طريقة عمل كحك العيد سادة وبالعجمية

كعك العيد بالطريقة المصرية

كل سنة وانتم طيبيبن ياجماعة 

النهاردة هنعمل كحك العيد بتاعنا سادة وبالعجمية

هى المقاديرمفيهاش اى اختراعات يعنى ثابتة عند اى حد بس انا هازود بس التكات والملاحظات بتاعتى اللى هتديكى احلى كحك ان شاء الله ناعم ودايب لان زى مااتعودنا الفرق بيكون فى طريقة التطبيق للوصفة والالتزام بالتكات اكتر من مجرد مقادير مظبوطة 

كيلو دقيق
نصف كيلو سمنة سايحة افضل تكون بلدى
كوباية لبن دافى او مية او زبادى
ملعقة كبيرة بيكنج بودر 

 او قطعة خميرة فى حجم عين الجمل
100جرام  سكرناعم
ملعقة كبيرة ريحة كحك (اختيارى)
سمسم(اختيارى)

 مقاديرحشو العجمية 

كوب الا ربع عسل نحل
ملعقة كبيرة دقيق
ملعقة كبيرة سمنة او زبدة
مكسرات مقطعةاو مجروشة

اول حاجة هنجهز العجمية للحشو علشان تبرد والطريقة هتلقيها لما تدوسى على الصورة دى 

 الصورة مستعارة من النت لتوضيح الفكرة فقط

النهاردة هنعمله  بالطريقة التقليدية اناباعمله بطريقة تانية على البارد هانزلها برضه

العجن بقى هنجيب طبق كبير وواسع علشان تعرفى تبسى الكحك كويس فيه ونحط فيها الدقيق ونحط عليه المكونات الجافة(البيكنج بودر وريحة الكحك والسكر) ونقلبهم ونحط السمسم ونقلبهم كويس

(مهم جدا جدا نوع الدقيق اللى هنشتغل بيه لان فى انواع بتطرد السمنة وتخلى الكحك ناشف لانه دقيق قوى بتاع معجنات وله عرق مش للحلويات اناباستعمل فارينو دور او الضحى او شهد او الكوثر  )
بالنسبة لريحة  الكحك لو مش متوفرة عادى مش مهم دى طريقتها دوسى على الصورة 

لو هتعملي كيلو دقيق تحطي معلقه صغيرة بس متكتريش عن كدا خالص

 ونعمل حفرة فى النص وننزل على الدقيق بالسمنة السايحة

بس خلى بالك السمنة لازم تكون دافيه مش مغلية

عشان لو سخنة البيكنج بودر هيفسد ومش هينشط العجينة وكمان هيحمى على صدرك بعدماتاكليه

ونقلبها كويس اوى بايدينا لماتبرد شوية يعنى نبس العجينة لغاية ماكل الدقيق يتشرب السمنة كويس اهم خطوة دى اللى بتخلى الكحك ناعم جدا على فكرة يعنى على قدماتقدرى بسيه ولو نص ساعة كمان 

وفى اضافة لوتحبى شيلى قدكوباية سمن واستبدليها بزبدة واضربيهامع السكرالبودرة كانك هتعملى كيك اوبسكويت وبعدين ضيفيها مع السمن على الدقيق بتخلبه دايب وطرى 

وبعدمايبرد خالص ننزل عليهم باللبن الدافى او المية مدوبين فيه الخميرة بمعلقة سكر ويستحسن نحط اللبن بالتدريج لحدماتلاقى العجينة لمت وبتتكور بسهولة من غير ماتشقق منك تبقى كدا استكفت خلاص وخلى  بالك متعجنيش ولا تبسى تانى هينشف منك ويعمل عرق 
 وغطيه بحاجة بلاستيك علشان لو قماش هيشرب السمنة واشتغلى على طول علشان دا معمول ببيكنج بودر 

 وكورى حتة صغيرة فى ايدك 

 واحشيها وانقشيها اظن عارفة طبعا وتحاولى تخلى النقشة عالية على قدماتقدرى علشان لوخفيفة لما تخمر الكحكاية هتعلى فتروح النقشة وبكدا لماترشى عليه السكرالبودرة هيقع مش هيمسك فيه

او بالفورمة او الطباعة البصامة يعنىلو معندكيش بصامة زى دى ممكن بمصفاة سلك من بتاعة العصير

 وممكن تسويه على طول بعدماتخلصى لان الجو حر نار سيبيه يريح نص ساعة بس امالو هتستخدمى خميرة بيرة سيبيه لتانى يوم وسويه الصبح اناباعمل كدا وتعرفى ازاى انها خمرت لماتمسكى الكحكاية تلاقيها ناشفة وجمدت مش طرية زى ماكنتى بتشتغلى بيها

الفرن يكون  فوق المتوسط يعنى حامى الى حدما لانه لوبارد هياخد وقت كتيرلمايستوى والسوايل تتبخرمنه فهينشف ولوسخن هيبقى مسلوق يعنى هيستوى بسرعة من بره ويبقى نى من جوه اناباسوى فى فرن الغاز او البوتاجاز

 ولوفرن كهربا هتظبطى الدرجة على 170 او 180 من تحت بس لماتلاقى قعره بقى دهبى كدا لولسه مااحمرش من فوق ولعى الشواية اقل من دقيقة يدوب وفى ناس بتحبه زى بتاع المحلات لونه فاتح شوية عن كدا بس احنا علشان بنعمل كميات باسويه شويه علشان يقعد وميجرالوش حاجة 

داالسادة سويته على 160 درجة بس 

 شايفين من تحت عامل ازاى 

 دا بالبصامة للى مش عاوزة توجع دماغها وتنقش زيى ههههههههه

 

وطبعا هنرشه بالسكرالبودرة وبالف هنا وشفا

ودا كحك العيد بالملبن دوسى على الصورة تحولك للموضوع 

ودا بالعجوة 

اخر حاجة بقى لو انتى سبق وعملتى الكحك وطلع بيه مشكلة او انك اول مرة تعمليه انصحك لازم تشوفى الموضوع دا تكات ام عمرو اللى مش هتلاقيها باى مكان اللى هتطلعلك كحك احلى من المحلات