طريقة عمل منعم ومعطرالملابس (الداونى) حصريا

 اعملى الداونى فى البيت بطريقة سهلة ورخيصة

استكمالا لسلسة التوفيرباستخدام بدائل للمنتجات اوتصنيع المنظفات فى البيت 

النهاردة هنعمل الداونى باسهل طريقة والنتيجة داونى مية فى المية زى الجاهز بدون مجاملة والله 

واللى هتجرب هتتاكدمن كلامى ان شاء الله 

الداونى حاليا سعراللتر فوق ال20 جنيه عندنا فى مصر احنا هنحسب فى اخرالموضوع اتكلف كام

الخامات المطلوبة 

100 جرام عجينة سوفتى

100 جرامblue dawny (ريحة داونى )

2      معلقة خل  

 نص معلقة لون ازرق 

(اختيارى )

100 جرام جليسرين 

100 جرام فورمالين

كاتو 
المقادير المستخدمة لكمية 1 لتر فقط
10 جرام عجينة سوفت
5 جرام رائحة 

لون حسب الرغبة

اللى هنا دا الاساسيات بتاعتنا ياجماعة العجينة السوفت والعطر واللون 

بالنسبة للخامات اللى مكتوب عليها اختيارى لومش عندك مش مهم ولا هتاثر فى النتيجة بتاعتناخالص 

الجليسرين وكمان مثبت للعطر ويتحط بنسبة نص وزن العطر
الكاتو دامثبت عطر وبنستخدم نسبة 10 فى المية من العطر
 نستغنى عنه بنزود الريحة  او نعمل كمية قليلة تكفى اسبوع مثلا مش اكتر نص الخامات دى 

الفورمالين بقى دامادة حافظة ودابيستعمل فى كل المنظفات اللى بنجيبها تقريبا الديتول والداونى وحتى الصابون السايل احنامش هنحتاجه لان احناهنعمل كمية صغيرة مش شغل تجارى اوك 

 

اماكن بيع الخامات 

الخامات دى متوفرة عند اى حدبيصنع منظفات وهتلاقيهابالجملة فى شارع الجيش باب الشعرية  وفى شركة النصرتبع الجيش ومحلات جملة وقطاعى كمان وعندكم العتبة

-2-من شركه الزهور فى دار السلام عند المترو وتركب من شارع ابو طالب الى مواصله فايده كامل وتقوله انزل شركه الزهور ماشى وهتلاقى هناك كل حاجه من المنظفات موجوده جمله وقطاعى

  3-من المنصوره ودى تجيبها من عطارة النقيطى اللى فى الشيخ حسانين  او عند عطارة ابراهيم سليم اللى هيا فى اخر شارع الجلاء قبل بوابه تربيه بتاع جامعة المنصوره تمام

 4- اللى جنبها اى فرع لكلية الزراعة تسال هناك او اى فرع لشركة للموادالكيماوية  

 5-اللى قريبة للمطرية تشوف عند اولاد غيتة ممكن تلاقى

  طريقة تصنيع منعم ومطرى الملابس

 بداية كدا ياجماعة الداونى والكمفورت له طريقتين تصنيع 
واحدة بشمع البلسم وشمع عسل نحل وشوية حاجات مكلكعة كدا مااعتقدش الكل هيلاقيها ودى اللى بتستخدمها الشركات 
وتانى طريقة الاسهل اللى بعجينة السوفتى الطريقة اللى على البارد ودى اللى بتسميها الشغل التجارى 
وللامانة برضه احنا هنا اللى هنعمله معطر فقط وليس منعم للملابس المنعم زى الشركات محتاج شمع بلسم وحاجات منعمة كتير ومكلفة حتى لقيتيها مش هتوفرمعاكى حاجة 

نسم الله كدا ونبدا شغل وزى مااتعودنا عندنا العدة بتاعتنا الجردل البلاستيك وعصاية خشب اوايدمقشة 

وهنملى نص الجردل تقريبا 5لتر مية ونفتح الكيس فتحة بسيطة وننزل بيه كدا سرسوب مع التقليب  

 ممكن تنزلى بالكمية كلهامرة واحدة مفيش مشكلة بس انا بحب اضيف تدريجيا علشان يدينى  التقل المظبوط ومايطلعش سايب واضطر اسيبه لتانى يوم يتقل

فى الاول هتلاقيه خفيف كدا متقلقيش خالص ولاتتخضى هيتقل مع التقليب 

هنا العجينة تقلت اهى وامتزجت كويس بس فى خيوط رفيعة كدا شايفينها دا لانه لسه مادابش كويس هنستمرفى التقليب لحدمايبقى تمام بالشكل دا 

هتلاقيها كل شوية بتتقل منك هتزودى مية تقريبا 7لتركمان 

يعنى لحدماتلاقي سمكه كويس ولماتحطيه ينزل على طول فى الغسالة ميقعدش فى الدرج 

لوتحبى تشتغلى بالكمية كلهامن الاول اوك 

هنضيف معلقة خل او 2 حسب ماتحبى هتسالى طبعا خل ايه العك دا ؟ههههههه 

انا اقولك دا مهمته ايه الخل هيحافظ على الالوان بتاعة الهدوم وكمان الخل وسط حمضى والمساحيق كلها وسط قلوى فمحتاجين نعمل معادلة علشان المساحيق متاثرش على الالوان وكمان متجيرش على الهدوم لو حطيتى كمية كبيرة 

دا غير انها بتحافظ على الحلة الاستانلس طبعا والمواسيرمتقلقيش خالص كله بحساب

ولو مش عاوزة بلاش مفيش مشكلة ممكن تستغنى عنه خالص برضه 

نضيف الريحة بقى هنا ونقلب 

طبعا اللى زهقت من ريحة الداونى او مش لقياها لانه غالى ممكن تستبدله باى ريحة تانية 

ونضيف اللون بشويش خالص ويدوبك كمية بسيطة على طرف المعلقة لانه بيلون كتير واحنامش عاوزينه غامق 

لو مش عاوزة تضيفى لون مفيش مشكلة برضه 

بعدالتقليب بقى لون سماوى جميل اهو 

وتقريبا درجة الداونى 

كدا بقى تمام وجاهز للاستعمال بس افضل تسيبيه شوية علشان الريحة تعتق فيه 

لو هتقدرى تجيبى الخامات التانية الاختيارى يبقى 

هتحطى الجليسرين بعدماتدوبى العجينة بالمية وبعدين العطر وبعده الكاتو وبعدين اللون واخيرا الفورمالين 

نيجى للحساب بقى مع ان مابين الخيرين حساب ههههه

الاسعار دى جديدة بعدموجة الغلاء اللى ضربت البلد طبعا اناكنت باعمله ارخص من كدا بمراحل وهاذكربس ليكم سعر الريحة الداونى دى كانت ب160جنيه اصبحت 250 حاليا بسعرالنهاردة 

المهم عندك العجينة ب6جنيه

العطر 10جنيه لانى مالقيتش غير 50جرام بس وجبته من شهر كانت ارخص

اللون جنيه ومش هنستعمله كله اصلا

الخل موجود طبعا 

يبقى الاجمالى 17 مش هيكمل 20 جنيه 

ولو جبتى الاضافات التانية حسبة 30جنيه يعنى برضه مش تمن لترواحد 

الخامات دى بقى هتديكى 12 لتر داونى مركز لان كيلوالعجينة بيعمل برميل 120 كيلو 

انا باغسل يوميا والله وباعطربيه الشقة وبامسح بيه وباهادى الحبايب ولسه ماخلصش  

نقطة بقى للناس اللى بتشتكى ان المعطر مبيثبتش فى الهدوم 

حضرتك اسمعى منى وان شاء الله هتعجبك النتيجة المعطريتضاف فى اخردورة شطف مش مع المسحوق من الاول والهدوم يفضل ان متفضلش كتيرفى الشمس حتى علشان الالوان متبهتش كمان فانتى تنشرى على العصر كدا وتلميه لماينشف على طول او الصبح وكمان فى تكة باعملها لما تيجى تكوى الهدوم هاتى شوية من  الداونى او الكمفورت وحطيهم فى بخاخة وزودى مية ورشى على الهدوم واكويها هتلاقى الريحة تحفة وثابتة لو هدوم نايلون وبوليسترمش هتتكوى يبقى اول ماتلميها من على الحبل اديها رشتين تلاتة برضه بالبخاخة 

المعطر دا باستخدمه كمان لتعطيرالمفروشات والستاير وغسيل السجاد فى اخرشطفة وفى مية مسيح الشقة بيبقى هايل جربوه

طيب بالنسبة للى مش لاقى الخامات دى يبقى يستعمل البديل بقى دا دوسى على الصورة هتحولك للموضوع

تطبيق بعض الاخوات لوصفاتنا على جروب الفيس
دى ست الكل الشطورة Kõtê Tõtã Ãlzõz عملت الداونى والبرسيل جل الله ينورعليكى 
حبيبة قلبى ربنا يخليكى وتسلم ايديكى وعنيكى ياغالية 
ميرسى على الكلام الحلو دا منحرمش منك 

أولا أنا مش لاقيه كلام اقولو للرائعه ام عمرو خالد انا اتعلمت منك وفديني كتير جدا ومملتيش من اسالتي بجد بشكرك جدا علي طوله بالك انا نفذت وحبيت اشارك معاكم الصور

ودى حبيبتى ايمان فتحى

ياريت تعملوا شير للموضوع سواء على جوجل بلس او الفيس او اى جروب ومنتدى علشان اكبر قدرمن الناس يستفيد ونقدر نساعدبعض ونوفر اى جنيه احنا اولى بيه فى اليومين دول وربنايجعله فى ميزان حسناتنا
اتمنى الموضوع يعجبكم وتجربوه ومش طالبة غير دعوة بهداية الاولاد وصلاح الحال