بسكويت اللانكشير (بيتى فور النشا)

طريقة عمل اللانكشير 

2 ونص كوب دقيق

2 ونص كوب نشا

1 ونص كوب زبده

1 وتلت كوب سكر بودرة

2 بيض

1 معلقة صغيرة بيكنج باودر

فانيليا

ذرة ملح

التزيين 

مربى 

جوزهند

شيكولاتة فارماسيل 

شيكولاتة دارك او بيضاء

مقادير2

كوبايتين الاربع دقيق

كوباية وربع سكر بودرة

كوباية ونصف زبدة

كوبايتين نشا 

2بيضة كاملة 

صفار بيضتين 

مقادير3كمية اصغر

كوباية دقيق 
كوباية نشا
نص كوباية سمن بلدي
نص كوباية سكر بودرة
بيضة كبيرة
فانيليا

نص ملعقة صغيرة بكينج بودر

بالنسبة للمقادير اختارى اللى يريحك كلها صح بس اختلاف نسب السوايل فى كل مقدار بيختلف معاه كمية الموادالجافة ليس الا 
الطريقة نفس طريقة البيتى فور بالظبط

 نضرب السكر مع الزبدة كويس جدا لحد ما تبقى كريمى كدا زى مابتعملى التورتة الاسغنجية

ثم نضيف البيض مع الفانيليا ونكمل ضرب

واخيرا الدقيق المضاف اليه البيكنج بودر والنشا والملح شوية شوية

ولو عاوزة جزء بالكاكاو نضيف 2معلقة كاكاو خام الي جزء من الخليط ونشيل نفس المقدار من الدقيق

نعجنه لما تتكون عجينة ناعمة وملساء  

ولو لقيتي الخليط ناعم وسايح ومش عارفة تشكليه غطيه ودخليه التلاجة لمدة 10 دقايق وطلعيه اشتغلي بيه هتكون الزبدة مسكت وبقى كويس و لو لقيتيها لسه طرية زودى معلقة نشا مش دقيق لماتتظبط
وبعدين نشكله كور صغيرة قدالبندقة كدا مش كبيرة لاننا لسه هنلزق كل اتنين مع بعض 
وطبعا تاخدى بالك من المسافات لانه هيزيد بسيط
ونرصه فى الصاج وبيتسوى على طول مبيقعدش 

يدخل الفرن علي 180 درجة ويخرج بمجرد انه ياخد لون ذهبي من تحت متسيبيهوش كتير علشان مينشفش المفروض ميحمرش خالص

طلعه علي طول ومتحطيش ايدك عليه غير لما ينشف عشان ميتكسرش

وتلزقى كل اتنين في بعض بالمربي وزينيه بالفسدق او بالشوكولاتة الفرماسيل او الشوكوتة الخام حسب المتوفرعندك

وممكن كمان تعملى اللانكشير حجمه كبير شوية وتاخدى كل واحدة وتغطسيها فى الشيكولاتة سوا ءبيضاء او دارك بيبقى هايل طبعا الشيكولاتة تكون سايحة على حمام مائى الاول 

 اللى تحب تعرف طريقة البيتى فور زى المحلات تدوس عالصورة دى

ودا البيتى فوربالسمن 

تكات لنجاح البيتى فور والبسكويت وسر نعومته

1-لازم يكون السكر ناعم جدا مفيهوش اى حبيبات او كلاكيع علشان كدا بننخله الاول قبل مانشتغل

2-السمنه او الزبدة تكون فى التلاجه متكونش سايحة ونضربها كويس مع السكر لما يدوب خالص لانه لو ما دابش كويس ها يخلى البسكويت او البيتى فور يفرش وكمان يلزق فى الصاج

3- حاولى على قد ماتقدرى متستخدميش مضرب الكهرباء مدة طويلة فى عمل البيتى فور يدوبك دقيقتين بس كفاية لانك مش عايزة يدخله هواء ويصبح نافش زى الكيك

4- متزوديش مقدار البيكنج بودر عن المكتوب علشان مينفشش اووى

5- ياريت تستخدمى الزبدة احسن من السمن

6- النشا مكون اساسى لايمكن الاستغنا ءعنه بس ممكن نقلله بمعنى ان بدال ماهو نفس وزن الدقيق يكون نصه فقط ولكى الحرية طبعا

7- ما نعجنش خالص يدوب نجمع العجينه عشان لو اتعجنت ممكن السمنه تفصل بعد كده عن العجينه ونزود دقيق حسب ما تحتاج العجينه فى ايدينا

8- ما تزوديش دقيق كتير قوى لحد ما العجينه تلم زى ماقلت لك هتحسيها فى الاول انها طريه شوية متخافيش سيبيها ترتاح شويه وتشرب السوائل والسمنة تجمد وهتلاقيها بقت متماسكه اكتر من الاول لاننا لو زودناها دقيق كتير من الاول وسيبناها ترتاح ممكن نلاقيها جبست وبقت ناشفه

9-بعد التشكيل نخلى بالنا نسيب فراغات بين البسكويت عشان هيزيد حاجة بسيطة مش اووى

10- لما تطلعيه من الفرن متلمسيهوش قبل ما يهدي شويه لانه بيبقي ناعم و ممكن يتكسر بسهولة

البسكويت دا سهل جدا ومبياخدش وقت خالص وكمان بيرمى كمية كبيرة فممكن تعملى نص المقادير دى وكمان من الوصفات المرنة اللى ممكن تلاقى له اكتر من مقادير وكلها صح