طريقة عمل الجبنة المثلثات (النستو)

 طريقة عمل الجبنة المثلثات

النهاردة وصفتنا هتكون ازاى نعمل الجبنة النستو اوعلى الاقل نوفر فى استخدام الجبنة لان اسعار السلع بقت اوووفر اوى 

ربع كيلو جبنة قريش 

3قطع جبنة نستو 

1كوب لبن بودرة 

نص كوب زبدة 

 بداية كدا الطريقة دى انا لجات ليها لما لقيت عندى جبنة قريش وزهقت منها لانى باعمل دايت وعندى جبنة قريش كتير فمش لاقية استخدام ليها قلت اضيفها للمش لقيت عندى جبنة قديمة كتير عملاها وطبعا استحالة انى ارميها حتى انا استخدمت نص كيلو مش ربع بس فلو عاوزاها زى النستو بالظبط خليها ربع كفاية 

هو المفروض الوصفة بتتعمل بطريقة تانية هاذكرها برضه
ودى طريقة عمل الجبنة القريش فى البيت بالتفصيل هتلاقيها لودوستى على الصورة دى

 وحتى لو عندك لبن قاطع شغال مش هنرميه بس طبعا تدوقيه ميكونش ممرر

او تجيبى كيلو لبن وتغليه وتضيفى له معلقتين خل علشان يتخثر او يقطع زى مابنقول 

وتحركى لحد ماتلاقى اللبن جبن او بقى فيه كتل ومفيش لبن موجود هتلاقى سائل لونه معكر شوية دا اسمه شرش بنعمل بيه المش الفلاحى بتاعنا ولو عندك جبنة قريش وخايفة تبوظ بتحفظيها فيه وشوية ملح او شطة 

المهم نرجع لموضوعنا هتاخدى اللبن دا وتحطيه فى شاشة وبعدين مصفاة لحدما تلاقى كل المية نزلت منه خلاص والباقى الجبنة دى انا استخدمت حصيرة السوشى علشان اخرامها ضيقة جدا فاللبن ميقعش منها 

تاخديها بقى على الخلاط والزبدة او السمنة حسب الموجود عندك 

وتضربيهم فى الكبة او الخلاط او بالهاندبليندر او حتى شوكة اى حاجة 

وبعدين تضيفى الجبنة النستو بتاعتنا اللى بتفضليها او اى نوع عندك مش هيفرق الزبدة هتظبط الطعم بتاعها

وبعدين اللبن البودرة 

هتلاقى قوامها سائل ومش هينفع تشكليها ولاتتقطع بالشكل المعرو ف

 ترفعيها على نارهادية ومفيش نص دقيقة تقليب على السريع هتلاقيها استوت خلاص الزبدة واللبن البودرة وكدا 

الخطوة دى كمان مهمة بتحفظها مدة كبيرة يعنى 

وبعدين تصبيها فى اى قالب عندك او علبة جبنة نستو او غطا برطمان او علبة اى حاجة مدورة يعنى افرشيها بنايلون استرتش لوعندك او زى مانا عملت قطعت كيس بلاستيك كدا

وتبات ليلة كاملة فى التلاجة تمسك نفسها 

وبعدين تطلع تتقطع حسب الشكل المعتاد وممكن كمان تغيرى شكلها علشان الولاد لو عندك قطاعة شكل حيوانات اوقلوب 

ولو تحبى تضيفى لها زيتون مقطع اوك ودى طريقة تخليل الزيتون دوسى على الصورة برضه

ولوعاملة كمية كبيرة ممكن تجيبى فويل وتغلفيها بيه بس انا محبيتش اعمل كدا والحمدلله مفيش حاجة بيطلع عليها نهار عندى 

 طبعا هالاقى حديقول انتى كدا ماوفرتيش هاقولك انا ماجبتش حاجة من بره كله موجود عندى دى حاجة 

الاهم بقى ان انا يهمنى اضمن سلامة وصحة ولادى ونضافة المنتج اللى هياكلوه اكتر من التوفير