طريقة عمل برسيل جل اتوماتيك باكثرمن طريقة

عمل البرسيل جيل بأكثر من طريقة

السلام عليكم ورحمته وبركاته 

استكمالا لسلسة بدايل المنتجات او تصنيع المنتجات والمنظفات فى البيت 

بدال مانشتريها جاهزة النهاردة هنعمل برسيل جل اتوماتيك يارب يعجبكم

الخامات المطلوبة لعمل برسيل جيل

نص كيلو تكصابون 20جنيه

ربع كيلو ملح شاور 3جنيه

لون ازرق جنيه 

كلوروكس الوان كوب 

ديتول مطهر نص كوب

انتى فوم 5جنيه 

ريحة برسيل جل 50جرام 10جنيه 

دى الروايح اللى باستخدمها دايما طبعا باموت فى اللافندر

واسمه معطر  مائى او ريحة هتلاقى منه كل الفواكه تقريبا

وكاسيليا والعود والمسك وسكيب النهاردة انااستبدلت ريحة البرسيل بالمسك واللافندر 

طبعا للتوفير انما اللى تحب تجيب ريحة البرسيل جل الاصلية تتفضل تجيب حتى تمن كيلو بس هيقعدكتير عندها لانها غالية جدا الكيلوب180جنيه دلوقتى انما دا الكيلوب30بس

اناماحطيتش تمن الديتول لانه موجود اصلا عندى واللى تحب تعمله تتفضل تشوف الطريقة بالتفصيل لودوستى على الصورة دى قبل مانضيف اللون 

افضل طريق عمل برسيل جيل الاوتوماتك

الديتول والكلوركس والخل او عصير الليمون اضافات لو تحبى تزوديها انما الاصل الخامات الاولى والانتى فوم طبعا اساسى 

وطبعالاسعارتضاعفت بشكل بشع التكصابون كان ب6ونص اصبح 20 جنيه وهكذا

تصنيع برسيل جل اتوماتيك

الطريقة الاولى 

الطريقة من اسهل مايكون هتجيبى التكصابون (رغوة الصابون) وبيكون شكله كدا زى الجل والفازلين 

ودا اللى بيدى رغوة للصابون وبنستخدمه فى تصنيع معظم المنظفات زى الصابون السايل والشاور

وبعدين تضيفى له ملح الشاور وقلبى كويس جدا لحد ما يدوب بس بالراحة علشان ميطلعش الرغوة 

وبعدين تضيفى كوباية مية وتقلبى 

اول ماتلاقيه امتزج كويس تضيفى تانى 

وهكذا لحدماكل الملح يدوب ويختفى خالص

مع التقليب هتلا قيه ابتدى يدى رغوة خفيفة كدا 

وتضيفى هنا بقى كلوركس الوان او كلوركس جل الموجودعندك 

ولوتحبى ديتول للتطهير ماشى او كوباية خل اوتعصري ليمون وتضيفى العصير وتغلى القشربتاعه وتضيفى المية 

لحدماتلاقى السمك بتاعه كويس لاتقيل ولاخفيف هتضيفى ريحة برسيل جل هى غالية بس تحفة هتجيبى 50 جرام حسبة 10 جنيه او اقل كمان ممكن لو مش لاقياها ضيفى الريحة اللى تحبيهاوبعدين اللون لوسايل يضاف مباشرة لوبودر هتدوبيه مع شوية مية وتضيفيه وقلبى لماتوصلى للدرجة اللى تحبيها

انا عملت باللون الاصلى الازرق لحدهنا دا برسيل جل للغسالات العادية وفوق اتوماتيك والغسيل اليدوى كمان 

ملحوظة يابنات اللى بتقول لى عالجروب هنعادل البرسيل زى الصابون السايللاطبعا داخارج نطاق المعادلة بتاعنا خالص بمعنى احنا بنعادل الحموضة والقلوية بتاع الصابون بيكون يااصفر يااخضر بورقة المعادلة phتقريبا 5ونص او 6 دا العادى اللى مايضرش ايدك علشان بنشتغل بايدينا مباشرة لاعاوزينها تجف ولا تقشر ولا تسود لو نسبة زادت عن التانية اماالبرسيل مش هنلمسه وكمان الاهم عاوزينه ينضف ويتعامل مع الاوساخ والبقع فلازم نزود نسبة القلوية شوية بتكون حوالى 8 او 9 

الاضافة اللى بتحول البرسيل من عادى لاتوماتيك

وهنا جه دور الانتى فوم بقى anti foam

او ممكن تلاقيه باسمه مانع الرغوة او مضاد وقاتل الرغوة 

فى منه بودر للمساحيق وفى سائل جل زى اللى فى الصورة دا 

مهمته زى ماهو باين من اسمه انه بيقتل الرغوة بتاعة التكصابون علشان الاتوماتيك ودا ب40جنيه هاتى ب5 بس مش هنضيفهم كلهم كمان حوالى معلقتين تلاتة 

ضيفى لحد ما تلاقى مفيش رغوة خالص

اناحطيته فى الكيس ورجيته مفيش اى رغوة زى ماانتوا شايفين 

اما الغامق دا للعادي عمل رغوة 

الطريقة الثانية

عمل برسيل جيل بدون ملح الشاور

لو مش لاقية ملح الشاورهنستبدله بكيس ملح ناعم عادى بتاع الاكل

وهتكون فى تغيير بسيط فى المقادير 

هنضيف مادة مغلظة اسمهاتايلوز 

علشان الملح العادى ممكن يخلى الخليط سايل تمام كداهتكون مقاديرنا كالاتى 

نص كيلو تكصابون 

كيس ملح صغير 

لون 

نص كيلو كلوكس الوان

اوابيض 

او100جرام اوكسجين

100 جرام تايلوز 

ازازة خل 

ريحة 

انتى فوم 

بالتايلوز دا الكمية هتتضاعف معانا تقريبا ممكن تعمل 9كيلو او 10 حسب ماتحبيه 

لوهتعملى 5لتر مية بس هتضيفى نص ازازة الخل لو هتعملى 8لتريبقى الازازة كلها 

يبقى هنعمل ايه نفس الطريقة هندوب التكصابون بالملح وبعدين هنجيب 5لتر مية ونشتغل وممكن فى الاخر لو الخليط تقيل نزودميه 

اوتريحى دماغك وتشتغلى من الاول بمقدار كبير وليكن 7لتر او 8حسب ماتحبى وتفتحى كيس التايلوز وتنزلى بيه واحدة واحدة على مقدار المية بتاعنا وتقلبى كويس علشان ميكلكعش اوعى تضيفيه مرة واحدة مش هتعرفى تحليه لو كلكع لازم يتضرب فى الخلاط او الهاندبليندر وشغلانة بقى 

المهم لماتلاقى الخليط بتاعنا بقى سميك وتقل ممكن توقفى ومتحتاجيش كل الكمية بتاعة التايلوز براحتك لان احناعاوزينه يدى سمك بس مش اكتر

بعدين هننزل بالخل نص الازازة او كلها حسب راحتك مش هيضر لو كتير خالص دا بيغنينا عن الديتول اصلا لومش عندك بيعقم ويطهرالهدوم روووعة 

وبعدها تنزلى بالتكصابون اللى حليناه الاول بالملح وتقلبى لحدمايمتزجوا كويس خالص وبعدها اللون والريحة وخلاص بقى جاهز وزى الفل 

كيفية عمل برسيل جل باللافندر

انا طبعامن عشاق اللافندر 

علشان كدا باعمله شاور دايما والمرة دى قلت مااعمله برسيل بقى وطلع هايل 

دا شكل المعطراللى استخدمته الازازة ب30جنيه 

وطبعا علشان اطلع اللون بتاع اللافندر دا خلطت لونين مع بعض احمروازرق 

وعبيته فى عبوات وسيبته بهدى للصبح بقى 

والف مبروووووك عليكى برسيل جل نضافة مضاعفة علشان الكلوركس 

وتطهير علشان الديتول والريحة والتعطير كمان حاجة وهم كدا

لو هتعمليه بدون ريحة علشان بتستخدمى معطر اقمشة اوك 

ولو تحبى تشوفى طريقة الداونى دوسى على الصورة دى 

ودا الشاور اللى عملته باللافندر تحفة 

طريقته لودوستى على الصورة دى 

لوحسبتيها هتلاقيها ملاليم يعنى مش تمن كيلو واحد الكمية دى عملت تقريبا 5كيلو 

طبعا اناعملت نص كيلو تكصابون عاوزة تعملى اقل او اكتراوك 

مش عاوزة تحطى لون برضه عادى مفيش مشكلة هتستخدميه للابيض بس حطى كلوروكس ابيض هيديكى نتيجة هايلة طبعا

انماالالوان ضفت كلوركس الوان 

لو للاسود هتضيفى كوباية خل علشان تثبيت الالوان 

ودا طبعا شغال معانا غسيل هدوم وغسيل سجاد عالناشف او انتريه اومراتب اى مفروشات يعنى لان مالوش رغوة 

للامانة احنا بنعمل بديل للبرسيل جل على قدمانقدر انما طبعا مش هو البرسيل جل بمكوناته لان تحضيره فى البيت صعب تلاقى كل الخامات بتاعته لان بيتكون من اكتر من 14مادة 

الطريقة الثالثة 

طريقة اقتصادية جدا للبرسيل 

بالنسبة يابنات للى مش لاقية الخامات ممكن نعمله بطريقة اقتصادية جدا ومش هتكلفك اكتر من 10 جنيه بالكتير وهتعمل اكترمن 3لتر ونص

هنحتاج الاتى 

صابونة غسيل الابيض او صن لايت

ربع كوباية كربوناتو

ولون 

وريحة تفضليها

كلوركس ابيض اوالوان

نص كوباية عصيرليمون

كيس فانيش

كوبايتين مسحوق غسيل 

كيس برسيل جل 

اولا كدا يابنات الكربوناتو ليها اكترمن اسم منها بيكربونات الصوديوم وبيكنج صودا اوصودا الخبز 

الوصفة دى شغالة ابيض وغسيل يدوى وغسالات عادية وتنفع للاتوماتيك كمان والالوان ممكن تضيفى كلوركس الوان 

لوهتعمليها للابيض يبقى هتستعملى كلوركس ابيض اوتزودى على الخلطة دى 5معالق ملح ليمون بيزهزه الابيض اوى صراحة

لو الوان يبقى كلوركس الوان حوالى كوباية 

هنسم الله ونبشر الصابونة بالمبشرة بتاعتنا وبعدين نضيف لها لترين مية مغلية 

وقلبى كويس جدا لمايدوب الصابون خالص انزلى بالكربوناتووبعدين عصيرالليمون اوخل وبعدها اللون بتاعك لو مش عاوزة عادى بلاش طبعا 

وبعدهاالريحة حسب ماتحبى وسيبيه يبرد هتلاقى قوامه تقل خالص وبقى زى الفل عبيه فى اى حاجة عندك وساعة الاستخدام ابقى قلبيه او رجى الجركن تانى لانه مع الوقت بيتقل وعاوزة تضيفى ريحة تانى وقت الغسيل يبقى فى دورة الشطف او استعملى الداونى بتاعنا 

ولو عندك كيس برسيل جل جاهز حطيه عليه حلو برضه هيدى له الريحة المميزة

ولوعندك مسحوق بودر ضيفى كوبايتين تلاتة عليه وقلبيهم كويس جدا ولو لقيتيه تقيل اضربيه فى الخلاط او الهاندبليندر هيفك ويبقى جميل جدا وطبعا زودى المية حسب ماتحبى سمكه ازاى 

وياسلام لوعندك فانيش بقى ضيفى كيس هيشيل البقع وينضف جدا 

تطبيق بعض الاخوات فى جروبنا على الفيس

1-حبيبتى Zoma Mazona

تسلم ايديها وعنيها عملت 

الشاور 

وصابون الايد السائل 

والبرسيل جل 

ودا نص كلامها حقها نفرح بيها ونشكرها ونشجعها 

جزاك الله كل خير يا ام عمرو خالد لانك افدتينى انا وغيرى كتير 

ربنا يكرمك ويرزقك كل ما تتمنى 

معلش اتاخرت عليكى بتطبيق البرسيل جل

جزاكى الله كل خير

الاضافات كانت التراى والبودره البيضا 

وادوا تقل كمان للخليط 

دا خل وكلوروكس الوان سايب بردوا تبعا لقانون التوفير 

ضفت ٨ ونص لتر مايه مع نص الكلوروكس ولتر الخل ادوا ١٠ لتر ماحبتش اخففه اكتر من كدا وقوامه لسه كثيف اللى حابب يخفف يخفف 

ماضيفتش ديتول وكنت حضيف كيس برسيل جل 

بس حجيبه واضيفه ع القاروره واقلبه تعزيز للرائحه اكثر 

ودا رايها بعدالغسيل 

لنتيجه طلعت الابيض منور جداااااا 

والالوان ثابته ومانضحتش والريحه حلوه ونضفوا 

2-تطبيق الغالية Om Youmna Hopa 

لوصفة الصابون السايل والبرسيل جل برافووووووو عليكى حبيبتى الله ينور تسلم ايديكى الحلوين 

اهو دا الشغل ولابلاش ياجماعة والله الموضوع سهل جدا وموفرجدا جدا كمان

3-دى ست الكل الشطورة Kõtê Tõtã Ãlzõz عملت الداونى والبرسيل جل الله ينورعليكى 

حبيبة قلبى ربنا يخليكى وتسلم ايديكى وعنيكى ياغالية 

ميرسى على الكلام الحلو دا منحرمش منك 

أولا أنا مش لاقيه كلام اقولو للرائعه ام عمرو خالد انا اتعلمت منك وفديني كتير جدا ومملتيش من اسالتي بجد بشكرك جدا علي طوله بالك انا نفذت وحبيت اشارك معاكم الصور 

اماكن بيع خامات المنظفات فى مصر

الخامات دى متوفرة عند اى حدبيصنع منظفات وهتلاقيهابالجملة فى شارع الجيش باب الشعرية وفى شركة النصرتبع الجيش ومحلات جملة وقطاعى كمان وعندكم العتبة

-2-من شركه الزهور فى دار السلام عند المترو وتركب من شارع ابو طالب الى مواصله فايده كامل وتقوله انزل شركه الزهور ماشى وهتلاقى هناك كل حاجه من المنظفات موجوده جمله وقطاعى

3-من المنصوره ودى تجيبها من عطارة النقيطى اللى فى الشيخ حسانين او عند عطارة ابراهيم سليم اللى هيا فى اخر شارع الجلاء قبل بوابه تربيه بتاع جامعة المنصوره تمام

4- اللى جنبها اى فرع لكلية الزراعة تسال هناك او اى فرع لشركة للموادالكيماوية 

5-اللى قريبة للمطرية تشوف عند اولاد غيتة ممكن تلاقى

6-اللى من اسكندرية ياجماعة هتلاقى فى الزنقة