طريقة عمل الغريبة الالوان

غريبة بشكل جديد 

 كل سنة وحضراتكم طيبين 

عملنا الغريبة الدايبة زى المحلات بالظبط قبل كدا 

والمرة دى بقى عملت حاجة بسيطة خالص علشان الولاد ياكلوها وبرضه يبقى شكلها مغرى وجميل 

عملتها بالالوان الوان صحية طبعا كنت باعمل بيها الكيك

4 كوب دقيق ممكن تحتاجى اقل فيضاف تدريجي 

2 كوب سمن بلدى او زبدة سايحه على الهادى لحد ماتنشف المية اللى فيها

وبرضه حطيها تمسك نفسها شوية فى التلاجة 

كوب سكر بودرة

ذرة ملح 

فانليا 

ألوان طعام صحية 

كاكاو خام بدون سكر
المقادير بالكيلو 
800جرام دقيق او يزيد
نص كيلو سمنـــــة 

200جرام سكر بودرة 

هى هى نفس مقاديرنا المعتادة وطريقتنا باختلاف بسيط خالص انى زودت الالوان وقللت السكرشوية لانى مبحبش السكركتير فى الحلويات عموما واولادى بينفروا منه 

اضربى السمنة كويس جدااااااا

  لحد ما تبقى زى الكريمة كدا

وبعدين ضيفى السكر والفانيليا بالتدريج واحدة واحدة

وكملى ضرب لحد مالون الزبدة يبقى ابيض خالص 

بعدها انزلى بالدقيق والملح تدريجيا لحد ماالعجينة تلم معاكى

ولماتيجى تكوريها متشققش منك

شايفة ازاى كدا يبقى تمام مش عاوزين دقيق تانى خلى بالك ممكن تاخدى دقيق اقل من اللى اناكتباه وممكن اكتر داحسب نوع الدقيق

 المفروض تضيفى الالوان لو بودرة على الدقيق اسهل لك وتنخليه 

بس انا اخدت جزء صغيرمن العجين ولونته دوبت اللون فى حتة سمنة وضيفتها للعجين الابيض بتاعنا 

لان الفكرة جتنى متأخر شوية لمالقيت محمد الصغير فرحان وبيعمل معايا ومفكرهاعمل كيكة زى كل مرة اصل هو اللى بيساعدنى ويمسك المضرب ويعجن وتلاقيه راشق فى الصور كلها هههههههههه

بعدين ريحيها فى التلاجة شوية لان الجوحر ولماتطلع ادعكيها تانى لحدمالونها بيبض الخطوة دى مهمة جدا بتخليها دايبة دوب 

وبعدين كل لون عملت منه كورصغيرة زى كدا واكيد طبعا الكل شارك فى الحفلة دى ههههه

واخدت كل اربعة مع بعض وحطيتهم على كف ايدى وبالايدالتانية لفيتهم باتجاه اليمين

 

فطلعوا بالشكل دا وبقيت اعمل كذا لون  ماهى زاطت بقى

وبعدين رصيتها فى صاج 

وطبعا هتسيبى مسافة بسيطة بين الواحدة والتانية لانها بتزيد

 

ودى البيضا السادة

 

وبالسودانى والزبيب ومحمدطبعا اللى حط الزبيب ولازم ياماما صورى ايدى مقدرش اقول لأ هيضربنى

ودخليها فرن هادى تقريبا 140 درجة على الرف الوسطانى

مبتاخدش اكترمن 12 دقيقة يدوبك تمسك نفسها 

دى لون واحد برضه حلوة 

 

ودى الكمية كلها بفضل الله رصيتها فى صينية طبقتين وبينهم كيس نايلون 

طبعا هى شكلها وطعمها تحفة والله انا حتى خربت الدايت واكلت منها وعقابا بقى على الطفاسة دى مفيش اكل لمدة يومين ههههههه 

المهم تعليقى بقى او المشكلة اللى حصلت ان  الجو عندى ناااار وكل شوية السمنة تسيح مع انى قاعدة قدام المروحة بس دى شكلهاكانت محتاجة تكيييف ياعين امها هههههههه

بقيت ادخلهاالتلاجة تمسك نفسها واشتغل تسيح ادخلها وهكذا عذبتنى اخر عذاب والقصة كلها اقل من كيلو اصلا 

داغير ان الولاد طلبوها ومعنديش الدقيق المعتمد بتاع الحلويات عندى فارينو دور اه بس للتورت والكيك مش للكحك والبسكويت 

فداسبب تانى لانها فرشت شوية منى 

بس كفاية ان الولاد اشتغلوا معايا وعجبتهم وبالف هنا شكلهامش هتقعد للعيد ههههههههه

تكات مطبخ ام عمرو خالد

1-خلينا نتفق كدا اولا ان الغريبةلا فيها بيكنج بودر ولا بيض بس فى وصفات بتضيف بياض البيض علشان تضمن ان الغريبة متشققش  

2-الغريبة دقيق وسمنة وسكر بودرة بس

ومقادير الغريبة السمنة نص الدقيق والسكر نص السمنة بالنسبة لمقادير بالكيلو ياجماعة  200 جرام سكر او اكتر ربع كيلوحسب رغبتك وذوقك عليه نص سمنة وكيلو الاربع دقيق وممكن يزيد يعنى حسب ماالعجينة تلم معاكى 

3-وياريت تكون بالسمنة البلدى ومع ذلك تنفع بالزبدة علشان الاخت اللى بترفع ايديها ورا دى و هتسال زى كل مرة معنديش سمنة تنفع بزبدة ايوا ياستى تنفع بس سيحيها الاول وتخلصى من المية اللى فيها واللبن وحطيها تجمد فى التلاجة زى السمنة

4--لازم يكون السكر ناعم جدا مفيهوش اى حبيبات او كلاكيع علشان كدا بننخله الاول قبل مانشتغل ويفضل يكون السكر مطحون بالبيت مش جاهز لان الجاهز بيضاف له  نشا علشان ميحجرش ويكلكع  ياجماعة

5-السمنه او الزبدة تكون فى التلاجه متكونش سايحة ونضربها كويس مع السكر لما يدوب خالص لانه لو ما دابش كويس ها يخلىها تفرش وكمان يلزق فى الصاج

6-متحطيش كل الدقيق مرة واحدة حطى شوية شوية لحدماتلم ممكن متحتاجيش كل الكمية وممكن نحتاج نزود عن المكتوب حسب نوع الدقيق يعنى 

7- نوع الدقيق مهم جدا ياجماعة لازم دقيق حلويات اناباستعمل فارينو دوراو الضحى او شهد 

8-فى نوع دقيق بيطرد السمنة دا مينفعش خالص للحلويات 

9- ما نعجنش خالص يدوب نجمع العجينه عشان لو اتعجنت ممكن السمنه تفصل بعد كده عن العجينه ونزود دقيق حسب ما تحتاج العجينه فى ايدينا بس لما تطلع من التلاجة تدعكيهاشوية 

10-بعد التشكيل نخلى بالنا نسيب فراغات بين الغريبة عشان هيزيد حاجة بسيطة مش اووى

11- لما تطلعيها من الفرن متلمسيهاش قبل ما تهدي شويه لانها بتبقي ناعمة و ممكن تتكسر بسهولة

12-غريبة المحلات ناعمة ليه اقولك بقى اول شىء غريبة المحلات مبتكونش مستوية زى بتاعتنا يعنى نص نية تقريباعشان كده بتكون بيضا وناعمة اوى وحتى مش بتحمر من تحت 

فانتى يادوبك بتدخليها فى فرن البوتاجاز على حرارة اقل من 160 وبمجرد ماحجمها يكبر يعنى الكور تفرش تطلعيها من الفرن وبسرعة 

تشيليها بحذر وتحطيها فى علبة مقفولة 

13-لو فرشت منك يا أبلة يعنى مقدار السكر مش مظبوط وزااااااايد ولو نشفت كمان يبقى السكر زيادة 

14-استخدمي نفس الكوب في المكيال بتاعك  

15- فى ناس بتريح العجينة فى التلاجة ساعتين الاول انا هاقولك تريحيها ولا لا وازاى تعرفى انها محتاجة ترتاح انا على طول باشتغل بيها مباريحهاش لانى باعملها بزبدة طرية وماسكة نفسها زى مانتى شايفة يعنى فى الشتا اشتغلى على طول انما لو الجو حر زى دلوقتى وممكن السمنة وانتى بتشتغلى بيها تسيح شوية وتلاقى العجينة ملزقة او طرية اوووى سيبيها ترتاح فى التلاجة شوية لحدماتاخدى منها حتة تكوريها تلاقيها حلوة مش مشققة ودا ليه بقى علشان السمنة لو سايحة وانتى بتسويها هتنزل فى الصاج وكمان الدقيق هيطردها وهتبقى الغريبة او البيتى ناشفين اما لو هى طرية كدا ودخلتيها تستوى على بال ما تشقر بس من تحت وتمسك نفسها متصفرش حتى هتكون تعتبر استوت والزبدة لسه ما ساحتش فاتحبست جواها علشان كدا بتكون طرية وناعمة

16-الغريبة محتاجة نارهادية ياجماعة لو النارعالية هتشقق وكمان هتستوى بسرعة من بره ومن جوه تبقى نية اول ماتلاقيها مسكت نفسها ولونهامن تحت بقى اشقر وينفع تحركيها بسهوله يبقى كدا تمام هتلاقى 

17-لو لا قدرالله وحصل وطلعت ناشفة منك سيبيها على الصاج فى المطبخ لتانى يوم متشيليهاش على طول بعدالسوا وان شاء الله هتلاقهيا بقت طرية وزى الفل