طريقة عمل بهارات الحواوشى

بهارات الحواوشى باسهل طريقة

الحواوشى من الاكلات المصرية الاصيلة اللى معظمنا بيحبها سواء لحمة او فراخ او سجق

ومن الوصفات اللى بتحب التوابل اوى فانا باجهز الخلطة بتاعتى ولما احتاج اخدمنها معلقتين تلاتة اسهل من انى افضل الف وادور ورا البرطمانات وافتح كذا حاجة

معلقة كبيرة كزبرة ناشفة

معلقة كبيرة كمون

معلقة كبيرة بابريكا

معلقة كبيرة كبيبة صينى

او معلقة كبيرة جوزة الطيب

معلقة كبيرة فلفل اسود

معلقة صغيرة حبهان

معلقة صغيرة قرفة
معلقة صغيرة قرنفل

اضافات اخرى

معلقة كبيرة توم بودرة

معلقة كبيرة بصل بودرة

معلقة صغيرة شطة

هنخلط كل البهارات دى مع بعض لو مطحونة جاهزة عندك

ولو صحيحة باحمصها الاول على نارهادية فى طاسة تيفال بتلاقى الروايح تحفة طالعة منها

وبعدها هنطحنها فى المطحنة وانا بحب دايما اشترى البهارات والتوابل صحيحة وباطحنها عندى على قداستعمالى يدوبك اسبوع مثلا مش اكتر علشان الريحة بتاعتها بتطير

ونحفظها فى برطمان ونقفله كويس وياريت يكون صغير علشان وانتى بتحطيها اكبسيها متخليش فى فراغ ولا هوا جواها علشان تحافظى عليها اكبروقت ممكن وريحتها تفضل زى ماهى

ويفضل ان اى توابل اوبهارات مطحونة تحتفظى بيها فى التلاجة

دى المكونات الاساسية ياجماعة انا بازود عليها بصل وتوم بودرة وطريقتهم فى البيت سهلة جدا لوتحبى تتعرفى عليها دوسى على الصورة دى