طريقة عمل كحك العيد بالعجوة



كل سنة وانتم طيبيبن ياجماعة 

النهاردة هنعمل كحك العيد بالعجوة

هى المقاديرثابتة عند اى حد ومعروفة بس انا هازود بس التكات والملاحظات بتاعتى اللى هتديكى احلى كحك ان شاء الله ناعم ودايب لان زى مااتعودنا الفرق بيكون فى طريقة التطبيق للوصفة والالتزام بالتكات اكتر من مجرد مقادير مظبوطة 


كيلو دقيق
نصف كيلو سمنة بلدى سايحة 

 كوباية لبن دافى او مية او زبادى
ملعقة كبيرة بيكنج بودر 

  قطعة خميرة فى حجم عين الجمل
100جرام  سكرناعم
ملعقة كبيرة ريحة كحك (اختيارى)
سمسم(اختيارى)
الحشو
عجوة 

 

 هنجهز العجوة للحشو
 هتسيحى معلقتين سمن بلدى اوزبدة اللى يريحك وتنزلى عليهم بالعجوة واهرسيها بالشوكة او هراسة البطاطس اى حاجة عندك وبعدين ضيفى السمسم وطفى عليها ولماتفك خالص متبقاش جامدة ولا مكلكعة

 

 سيبيها تبرد وكوريها فى طبق علشان تبقى جاهزة للحشو



نبتدى بقى العجن  هنجيب طبق كبير وواسع علشان تعرفى تبسى الكحك كويس فيه ونحط فيها الدقيق ونحط عليه المكونات الجافة(البيكنج بودر وريحة الكحك والسكر) ونقلبهم ونحط السمسم ونقلبهم كويس
بالنسبة لريحة  الكحك لو مش متوفرة عادى مش مهم هاقولكم مكوناتها ايه وخلاص (
 فرنقل وقرفه ومحلب وحبهان و مستكه ويانسون
و شمروجوزة الطيب طبعا كله مطحون ) 

لو هتعملي كيلو دقيق تحطي معلقه صغيرة بس متكتريش عن كدا اوعى
(مهم جدا جدا نوع الدقيق اللى هنشتغل بيه لان فى انواع بتطرد السمنة وتخلى الكحك ناشف لانه دقيق قوى بتاع معجنات وله عرق مش للحلويات اناباستعمل فارينو دور او الضحى او شهد )
 ونعمل حفرة فى النص وننزل على الدقيق بالسمنة السايحة
بس خلى بالك السمنة لازم تكون دافيه مش مغلية
عشان لو سخنة البيكنج بودر هيفسد ومش هينشط العجينة وكمان هيحمى على صدرك بعدماتاكليه 



 
ونقلبها كويس اوى بايدينا لماتبرد شوية يعنى نبس العجينة لغاية ماكل الدقيق يتشرب السمنة كويس اهم خطوة دى اللى بتخلى الكحك ناعم جدا على فكرة يعنى على قدماتقدرى بسيه ولو نص ساعة كمان وفى اضافة لوتحبى شيلى قدكوباية سمن واستبدليها بزبدة واضربيهامع السكرالبودرة كانك هتعملى كيك اوبسكويت وبعدين ضيفيها مع السمن على الدقيق بتخلبه دايب وطرى 


وبعدمايبرد خالص ننزل عليهم باللبن الدافى او المية مدوبين فيه الخميرة بمعلقة سكر ويستحسن نحط اللبن بالتدريج لحدماتلاقى العجينة لمت وبتتكور بسهولة من غير ماتشقق منك تبقى كدا استكفت خلاص 
 وخلى  بالك متعجنيش ولا تبسى تانى هينشف منك ويعمل عرق 
وغطيه بحاجة بلاستيك علشان لو قماش هيشرب السمنة واشتغلى على طول علشان دا معمول ببيكنج بودر 
  وكورى حتة صغيرة فى ايدك 






  واحشيها بالعجوة بتاعتنا 




وانقشيها اظن عارفة طبعا وتحاولى تخلى النقشة عالية على قدماتقدرى علشان لوخفيفة لما تخمر الكحكاية هتعلى فتروح النقشة وبكدا لماترشى عليه السكرالبودرة هيقع مش هيمسك فيه 




او بالفورمة او الطباعة البصامة يعنى لو معندكيش بصامة زى دى ممكن بمصفاة سلك من بتاعة العصير

 

  وداشكل البصامة  السلك 




ودى البلاستيك 



 وممكن تسويه على طول بعدماتخلصى لان الجو حر نار سيبيه يريح نص ساعة بس امالو هتستخدمى خميرة بيرة سيبيه لتانى يوم وسويه الصبح اناباعمل كدا وتعرفى ازاى انها خمرت لماتمسكى الكحكاية تلاقيها ناشفة وجمدت مش طرية زى ماكنتى بتشتغلى بيها 



الفرن يكون  فوق المتوسط يعنى حامى الى حدما لانه لوبارد هياخد وقت كتيرلمايستوى والسوايل تتبخرمنه فهينشف ولوسخن هيبقى مسلوق يعنى هيستوى بسرعة من بره ويبقى نى من جوه اناباسوى فى فرن الغاز او البوتاجاز

 ولوفرن كهربا هتظبطى الدرجة على 170 او 180 من تحت بس لماتلاقى قعره بقى دهبى كدا لولسه مااحمرش من فوق ولعى الشواية اقل من دقيقة يدوب وفى ناس بتحبه زى بتاع المحلات لونه فاتح شوية عن كدا بس احنا علشان بنعمل كميات باسويه شويه علشان يقعد وميجرالوش حاجة  خصوصا الجو حر وممكن يبوظ بسرعة



ودا بعدما برد ورشيت السكر البودرة والسكر علشان ميحجرش ولا يسكرمنك لو انتى اللى طحناه فى البيت مش جاهز يفضل انك تضيفى له معلقتين نشا 



 ودا من جوه 








تكات مطبخ ام عمرو خالد

 علشان تعرفى ايه اسرار كحك المحلات ونعومته وايه المشاكل اللى بتقابلك فى الكحك واسبابها دوسى على الصورة دى 







تعليقات

إرسال تعليق