طريقة عمل الفسيخ المصرى

طريقة تمليح الفسيخ باسهل طريقة

النهاردة هنتعلم ازاى نعمل الفسيخ فى البيت يارب يعجبكم

كيلو بورى طازة

100جرام ملح خشن

2معلقة كبيرة شطة

1معلقة كبيرة كمون

1معلقة كبيرة كركم

بداية كدا الفسيخ السهل الممتنع يعنى سهل جدا جدا فى عمايله ولو ماالتزمتيش بالتكنيك اللى هاقوله بالظبط يبقى عوضك على الله وهيبوظ ويترمى

المهم هنحتاج سمك بورى ويفضل انه يكون طازة ودا مهم جدا جدا فى شغلنا

لما تروحى تجيبيه ياريت تنقى السمكة الكبيرة الى حدما علشان لماتستوى يكون فيها لحم وطرية لان معروف ان البورى بيكون سمين اكترمن اى سمك تانى فالدهن دا هيخليه طرى وناعم

يعنى تقريبا السمكة هتكون كيلو الاربع كدا حلو اوى لو السمكة كبيرة هتاخدوقت اطول فى التخليل وبالتالى هتكون ناشفة ومالحة

الملح بقى ياريت يكون خشن اللى بنسميه ملح رشيدى او ملح بحر

لو مش متوفر طبعا اى ملح طعام يفى بالغرض

لو عاوزة الفسيخ ملوحته وسط كل كيلو هياخد 100 جرام ملح

ولو مالح يبقى 200جرام ومتزوديش عن كدا

وشطة علشان تحافظ عليه وميحصلش انه يعفن او يدود وكركم اختيارى طبعا التجار بيخللوه بملح خشن بس وكمان هيبقى مادة حافظة اضافيه وممكن تزودى فلفل اسود او حبهان صحيح فى كل خيشوم حطى واحدة كمان

نيجى بقى للطريقة المفروض الفسيخ مبيتغسلش يعنى فريش بميه البحر افضل والطريقة المعتادة اللى معظم الناس بتعملها وكمان التجار انه بيتساب فى الهوا لحدماينشف بس طبعا لازم يكون متغطى علشان الحشرات والتراب

وبعدين يتملح

احنابقى لان معظم اللى عندنا مزارع فهاغسله والخياشيم من اى طين الاول بمية فاترة وبعدين وتولعى الفرن على درجة حرارة 50 وبعدين تحطيه نص ساعة كدا فى حرارة الفرن هتلاقيه نشف او يتحط فى المطبخ متغطى

وبعدين نتاكد اننا تخلصنا من اى سوايل لسه موجودة فيه هنحتاج علبة مناديل مطبخ هنستخدمها كتير هناخدالمناديل وننشف بيها الخياشيم من الدم كويس جدا

وبعدين هنعمله مساج ايوا مساج بتضحكوا ليه اللى هو ازاى وليه اقولكم هتمسكى السمك من الضهر كدا وبايدك تدلكيه علشان لما يستوى يكون طرى وكريمى زى الزبدة مش مفتل

وبعدين هسيبهافى مصفاة تصفى المية والدم اللى فيها وبعدها هاخد كل سمكة واوقفها فى اى اناء عندى طويل او ازازة حاجة ساقعة او مية بلاستيك واقصها وافرش مناديل اوورق ابيض واوقف السمكة راسها تحت بحيث انها تنزل اكبر كمية من الدم والمية بفعل ا لجاذبية والورق يمتصها

بعدين اسيبه مفرود فى صينية فى المطبخ ومتغطى برضه باى قماشة خفيفة ويفضل تكون شاش لحدتانى يوم هتلاقيه نشف ولونه بقى ابيض وبقى ماسك نفسه بحيث لو رفعتى السمكة لفوق كدا تفضل ثابتة ومتتنيش منك وتقع كداتمام اوى

المهم بقى هنحضرعدة الشغل ونخلط الملح والشطة والكركم والكمون مع بعض ممكن تزودى كارى ونحشى الخياشيم على قدمانقدر وانتى بتحشيها تزقى بايدك لجوه باتجاه البطن

وبعدين تدعكيه بالخلطة من بره عكس اتجاه القشر يعنى من ناحية الديل لفوق باتجاه الراس

وفى ناس بتزود على الطريقة بتاعتنا دى خل وزيت

وبعدين هتجيبى ورق ابيض لومفيش ممكن نستغنى عنه ونحط كل فسيخة عكس التانية ويفضل الكيس يكون فى 2 بس لو كمية يفضل انهاتكون فى ازاز او خشب وترشى طبقة من الخلطة تحتها وترصى طبقة سمك وبعدين طبقة خلطة وسمك وهكذا والاخيرة تكون خلطة وبعدين تحطى عليها اى حاجة تقيلة بحيث تضغط عليها

ولوكيس يبقى هنلفه كويس جدا جدا وتخرجى اى هوا فيه وبعدين تلفيه فى كيس تانى وتالت ورابع بحيث نعزله عن اى هوا لان لو طاله هوا هتلاقيه يمررويدود كمان لاقدر الله وكمان علشان الريحة متضايقناش وبالفه كويس ويااما يتربط بفتلة جامدة او دوبارة زى اللى بنربط بيها عرق اللحمة بتاع الروزبيف او سوليتيب لزق عريض وبعدين احطهافى علبة تلاجة واحط عليها حاجة تقيلة علشان تضغط عليه ممكن قطعة بلاط او رخام او قالب من الطوب واسيبه فى الفرن او دولاب المطبخ لمدة 3 ايام بعدها باقلبه يوميا مرتين الصبح وبالليل مهم جدا جدا الخطوة دى علشان يستوى كويس

ونفتح عليه بعد اسبوع لو فى الصيف او اسبوعين لو فى الشتا
وخلى بالك كل مايقعد وقتاطول فى التمليح يكون ناشف ومملح اكتر 

لو لقيتيه مالح يبقى الحل ايه انك تسقطيه فى مية مغلية دقيقتين تلاتة وتطلعيه بيشيل الملح الزايد وكمان يقتل اى ميكروب فيه

ويفضل انه يتضاف له ساعة التقديم زيت درة او زيتون

ولو ملحه قليل تفتحيه بالسكينة وتدخليه الفرن متسخن كويس جدا لمدة خمس دقايق
او تعصرى عليه ليمون هيظبط الملح بتاعه 

وساعة التقديم بقى حضرى البصل والليمون والخس والذى منه

وعندك طريقتين للتقديم يااما تقدميه سليم يدوبك تفتحيه بس وتشيلى الشوك الكبيرة اللى فى النص

او تشيلى اللحم بس فى طبق ويبقى جاهز على الاكل وعليه زيت وعصيرليمون

وبعدين لو الكمية كبيرة هتشيليه فى الفريزر زى ماتحبى ممكن يقعدسنة بس تلفيه كويس علشان الريحة

طريقة تانية لعمل الفسيخ غير الطازج

طيب دلوقتى الاقى واحدة تانية بتسال اذا كان كل الكلام دا على البورى الفريش طيب واللى مش قادريجيبه طازة يعمل ايه بلاش فسيخ ويروح يشتريه ب150 واكتركمان لا طبعا هنلاقى له حل بس عاوز نفس طويل

طبعا لاننا مش فى بلدساحلية مش هاقدر اوصل لفسيخ فريش طيب يبقى توصى الراجل يجيب لك البورى و ميكونش عليه تلج

لانه لومجمد هيطلع مر او هيعفن ويطوله دود

المهم هتجيبيه وهنعمله حمام ميه فاترة كذا مرة علشان نعادل حرارة جسمه من جوه لانه هتلاقيه بارد من الداخل يعنى هتجيبى صينية فيها مية دافيه زى دمع العين وتحطيه فيها شوية وبعدين تدلقيها وتغيريها كذا مرة كدا وبعدين نكمل باقى الخطوات اللى فوق