طريقة عمل بسكويت النشادر

بسكويت العيد بالنشادر

نستكمل ملف حلويات العيد والنهاردة هنعمل البسكويت المصرى بالنشادر ودا الاكثر شهرة طبعا 

وفى ناس بتواجهها مشاكل معاه كتير ان شاء الله الموضوع دا هيساعدكم على مااعتقد اناحاولت اجمع كل التكات فيه وحلول المشاكل بس اعذرونى الصور مش كتير لانى ماعملتش اصلابقالى كام سنة اى حلويات للعيد لظروف وفاة فى العيلة 

  

  

 كيلو دقيق حلويات
نص كيلو زبدة أو واقل
 نشيل منه ربع كوب ونستبدله بالزيت
علشان يطلع ناشف ومقرمش 
5 بيضات كبار او 6صغيرين
كوب لبن دافى او حسب الحاجة
325جرام سكر بودرة(ربع كيلو و5 معالق تقريبا )
معلقة كبيرة نشادر
او معلقة بيكنج بودر
معلقة صغيرة فانيليا 
روح برتقال او موز او جوزهند(اختيارى)
ذرة ملح

نضرب الزبدة مع السكر لحد ما يبقى زى الكريمة

وبعدين نضيف الزيت 

نضيف البيض واحدة واحدة والفانيليا خلى بالك ميكونش طالع من التلاجة اوك

نجيب  اللبن الدافى لاسخن ولا بارد زى دمعة العين وندوب فيه النشادر كويس اووووى ونتاكد انها دابت كلها وننزل بيها سرسوب خفيف كدا بالراحة خالص على الخليط 

نخلط الدقيق والبيكنج بودرلو تحبى يبقى نص معلقة صغيرة ورشه الملح

 و  نبتدي نحط الدقيق  شويه شويه لو بتعجني بايدك او بالعجان 

لحدماالعجينة تلم معانا وتبقى كويسة مش بتلزق فى الايد بس طرية شوية
تسيبي العجين يرتاح  عشر دقايق في التلاجه من حراره العجن و تدهني الصاج بالزيت
 ونبدأ نشكله واحسن حاجة لتشكيل البسكوت هى المفرمة الحديد بتاعة زمان اللى كنا بنفرم فيها اللحمة دى بتخلى تقطيعه سهل وشكله حلو

ولو مش متوفرة عندكم ممكن تستخدموا مكنة بيتى فور او كيس الحلوانى اللى يريحك
و تشكلي بالقمع شكل النجمه او المشط بيبقي شكلهم حلو او بالمفرمة بتاعة اللحمة دى

 وبتجيبى لها وش من اى محل للادوات المنزلية اناجبتها من رنين

وانابافضل الوش دا دايما 

لو لقيتى العجينة سايحة منك زودى لها معلقتين دقيق مش مشكلة لان نوع الدقيق بيفرق وفى دقيق اصلا بيطرد السمنة ولو العجينة ناشفة زودى معلقة ولا 2 زيت درة
لو عاوزة تعملى جزء منه بالشيكولاتة شيلى ربع كوباية دقيق
وحطى مكانهم كاكاو خام عارفة يعنى ايه خام يعنى بدون سكر مش اللى فى العلب دا علشان السكرميبقاش كتيرويبوظ منك

و تكوني مسخنه الفرن بتاعك علي 180 قبلها  وبعدين هديه ل 160 عشان يطلع مظبوط لو معندكيش تدريج في الفرن يبقي درجه تسويه الكيك العادي و مبياخدش وقت خالص  في الفرن  ممكن 10 او 15دقيقة المهم ابقى تابعيه ولمايصفر كدا  ويبقى لونه دهبى جميل طلعيه يبرد

اناباسوى فى فرن الغاز اوالبوتاجاز صراحة
البسكويت والبيتى فور ياجماعة ياريت متشكليش الكمية كلها مرة واحدة 
يفضل انك تعملى تيست يعنى تشكلى كام واحدة وتدخليهم الفرن لو كويس ومحافظ على النقشة تمام اوك لو حصل لاقدرالله انه فرش تقومى ضايفة معلقتين تلاتة دقيق وتلفى العجينة تانى وتشتغلى وتسوى ان شاءالله يبقى كويس 

 وداشكله لماطلع وبرد 

اما اللى معندهاش مكنة دى طريقة بسكويت الكيس 
دوسى على الصورة تحولك للموضوع 

تكات مطبخ ام عمرو خالد لنجاح البسكويت

1-لازم يكون السكر ناعم جدا مفيهوش اى حبيبات او كلاكيع علشان كدا بننخله الاول قبل مانشتغل .
2-خلينا نتفق ان البيتى فور والبسكويت والسابلية بنشتغل بزبدة مش سمنه لان السمنة مش هتخليه خفيف وهش الزبده نتيجتها احلىلان الزبده فيها كميه من الميه بتتبخر وهو فى الفرن بتديله طراوه  ولوهنستخدم سمنة هنغيرالمقاديرشوية 
3-السمنه و الزبدة  تكون فى التلاجه متكونش سايحة ونضربها كويس مع السكر لما يدوب خالص لانه لو ما دابش كويس ها يخلى البسكويت يفرش وكمان يلزق فى الصاج وكمان تشتغلى فى جو مش حر علشان الزبدة متسيحش منك وتفصل يفضل تشتغلى قدام مروحة او تكييف .
4-  النشادر ندوبها مع اللبن يكون دافى زى دمعة العين  لاهو ساخن ولاساقع يعنى نعاملها معاملة الخميرة البيرة تمام
لانه لو سخن هيقلل مفعول النشادر جوه الفرن وهتفسد اصلا ولو ساقع هيخلى الخليط يفصل ما يبقاش متجانس ولو مش عندك نشادر استبدليها ببيكنج بودر .
5-ما نعجنش خالص يدوب نجمع العجينه عشان لو اتعجنت ممكن السمنه تفصل بعد كده عن العجينه ونزود دقيق حسب ما تحتاج العجينه فى ايدينا
6-  ما تزوديش دقيق كتير قوى لحد ما العجينه تلم زى ماقلت لك هتحسيها فى الاول انها  طريه شوية متخافيش سيبيها ترتاح شويه وتشرب السوائل والسمنة تجمد وهتلاقيها  بقت متماسكه اكتر من الاول لاننا لو زودناها دقيق كتير من الاول وسيبناها ترتاح ممكن نلاقيها جبست  وبقت ناشفه
ومش ها تمشى كويس فى الكيس  وتطلع عين اهلك لمؤاخذة وتقعدى تدعى على ههههههههه 
والبسكويت هيبقى محجر لمايستوى كمان 
7- لما تيجى تشتغلى اول مرة بالكيس لقيتي العجينة سايلة لان الجو حر حطيها شوية فى التلاجة تمسك نفسها مش اكتر من خمس دقايق واشتغلى تانى
8-بعد التقطيع نخلى بالنا نسيب فراغات بين البسكويت عشان هيزيد
9- وانتى بتقطعيه هتبلى ايدك خفيف قوى بالزيت وتقطعى بمقص وترصى على صاج مدهون زيت برضه
10-متسويش البسكويت مرة واحدة لا استنى  سوى صاج واحد تجربة فيه بسكويتين او تلاته بس نجربهم فى الفرن
لو ظبط معاكى يبقى تمام اما لو لقيتيه فرش يبقى الدقيق قليل فهناخد العجينه ونزود لها دقيق تانى ونلفها وهكذا
11- ونخبز على فرن متوسط مايل للهادى شويه (160 -170)علشان ياخد راحته فى السوا كويس ويبقى لونه دهبى مش ابيض
لو ابيض هيطرى بعد كده منك لكن الذهبى  ده هيفضل مقرمش لاخر واحدة
12- لما تطلعيه من الفرن متلمسيهوش قبل ما يهدي شويه لانه بيبقي ناعم و ممكن يتكسر بسهولة
13-وعلشان يفضل مقرمش على طول حطيه بعدمايبرد فى علبة بلاستيك محكمة الغلق زى علب التلاجة لو معندكيش يبقى حله كبيره مفروشه بالبلاستيك وغطيها او كرتونة
14-البسكوت فرش جامد او النقشة راحت منه ده بيبقى يا اما زودتى السكر عن المقدار المحدد وهو كيلو سكر لكل 3 كيلو دقيق
او زودتى النشادر عن المقدار المحدد وهو اوقية لكل 3 كيلو دقيق والكيلو دقيق له معلقة كبيرة ممسوحة يعنى 10 جرام بس 
او زودتى البيكنج بودر او ضربتى الزبدة كتير ودخلها هوااو قعدفترة قبل التسوية فخمر زيادة والحل انك تزودى دقيق وتلفيه تانى وتشكليه  
15-البسكوت ناشف وده بسبب ان مقدار السمن اقل من المطلوب وهو نص كيلو سمن لكل كيلو دقيق
16- -لوعاوزاه بالبرتقال هتستبدلى اللبن بعصيربرتقال وبشربرتقال لومفيش برتقال برضه قدامك عصيرتانج وتدوبيه فى مية اولبن او تضيفى روح برتقال ولوعاوزاه اقتصادى جدا يبقى هنستخدم مية زى المحلات
 .17- لوبتحبى جوزالهند اطحنى شوية ناعم اوى وضيفيهم للدقيق او ضيفى روح جوزهندسايلة .
18- البيض ممكن تقلليه لو مبتحبيهوش بس مش اقل من 4 طبعا .
19-ممكن تعززى نكهة اللبن اكتر بانك تضيفى للدقيق حليب نيدو بودرة .


يارب الوصفة تعجبكم و كل سنة وانتوا طيبين وياريت تساعدونا نوصل لاكبرعدد ممكن وشير للوصفة فى اى مكان وربنايجعله فى ميزان حسناتكم