طريقة عمل طاجن الرز المعمر

طريقة عمل برام الرز 

النهاردة هنعمل طاجن الرز او برام الرز اورز بحليب تعددت المسميات والطبق واحد

واحنا بقى بنسميه رز معمر بس الصح انه مش معمر لانه سادة مش معمر بلحم او فراخ 

3كوب رز مصرى

 كيلولبن يفضل جاموسى

سمن بلدى او زبدة صفراء

قشطة او وش لبن او زبادى او كريمة

ملح 

فلفل اسود 

الطريقة ولا اسهل طبعا اول حاجة ياريت نستخدم طاجن فخار بلدى او مطلى زى اللى عندى دا اللى يريحك 

ولو مفيش يبقى صينية الومنيوم تيفال بيركس اى حاجة شغالة 

وهننقى الرز وبعدين هنغسله كويس وياريت ننقعه شوية فى المية 

ويفضل اننا نغسله فى البرام او الصينية اللى هنسويه فيها علشان ميطلعش زيادة بعدالغسيل يكون تقريبا نص البرام لانه لسه هيزيد وهنحط لبن

وبعدين حطيت اللبن يغلى على النار خطوة غلى اللبن دى بتوفر الوقت فى التسوية لو مش عاوزة خلاص ممكن تستعمليه بارد

وكل كوباية رز بتاخد كوباية لبن وفى الاخر هنزود نص كوباية يعنى لو هنعمل 3كوبايات رز يبقى هنحتاج 3ونص كوباية لبن تقريبا كيلو الا حاجة بسيطة 

واكيد الرز المعمر يعنى قشطة سمنة بلدى او زبدة صفراء مينفعش بدون اى حاجة من دول وبالذات القشطة هى اللى بتخليه يعمل الوش الدهبى اللى كلنا عارفينه انا هنا عندى وش اللبن كنت محوشاه اعمله سمنة 

وبعدين هنشوح الرز فى الحلة بسمنة بلدى او زبدة 

ودى خطوة مهمة برضه بتخليه مفلفل وزى الفل لمايستوى ويقصر مدة السوا كمان والاهم بتلاقى طعم السمنة فى الرز اقوى لاننا بندخل السمن جوه كل حبة رز لو مش حابة التشويح  اوك مفيش مشكلة خالص

وبعدين ادى له رشة ملح وفلفل اسود 

او العادى بتاعنا هنقلب الملح والفلفل والسمنة وتدعكيها كويس مع الرز كدا

وبعدين صيى اللبن عليه ووزعى القشطة على وشه او الكريمة وممكن تخليها للاخر لمايستوى

ودخلته فرن مسخناه قبل كدا  وحطيته على اول رف لحد مااتشرب اللبن هديت عليه خالص 

 وبعدمااستوى خلاص طفيت عليه وسيبته شوية يتردد زى ما بيقولوا 

 لو وشه لسه مااتحمرش يبقى نولع الشواية 

ولو اتحمر قبل السوا يبقى تغطيه وتخليه يكمل سوا مفيش مشكلة خالص