طريقة تنضيف الكرشة (الفوارغ او الدوارة )باكتر من طريقة

تنضيف الكرشة باسهل الطرق

كل سنة وانتم طيبين العيد على الأبواب ووصفاته كتير طبعا بس حبيت ابدا بالصعب وهى الكرشة او الفوارغ او الدوارة على حسب اسمها فى كل بلد

وجمعت لكم كل اللى اعرفه عنها فى مكان واحد واختارى الطريقة اللى تناسبك

أنا عارفة ان فى ناس كتير ممكن تكون بتقرف منها ومبتاكلهاش اصلا

بس الغالبية العظمى مننا كمصريين بنحبها

المهم هابدا بالطريقة التقليدية بتاعتنا مع تكة بسيطة خالص بتسهل عليكى الامور وتنضف بسرعة وسهولة

1-تنضيف الكرشة بالطريقة التقليدية

طبعا الكرشة هتجيبيها من الجزار او من الدبيحة لو ربنا كرمك وضحيتى تتغسل كويس جدا من اللى فيها

وبعدين هتقطعيها احجام مناسبة علشان تعرفى تتحكمى فيها وانتى بتنضفى لا كبيرة ولا صغيرة

وفى حاجة لو الدبيحة صغيرة يعنى عجل بتلو مش كندوز او ضانى هتلاقيها اصلا بتطلع فى ايدك من غير مية ولا غيره ممكن تجيبى شوية مية من السخان وتسقطيها فيها دقيقة كدا وتنضفيها فى ثانية هتبقى زى الفل

اما لو كندوز او عجالى كبير بقى فى ناس بتغلى المية وتسقطهافيها وتنضفها بس لى تحفظ عليها ان المية لو بتغلى هتخلى الاوساخ تلزق اكتر فيها وكمان الكرشة هتلاقيها كشت اوى وتنضيفها هيكون صعب جدا وممكن متنضفش اصلا

المهم هنعمل ايه بقى المية هتسخن بس متغليش خلى بالك يعنى تقريبا هتكون 70كدا

وتحطى فيها معلقة سكر بتسهلها وتسقطى الكرشة

وتطلعيها على الرخامة اولوح التقطيع بتاعك

وتجرديها بالسكينة

هتلاقى الاوساخ طلعت معاكى بسهولة

ملحوظة بس لوعملتى كدا ولونها لسه غامق متقلقيش خالص فى بعض انواع بتكون كدا مش وساخة خالص

2-تنضيف الفوارغ(الكرشة) باستخدام بيكربونات الصوديوم

تانى طريقة بقى هى زى الطريقة العادية بتاعتنا بس بنحط شوية بيكربونات الصوديوم (كربوناتو) بتاع العرقسوس عارفينه دا فى المية او بيكنج بودر مع ملح ليمون الموجود عندك ونفس القصة المية مش مغلية

3-تنضيف الكرشة بالسفن أب والزبادى

تالت طريقة دى عالبارد يعنى مش هنرفعهاعالنار هنستخدم فيها مشروب السفن أب لوحده او تضيفى عليه علبة زبادى المتاح عندك هتنقعى الكرشة فى الخلطة دى وبعدين سيبيها تتفاعل مع الطبقة اللى عليها دى حوالى ساعتين كدا واجرديها بالسكينة برضه هتبقى فلة

4-تنضيف الكرشة باستخدام الليمون اوالخل

1-الليمون والخل بنستخدمه باكترمن طريقة وبنعتمد على الاحماض فى التفاعل والتنضيف بمعنى يااما تجيبى خل وعصيرليمون بالقشر وملح طعام او ملح ليمون ايهما وتنقعيها فى الخليط دا شوية وبعدها تجرديها برضه

اوتفرديها فى صينية واسعة وبعدين رشى عليها كيس ملح صغير وازازة خل صغيرة وعصير 3ليمونات واتركيها على رف الثلاجة الاول حوالى 12 ساعة وبعدين طلعيهاواجرديها بالسكينة واغسليها بمية سخنة هاتلاقيها نظفت معاكى بسهولة

2-اوترفعى مية على النار فيها خل وملح ليمون وكربوناتو

وطبعا اللى هنا حمض وقلوى هيتفاعلوا مع بعض ويفوروا الاوساخ دى بسهولة

وتسقطيها برضه وتجرديها كالعادة

3--او مية سخنة من السخان وعصيربرتقالة وقشرها وليمونتين وسيبيها شوية واجرديها برضه

5-تنضيف الكرشة بطريقة الجزارين

طبعا الجزار بينضف كميات واكيد مش هيتعب نفسه زينا كدا خالص وهيستخدم حاجات تنجز من الاخر

المهم الجزاربينضفها باكترمن طريقة برضه يااما بيحط كربوناتو مع المية زى ماقلت لكم قبل كدا

او مية من الحنفية ومعلقة جيرمطفى 10 دقايق لو صغيرة ولو كبيرة المية بتغلى الاول بالجير وتخليها تهدى شوية وتسقطيها وتطلعيها تجرديها بتبقى فلة فى لمح البصر

او مية سخنة وشبة ايوا الشبة اللى بنستخدمها للعرق دى وبعدالحلاقة للرجالة

المهم مية تغلى وفيها معلقة شبة وتبرد شوية تسقطيها وتطلع تجرديها وشكرا على كدا نضفت باسهل الطرق وبسرعة كمان

طبعا طريقة الجير اكيد فى عليها تحفظات بس احب اقولك ان احنا لما نخلص تنضيف باى طريقة من اللى قلناهم دول اكيد هنعقمها ونطهرها كمان فهنقضى على اى اثر ضار لاى حاجة استخدمناها

بالخل او الليمون انا بادعكها بليمون او برتقال او خل وشوية دقيق كمان وبعدين باغسلها كويس وبتبقى زى الفل والله ولا ريحة ولا اى حاجة وتعقيم وتطهير

والنتيجة طبعا بيضة وزى الفل اهى

فى قطعة بقى اسمها ام الشلاتيت وبتبقى عقدة ستات كتير جدا وزى مابيقولواعليها فى مصر طلقت سبع نسوان هههه

ليه لان شكلها زى الكتاب او الكراسة كدا عبارة عن طبقات رفيعة جدا ورا بعض فمحتاجة صبر وطولة بال فى تنضيفها

بس والله سهلة خالص مش محتاجة جرد بالسكينة اصلا بتسقطيها اقل من نص دقيقة اصلا وتمسكيها بصوابعك كدا تفركيها هتنضف على طول او تجيبى شوية دقيق درة او ردة بملح وتفركيها برضه هتنضف فى ثانية