طريقة عمل العيش الفلاحى

طريقة عمل العيش المصرى

النهاردة هنعمل العيش الفلاحى المصرى اللى قرب يندثر اصلا مش البيتى المرة الجاية هاعمل البيتى السهل خالص ممكن اى حد يعمله ودا توضيح صغير بس

بداية كدا مع انى اتربيت فى الارياف الا انى مااتعلمتش ولا خبزت رغيف هناك لما اتجوزت فى القاهرة اضطريت اتعلمه لان العيش كان استغفرالله العظيم غير آدمى بالمرة رمل تلاقى مسامير مفيش مانع خيط شغال حاجات تانية لا داعى لذكرها ميضرش هههههههههه

المهم العيش الفلاحى بتاعنا المفروض بيتحضر بخميرة بلدى مش بيرة ولافورية طبعا ودا بيكون احلى واطعم وكمان اطرى مينشفش منك والاهم من دا كله بيقعد مدة ومبيعفنش حتى لو ماحطيتهوش فى التلاجة

على ما اذكر الخميرة دى كانت بتتعمل من مية دافية ودقيق قمح ودرة وذرة ملح

وبتتعمل فى حاجة فخار اسمها شَالْيَة يارب تعرفووا تقروها انا شكلتها اهو تبقى شبه قصرية الزرع كدا ودى صورتها

وتتعجن تكون شبه سايلة زى عجينة القطايف كدا وبعدين تتغطى وبتتساب يوم كامل فى مكان دافى

وتجيبيها تعجنيها تانى او بمعنى اصح تهبطى خمرها وتسيبيها يوم كمان وبعد كدا تبقى جاهزة معاكى احلى خميرة طبيعية ملهاش حل والله
ودا موضوع كامل شامل عن تحضيرالخميرة منزليا وخميرة الحمص للفايش الصعيدى دوسى على الصورة 

وبعدين تضيفيها للدقيق والمية الدافية وتعجنى وخلاص وطبعا العجين بيكون كميات وفى ماجور الومنيوم او فخار احسن طبعا لو موجود

واكيد طبعا الفرن هيكون بلدى زى دا وعادة بيكون فى منه نوعين العادى دا بصاجة ودا للعيش البلدى العادى والبطاطى وعيش المكنة وتسوية الصوانى والطواجن وشوى السمك وتسوية الكحك والبسكويت وشوى الدرة

النوع التانى اللى جنبه دا بيبقى الارضية بتاعته بتكون مش صاج لا تقريبا فخار وتخينة جداعلشان ميوصلش الحرارة بسرعة والعيش يتحمص ع الهادى وبالذات العيش الملدن دا بيكون بدقيق الدرة وشبه العيش البتاو بتاع الصعايدة بس احنا بنعمله بدون حلبة

وبيولع بقى باى حاجة عندك جذور نبات القطن ودا بنسميه هندى او قش الارز او خشب رفيع او اوالح الدرة بعد مانفرطه ونعمله دقيق او الاحسن من دا كله أقراص الجلَّة لمؤاخذة لوتعرفوها انا مش هافسر طبعا هنا هههههههه

انا اضطريت استعير صور من النت علشان التوضيح بس لانى مش فى البلد علشان اصور الحاجات دى واللى اكيد مبقتش موجودة الا نادرا بعد ماالحكومة وفرت العيش الآدمى وبقى بييجى للفلاحين لحد الباب فطبعا شرا العبد ولاتربيته ههههههههه

معلش رغيت كتير اناعارفة بس دى أمانة لازم اقول كل اللى اعرفه

العيش الفلاحى بالخميرة البيرة

2 كيلو دقيق بلدى

معلقتين خميرة بيرة اوفورية

ذرة ملح

معلقة صغيرة سكر

مية دافية
ردة 

طبعا انا معنديش هنا دقيق بلدى اللى بنسميه دقيق غلة يعنى قمح فباحط دقيق درة معاه او ردة الموجود عندى

ودا ليه بقى لان الدقيق الفينو او الزيرو دا بينشف بسرعة وكمان مبيفردش معايا فى الرح

دوبى الخميرة والسكر فى شوية مية دافية صغيرين

وسيبيها لحد ما تتفاعل وتعلى بالشكل دا تبقى كدا شغالة وجاهزة

حطى الدقيق فى حلة او طبق بلاستيك وعليه الملح و شوية ميه دافية وتتزود بالتدريج لحد ما تتكون عجينة لينة نوعاما

ضيفى عليه الخميرة ولو فورية يبقى هتتضاف مع الدقيق بالاول وكملى عجن بقى لحد ما العجين يبقى له عرق يعنى بالاصح الدقيق يطلع الجيلوتين اللى جواه

وبعدين سمى الله واتشاهدى عليه وفى شوية كلام تانى كدا من التراث بنقوله هههههه وغطيه فى مكان دافى لمدة ساعة لو فى الصيف وساعتين لو فى الشتا ودى مرحلة التخمير طبعا

بعد كدا تقرصيه او تقطعيه يعنى علي ردة ناعمة او دقيق لوتحبى بس المفضل ردة بتخليه ميلزقش ويفرد معاكى وكمان الالياف اللى فيها مهمة جدا

والتقريص برضه له طريقتين يااما تبلى ايدك دقيق او مية اناعن نفسى باقرص بمية اسهل

واحب اوضح الخطوة دى بالراحة هتبلى ايدك مية زى ماقلنا او دقيق وتمسكى جزء من العجين دا قد كف ايدك وتحطيه على الصينية بس خلاص

طبعا الرغيفين الصغيرين دول بتوع ابنى لازم كل مرة اعملهم له يااما يقلب لى الردة ع العجين ويبوظه لى

هنابقى تيجى مرحلة تانية للتخمير او زى مابنسميها نسيبه يرفع لانك لوخبزتيه دلوقتى هيلزق منك وكمان مش هيتفرد اصلا

وهتلاقى العيش دا تماسك عن الاول وبقى ناشف شوية ودى ممكن من ربع ساعة لساعة حسب برضه درجة الجرارة

دلوقتى نيجى للادوات بقى اللى هنستخدمها المطرحة ودا شكلها

واكيد فرن واللى عندى فرن غاز مجلفن احسن نوع بقاله سنين شغال معايا كل حاجة عيش صوانى طواجن فطير بيتزا جلاش صوانى بشاميل وكيك كله وبيعمل معايا احلى واجب فى الافراح والعزومات وطبعا جنبى شوية مية وقماشة وسيخ حديد بنسميه عود باسخن الفرن وامسحه بالقماشة مبلولة مية علشان اهدى حرارته والعيش ميتحرقش منى واولع تحت والجناب

وبعدين احط الردة الناعمة على المطرحة والقط العيش يعنى اشيله من على الصينية واحطه ع المطرحة وأرح بقى فيفرد معايا

وبعدين هووووب على الفرن

هتلاقيه ابتدى يرفع ويقب كدا من الجناب وبعدين كله لو محصلش ورفع من جزء وجزء يبقى السبب يااما الفرن مش سخن كفاية او هو لسه ماخمرش كويس

ممكن تطلعيه قبل مايوصل لدرجة اللون دى عادى طبعا لوعاوزاه طرى بس احنابنحبه محمص وداشكله

ها ايه رأيكم بقى ؟

ودا اللى قرصته على دقيق

سامحونى بقى الصور قديمة لانى بطلت اخبز من مدة بس ان شاءالله هاخبز تانى وانزلكم غيرها