طريقة عمل العيش الفينو(خبز فيينا)

العيش الفينوبطريقة الشيف حسن 

1كيلو دقيق مخبوزات 

50 جرام زبدة (معلقتين تقريبا)

20 جرام خميرة بودر (معلقة كبيرة) 

5 جرام محسن خبز (معلقة صغيرة) 

50 جرام سكر(3 معالق كبيرة) 

10 جرام ملح (معلقة كبيرة) 

50 جرام لبن بودرة(ربع كوب او 3 معالق كبيرة) 

550 مل ماء مثلج 

100جرام سمسم وحبة البركة (اختيارى)

سائل التلميع 

(1/2 كوباية لبن وفانيليا وبيضة و1/2معلقة سكر) 

طريقة تحضيرالعجينة 

هنجيب العجان  ونركب الحلزوني او كف العجين الموجود فى جهازك ونحط الدقيق والخميرة ومحسن الخبز والسكروالملح واللبن البودرة ونقلبهم  شوية بحيث المكونات دى كلها تمتزج مع بعض 

ونجيب الزبدة ونقطعها مكعبات صغيرة واضيفها والعجان شغال 

ونضيف المية المثلجة واحدة واحدة بالتدريج علشان نتحكم فى العجينة لو الدقيق فيه رطوبة والخميرة متشتغلش غير بعد التشكيل 

 ونشغل علي السرعة الاولي 3 دقائق علشان الموتور مايتحرقش لان العجينة تقيلة 

ولما العجينة تلم وتبيض واعلي السرعة لمدة 4 دقائق ولما اتاكد انها مش بتلزق في العجانة اوقف العجانة 

واخرج العجينة واحط تحتها زيت واغطيها ببلاستيك واسيبها تخمر فى مكان مش سخن لمدة تلت ساعة 

وبعدين هناخد قطعة تقريبا 100جرام ونرش تحتها دقيق بسيط ونفردها شوية مش كتير وبعدين نتنى طرفها ونضرب عليها بكف الايد 

والناحية التانية نفس الحكاية برضه 

واالجناب يمين وشمال 

بكده تبقى اتقفلت من ال4 جوانب صح 

وبعدين الفها رول على الرخامة واحطها فى صينية مدهونة مادة دهنية 

واسيبها في مكان دافئ لمدة ساعة ولوالجو برد ممكن نشغل الفرن يسخن شوية اقل من دقيقة كدا ونحطه جواه يتخمر

او اغلى شوية مية وحطيهم فى صينية او صاج فى دولاب التخمير او الفرن واحط الصاخ فوقيها واقفل عليها لغاية مايتضاعف حجمها شايفين شكله عامل ازاى  هو طبعا كان حجمه كبير اوى المرة دى قلب على باجيت مش فينو ههههههههههه

وبعدين نحضرسائل التلميع  اللى هو عبارة عن لبن وبيض ورشة سكر وفاتيليا اونسكافيه علشان الزفارة بتاعة البيض وندهن العيش بفرشاة بخفة وسرعة  علشان ميهبطش 

ونرش عليه السمسم وحبة البركة 

وبعدين اجيب سكينة حامية جداعشان افتح المسام بتاعته واعمل خطوط بالورب بالراحة وتكون ايدي خفيفة اوى علشان خمره ميهبطش 

ودخلته الفرن على 220 لو بمروحة هياخد 12 دقيقة بس 

ولو مفيهوش مروحة برضه هيدخل على 220 درجة وهياخدمن 20 الي 25 دقيقة 

وداشكله لما طلع 

دى مرة تانية 

 لما يطلع من الفرن وعلشان يفضل طرى تجيبى بخاخ مية وترشيه بسيط كدا او تبلى فوطة او قماشة وتعصريها كويس جدا بحيث تكون يدوبك مندية بس علشان ميبقاش ناشف من فو ق ويعمل قشرة قاسية وعملت منه كيزر وشوية بقسماط
وبعدين لما يتهوى يتغطى بقماشة لوهتستعمليه اليوم دا او شيليه بكيس 
وممكن تعملى كمية وتشيلى الباقى فى الفريزر وتطلعبه يفك قبل الاستعمال 
تكونى مجهزة حلة فيها شوية مية مغلية وعليها مصفاة بتاعةالمكرونة دى وتحطى العيش فيها وتغطيه بفوطة بحيث ان البخار اللى هيطلع هيسخنه ويطريه كمان ولو فى زيادة الفوطة هتمتصه  
انا بحبه دايما بالسمسم وحبة البركة لوتحبيه سادة اوك

تكات مطبخ ام عمرو خالد

طبعا العجينة دى بيتعمل منها اى معجنات فينو بيتى بان توست وكيزر وكمان بيتزا 

الدقيق اللى نستعمله مهم جدا يكون دقيق مخبوزات مش اى نوع تانى لان اى عجائن محتاجة دقيق تكون نسبة الجلوتين فيه عالية يعنى له عرق بالبلدى كدا مينفعش تخبزى بدقيق كيك وتورتات مثلا 

انابحب اوى اشتغل بالخميرة البيرة مش الفورية زى ماالشيفات دايما بيشتغلوا بس النتيجة مش هتفرق كتير طبعا المهم النوعية تكون كويسة ومجرباها او اختبريها قبل ماتشتغلى بيها وبى جزء منها بمعلقة سكر فى شوية مية دافيه ولو عليت تبقى تمام نشتغل بيها هى المفروض بتتخلط مع المقاديرالجافة مبتدوبش بالمية بس انا حبيت اعرفكم ازاى تختبروها علشان العجين ميبوظش منك

محسن الخبز هنا لو مش موجود عادى مفيش مشكلة هو كل مهمته انه بيخليه طرى لاطول مدة ممكنة لوهتعملى كميات زى المخابز 

الزبدة واللبن البودرة مش اساسى للوصفة على فكرة دا انا ضفتهم علشان يبقى مغذى للولاد 

وكمان السكر هتلاحظى انه كتير عن العادى ودا بيخليه سوفت ولو عاوزاه كرسبى شيلى السكر 

ولو عاوزاه نص سوفت ونص كرسبى ضيفى 25 جرام بس 
المعجنات يستحسن تخمر مرتين ويفضل انها تتشكل بعد ماتخمر مش قبل علشان تكون مرنة ومتكشش منك لماتفرديها
لازم تخدمى العجينة كويس اوى يعنى تديهاحقها بالعجن مش اقل من ربع ساعة علشان نطلع الجيلوتين اللى جواها ومتبقاش مكتومة لماتستوىالفرن لازم يكون سخن الى حد ما لان لو درجة الحرارة هادية واقل من المطلوب المخبوزات هتقعد فترة طويلة فى الفرن والسوايل هتتبخرمنها وبالتالى هتلاقهيا ناشفة