طريقة عمل مشروب العرقسوس

طريقة عمل عرقسوس مصرى

كل سنة وانتم طيبين ويارب ينعادعليكم بالخيردايما

طبعا رمضان ميحلاش من غيرالعصاير خصوصا فى الحر اللى احنافيه دا 

واكتر مشروب مشهور ومرتبط عندنا فى مصربرمضان هو العرقسوس (عرق السوس) واحنا بنعمله بكذا طريقة هاقولهم بس هاشرح الطريقة المشهورة والتقليدية بالصوريارب يعجبكم 

كوباية عرقسوس بودرة

نص معلقة صغيرة كربوناتو (كربونات الصوديوم)

3معالق مية 

احب اعرفكم على ضيفنا العزيز النهاردة وفوايده الكتير قبل مانتكلم هنعمله ازاى 

العرقسوس دايابنات عبارة عن مسحوق ناعم يشبه البودرة بيستخرج من جذور شجرة اسمها  السوس وداشكلها 

 ودا الجزء اللى هنعمل منه العرق سوس 

بيتطحن ويبقى بالشكل دا

وعندنا فى مصر انواع كتيرجدا بس مش كلها حلو فى انواع بيبقى فيها تراب وانواع مبتنزلش لون وبيبقى خفيف وهكذا اناباجيب من حراز حلو ومضمون 

 فوائد شراب العرقسوس 

1- يساعد على شفاء قرحة المعدة خلال عدة أشهر.
2- له أثر فعال في إزالة الام الحلق و الحرقة عند حدوثها .
3- يساعد على ترميم الكبد لإحتوائه على معادن مختلفة.
4- يدر البول.
5- يشفي السعال المزمن باستعماله كثيفا أو محلولاً بالماء الساخن،و لذا يفضل أستعاله ساخناً للوقاية من الرشح و السعال و أثار البرد.
6- يجلب الشهية باستعماله أثناء الطعام .
7- يسهل الهضم باستعماله بعد الطعام .
8- أفضل شراب مرطب للمصابين بمرض السكر لخلوه تماماً من السكر العادي .
9- منشط عام للجسم و مروق للدم .
10- يفيد في شفاء الروماتيزم لأحتوائه على عناصرفعالة .
11-يحتوي على الكثير من أملاح البوتاسيوم والكالسيوم وهرمونات جنسية ومواد صابونية .
12- يفيد في شفاء الروماتيزم لاحتوائه على عناصر تعادل الهدروكورتيزون ويساعد في تقوية جهاز المناعة في الجسم.
ينصح بعدم الاكثار من شرب العرقسوس للمصابين بارتفاع الضغط
• يزيل العطش و يستخدم فى علاج الكحة و طرد البلغم .
• مفيد فى علاج حالات قرحات المعدة .
• مفيد فى علاج حالات مرضى الكلى .

صدعتكم معلش بس كان لازم اقول فوايده علشان نهتم بيه بينى وبينكم اناباعمله حلو جدا وبيعجب كل البيت واللى ييجى عندنا لازم يطلبه منى ومع ذلك انا مفيش عماربينى وبينه دقته مرة وشكرا ههههههههههه

فى كذا طريقة زى ماقلت بس دى طريقتى المعتمدة اللى اتعلمتها من جوزى الله يخليه لى ويبارك لى فيه 

اول حاجة هنجيب العرقسوس 

ونحطه فى طبق او صينية ونرش عليه الكربوناتو مش كتير خلوا بالكم علشان بتخليه مر لو زيادة شوية صغيرين على طرف المعلقة بس 

ومعلقتين مية وتفركيه باطراف صوابعك لحدمايتشرب المية ولو عاوز حطى معلقة تانى بالتدريج بحيث يكون مفلفل مش معجن ومليان مية وادعكيه جامد بقى هتلاقيه بقى اغمق ومدى على بنى وصوابعك لونت كمان من الصبغة بتاعته 

وتحطيه فى الشمس ساعتين تلاتة او فى اى مكان جنبك بس انا بحب اعتقه فى الشمس

 وبعدين تجيبى شاشة بيضا او قماشة وعادة يعنى بتكون فانلة قطن هههههههههههه

المهم بتحطى طبق غويط وعليه مصفاة والقماشة دى والعرقسوس 

والتكة هنا بقى اهى جاية ركزى معايا هتجيبى المية الساقعة بتاعتك وبالدورق كدا بالراحة خالص تنزليها سرسوب صغير عارفة لمابتضيفى الزيت للبيض وانتى بتعملى مايونيز نفس القصة كدا 

 واحدة شطورة هتقولى هتقرفينا ليه ماندلق المية مرة واحدة اقولك لا ياقطة كدا حبيبتى مش هيديكى اللون بتاعه المظبوط احنابنستخلصه ع الهادى وكمان التراب اللى فيه كله هينزل فى الطبق  اقتنعتى ولا لسه ؟

وبعدين التكة التانية هتروحى شايلة القماشة وتجيبى الطبق بتاعنا 

وتصبى العصير دا فى الدورق بتاعنا من مسافة عالية يعنى قومى اقفى بعداذنك كدا ودا علشان ندربه كويس ونعزز النكهة ويديكى الرغوة المعروفة بتاعته

وبعدين من الدورق للطبق وهكذا مرتين تلاتة 

وكدابقى جاهز

  بالف هنا وشفا 

طرق اخرى لعمل العرقسوس

 فى طريقتين تانى لعمل العرقسوس يابنات 

اولهم انك بتفركيه بالمية والكربوناتو  بس متحطيهوش فى الشمس 

لا بتحطيه فى الشاشة اوالقماشة وتحطيه فى دورق مية وتبيتيه طول الليل لحدالصبح تلاقى اللون نزل وتاخديه تدخليه التلاجة يسقع بس كدا 

تانى طريقة شبيهة بطريقة التمرهندى كدا بتحطى العرقسوس والمية كتيير وكربوناتو على نار متوسطة لمدة 10 دقايق هتلاقى رغاوى طلعت على الوش شيليها وبعدين هدى عليه لمدة ربع ساعة هتلاقيه بقى نضيف وكل اللون نزل هتصفيه برضه وعلى التلاجة 

طبعا هو مسكر جدا مش محتاج يتضاف له سكر ياجماعة 

يارب يكون الموضوع البسيط دا عجبكم