طريفة عمل الكيزر (خبز البرجر)

خبز البرجر باسهل طريقة

 سبق وعملنا عيش البرجراو الكيزر  بعجينة العشر دقايق

النهاردة هنعمله بطريقة الشيف حسن لوتحبى تعملى كمية اقل اقسمى المقادير 

او اعملى من نفس العجينة فينو اوتوست اوبيتى بان او بيتزا كله شغال

1كيلو دقيق مخبوزات 
معلقتين زبدة
معلقة كبيرة خميرة فورية اوبيرة
 معلقة صغيرة محسن خبز
3 معالق كبيرة سكر
  معلقة كبيرة ملح
ربع كوب لبن بودرة حوالى معالق كبيرة
550 مل ماء مثلج 
  سمسم وحبة البركة (اختيارى)
بديل محسن ا لخبز

(معلقة دقيق ونص معلقة سكر ونص بيكنج بودر ومعلقتين خل )

سائل التلميع 

لبن
او لبن وسكر
اولبن وصفاربيضة وفانيليا
اولبن ونسكافيه
او لبن حليب ومعلقتين بودرة
او معلقة زيت بس

او حتى مية 

طريقة عمل الكيزر

هنجيب العجان بتاعنا ونركب الحلزونى او كف العجين انا اشتغلت بمضرب البيض لان معنديش عجان واوقات باشتغل بشوكة 
ونضيف كل المكونات الجافة اللى هى الدقيق والخميرة ومحسن الخبزلوموجود والسكروالملح واللبن البودرة ونقلبهم  شوية بحيث المكونات دى كلها تمتزج مع بعض 

ونجيب الزبدة ونقطعها مكعبات صغيرة ونضيفها والعجان شغال وطبعا تكون بدرجة حرارة الغرفة مش سايحة ولا جامدة اوى لاتكسر الجهاز

ونضيف المية المثلجة واحدة واحدة بالتدريج علشان نتحكم فى العجينة لو الدقيق فيه رطوبة والخميرة متشتغلش غير بعد التشكيل زى الطريقة المعتادة اللى بنعجن فيها بمية دافية ولو عاملة كمية صغيرة استبدليها بمية دافية عادى

لو معندكيش المحسن هنستخدم البديل دا معلقة دقيق ونص معلقة سكر ونص بيكنج بودر ومعلقتين خل وتعجنيهم مع بعض وهتلاحظى ان الخليط بيفور علشان تفاعل الخل مع البيكنج بودر ودا بيرفع العجينة ويديها هشاشة وهتلاقى لونها ابيض علشان الخل

ونشغل على اول سرعة حوالى 3 دقايق علشان الموتورميتحرقش لان العجينة تقيلة ولما العجينة تلم ولونها يبيض نعلي السرعة لمدة 4 دقائق ولما نتاكد انها مش بتلزق في العجانة نوقف العجانة
طبعا انا كملت العجن بايدى 
ونخرج العجينة ونحط تحتها زيت وتتغطي ببلاستيك ونسيبها تخمر فى مكان دافى

ولو حابة تشكليها دلوقتى اوك ماشى 

طريقة التشكيل

هناخد قطعى تقريبا 100جرام ونقفلها من تحت 

ونكورها ونحطها على الرخامة ونلفها شوية بحركة دائرية وانا قافلة الايد عليها وصوابعى ضاغطة لجوه 

ويترص فى صاج اوصينية ونسيب مسافة مناسبة بينهم انا عملت معاه فينو وبقسماط

واسيبه في مكان دافئ لمدة ساعة ولوالجو برد ممكن نشغل الفرن يسخن شوية اقل من دقيقة كدا ونحطه جواه يتخمر

او اغلى شوية مية وحطيهم فى صينية او صاج فى دولاب التخمير او الفرن واحط الصاج فوقيها واقفل عليها لغاية مايتضاعف حجمه 

وبعدين نحضرسائل التلميع  اللى هو عبارة عن لبن وبيض ورشة سكر وفانيليا اونسكافيه علشان الزفارة بتاعة البيض وممكن نستغنى عنه خالص وكفايةلبن 

 وندهن العيش بفرشاة بخفة وسرعة  علشان ميهبطش 

ونرش عليه السمسم وحبة البركة 

او بدون دهن لوبتحبيه سادة

ودخلته الفرن على 220 تقريبا والفرن كان متسخن قبلها طبعا 
ودا شكله لماخرج بالسلامة هش وطرى وريحته جنان والاهم طعمه حلو اوى علشان الزبدة واللبن اللى ضفناهم

 لما يطلع من الفرن وعلشان يفضل طرى تجيبى بخاخ مية وترشيه بسيط كدا او تبلى فوطة او قماشة وتعصريها كويس جدا بحيث تكون يدوبك مندية بس علشان ميبقاش ناشف من فو ق ويعمل قشرة قاسية وعملت منه كيزر وشوية بقسماط

وبعدين لما يتهوى يتغطى بقماشة لوهتستعمليه اليوم دا او شيليه بكيس 

وممكن تعملى كمية وتشيلى الباقى فى الفريزر وتطلعبه يفك قبل الاستعمال 

تكونى مجهزة حلة فيها شوية مية مغلية وعليها مصفاة بتاعةالمكرونة دى وتحطى العيش فيها وتغطيه بفوطة بحيث ان البخار اللى هيطلع هيسخنه ويطريه كمان ولو فى زيادة الفوطة هتمتصه  

انا بحبه دايما بالسمسم وحبة البركة لوتحبيه سادة اوك

تكات مطبخ ام عمرو خالد

1-طبعا العجينة دى بيتعمل منها اى معجنات فينو بيتى بان توست وكيزر وكمان بيتزا 

2-الدقيق اللى نستعمله مهم جدا يكون دقيق مخبوزات مش اى نوع تانى لان اى عجائن محتاجة دقيق تكون نسبة الجلوتين فيه عالية يعنى له عرق بالبلدى كدا مينفعش تخبزى بدقيق كيك وتورتات مثلا 

3-انابحب اوى اشتغل بالخميرة البيرة مش الفورية زى ماالشيفات دايما بيشتغلوا بس النتيجة مش هتفرق كتير طبعا المهم النوعية تكون كويسة ومجرباها او اختبريها قبل ماتشتغلى بيها وبى جزء منها بمعلقة سكر فى شوية مية دافيه ولو عليت تبقى تمام نشتغل بيها هى المفروض بتتخلط مع المقاديرالجافة مبتدوبش بالمية بس انا حبيت اعرفكم ازاى تختبروها علشان العجين ميبوظش منك

4-لو مش لاقية محسن خبزمفيش مشكلة خالص نستغنى عنه وضيفى معلقتين زبدة ولبن بودرة هتديكى نفس النتيجة  هو كل مهمته انه بيخليه طرى لاطول مدة ممكنة لوهتعملى كميات زى المخابز لوهتعملى كمية قليلة استغنى عنه عادى 

المعجنات يستحسن تخمر مرتين ويفضل انها تتشكل بعد ماتخمر مش قبل علشان تكون مرنة ومتكشش منك لماتفرديها

5-الفرن لازم يكون سخن الى حد ما لان لو درجة الحرارة هادية واقل من المطلوب المخبوزات هتقعد فترة طويلة فى الفرن والسوايل هتتبخرمنها وبالتالى هتلاقيها ناشفة