقطاعى كمان وعندكم العتبة
-2-من شركه الزهور فى دار السلام عند المترو وتركب من شارع ابو طالب الى
مواصله فايده كامل وتقوله انزل شركه الزهور ماشى وهتلاقى هناك كل حاجه من
المنظفات موجوده جمله وقطاعى
3-من المنصوره ودى تجيبها من عطارة النقيطى اللى فى الشيخ
حسانين او عند عطارة ابراهيم سليم اللى هيا فى اخر شارع الجلاء قبل
بوابه تربيه بتاع جامعة المنصوره تمام
4- اللى جنبها اى فرع لكلية الزراعة تسال هناك او اى فرع لشركة للموادالكيماوية
5-اللى قريبة للمطرية تشوف عند اولاد غيتة ممكن تلاقى 
طريقة عمل الصابون
الطريقة سهلة جدا جدا
اول
حاجة هندوب التكصابون فى 2لترمية
وهيكون شكله كدا هو مادة سايلة تشبه
الجيلى وقوامه تقيل جدا فى الشتا وهو دا اللى بيدينا الرغوة بتاعة الصابون
والافضل طبعا انك تنقعيه فى المية من الليل للصبح علشان ميتعبكيش بس انا عملته على طول
مهم جدا بقى الطريقة اللى هتدوبيه بيها متعصريهوش بايدك هياخد وقت ويغلبك لمايدوب
امال نعمل ايه هتفردى كف ايدك زى كدا بطريقة أفقية وتدوسى عليه لتحت بطريقة دائرية وبالراحة خالص علشان ميعملش رغوة جامدة ويضايقك
بعد فترة هتلاقى حجمه قل وداب معظمه واتبقى جزء بسيط زى دا كدا
خليكى وراه لحد مايدوب خالص علشان ميبقاش الصابون فيه كلاكيع
كدا بقى تمام خالص داب
لوعاوزة تنجزى وتريحى دماغك يبقى ضيفى الملح عالتكصابون وقلبى هيدوب فى دقيقة وخلاص
دلوقتى بقى والحاجة اللى هتدى تقل للصابون هى اضافة ملح الشاور
هتلاقى فى برودة اول ماتحطيها وايدك سقعت ممكن تقلبى بمعلقة او عصاية خشب
هتضيفى شوية شوية لحد ماتلاقى السمك بتاعه بقى تمام لاتقيل ولاخفيف
طيب لو خفيف زودى ملح لو تقيل زودى مية لماتوصلى للسمك اللى عايزاه
هنا ضيفى الريحة اللى تحبيها وكمان حطى اللون اللى يريحك انا حطيت اخضر
لانى هاعمله بريحة التفاح لحد هنا دا اسمه شاور هنضيف عليه جليسرين يبقى صابون للايدين
وطبعا توفيرا للوقت باعمل كمية كبيرة واقسمها جزء شاور والجزء التانى صابون
وبعدين باحطه فى الشفشق كدا واعبيه فى جركن واخدمنه جزء للاستخدام بتاعنا فى ازازة
الصابون بكمية اكبروبدون ملح شاور
لو مش موجود عندك ملح الشاور عادى هنعمله بملح طعام
يبقى مقاديرناهتكون
نص كيلوتكصابون
وكيس ملح كبير
لون
ريحة
100جرام تايلوز
وهندوب التكصابون بالملح وبحركات دائرية فى اتجاه واحد
وبعدها نزود مية بالتدريج ونستمربالتقليب برضه
وبعدين نحط الريحة
وبعدها اللون المقاديردى ممكن تعملى حوالى 12لتر
لوضفنالها التايلوز لانه مغلظ وبيدى سمك حلو اوى
وهتجيبى لترمية وتفتحى كيس التايلوز وتنزلى بيه واحدة واحدة وتقلبى كويس بحركة دائرية وفى اتجاه واحد علشان ميكلكعش اوعى تضيفيه مرة واحدة مش هتعرفى تحليه لو كلكع
المهم لماتلاقى الخليط بتاعنا بقى سميك وتقل
وبعدها التكصابون على التايلوز وتقلبى لحدمايمتزجوا كويس خالص وبعدين الملح وتقلبى لمايدوب وبعدها تزودى مية بالتدريج براحتك بقى وبعدها اللون والريحة وخلاص بقى جاهز وزى الفل
لو عاوزة حاجة تزود الرغوة وتدى له سمك كمان ممكن تضيفى kd ودا كيلوالتكصابون بيضاف له نص كيلو kd
تطبيق الاخوات فى جروبنا على الفيس
حبيبتى Zoma Mazona
تسلم ايديهاوعنيها عملت
الشاور
وصابون الايد السائل
والبرسيل جل
ودا نص كلامها حقها نفرح بيها ونشكرها ونشجعها
جزاك الله كل خير يا ام عمرو خالد لانك افدتينى انا وغيرى كتير
ربنا يكرمك ويرزقك كل ما تتمنى
تعليقات
إرسال تعليق