ازاى اختار الحلل الاستانلس ستيل
انواع الحلل الاستانلس
بخصوص موضوع الحلل الاستانلس والاختلاف حواليها اذا كانت بتلسع الاكل او لا
انا بقى هاقولكم تعملوا ايه وتطلعى الرز زى الفل والحلة كمان
الاول هاقولكم ازاى نشترى الاستانلس اصلا
مش شرط تكون ماركة معروفة وغالية وكل واحد على قد امكانياته يعنى انا مثلا جبت نوع اسمه ABOUD حلو جدا من التوحيد والنور هو بومبيه وشكله جميل
المهم اختارى النوع والمكان اللى يريحك
عندك النوحيد والنور ومحلات الموسكى
وطبعا عندك رنين ومحلات تيوليب حلوة جدا
وطبعا عمر افندى واى منفذ بيع قدامك للادوات المنزلية ومنفذ بيع المصانع الحربية واى هايبرجنبك كمان زى كارفور وفتح الله واولاد رجب ومركاتو سبينس والمحلاوى واكيد مش هننسى العتبة وحمام التلات
الاستانلس بقى عندك يااما محلى يا مستورد
المستورد كوركماز ودا تركى بيشكروا فيه اوووى
وارشيا الالمانى الاصلى
والمحلى عندك زهران ودا برضه التوب ونوفال
والمصانع الحربية و يونستيل هتلاقى انواع كتير تانى
واستانلس تابروير اختارى اللى يناسب ميزانيتك
مش شرط نوع محدد الفيصل هنا ايه
انك تنقى الحلة سميكة من تحت فى القاعدة علشان متحرقش الاكل لان الاستانلس حساس جدا للحرارة
تانى حاجة والاهم انها تكون 18 /10 ودا بيكون نسبة الكروم للنيكل في المعدن
وكل ما نسبة النيكل تقل كل ما يكون نسبة صدأ الحديد أكتر وكل ما نسبة النيكل تزيد كل ما تديلة لمعان أكتر
اللى هتشترى مستورد تتأكد انه اصلى و بلدالمنشأ ودا هتلاقيه محفور جوه القاعدة لان فى منتجات بتتصنع بالصين وتاخد الاسم لماركة مشهورة
وفى اختبار بسيط علشان نتاكد منه انه مش مخلوط ومش تقليد ومش هيصدى هتاخدى مغناطيس معاكى وتحطيها على جسم الحلة استحالة تلزق لو استانلس صافى لو لزقت يبقى مغشوش طبعا
وهتلاقى الغطاء يااما ستانلس يااما بيركس ودا مبافضلوش علشان طبعا وارد انه يقع منك ويتكسر
وياريت تختارى الحلة اللى شكلها متناسق مع القاعدة الى تحت يعنى عدلة مش بومبيه زى الطقم بتاعى كدا لان لو انتى نسيتى وعليتى النار وطالت الاستانلس هيصفرويحرق الاكل فى ثانية
ازاى اطبخ فى الاستانلس واحافظ عليه
خلاص كدا اشترينا الف مبرووك تعالى نطبخ بقى واتبعى اتعليمات دى هيقعدمعاكى سنين وسنين
1- ياريت عند اول استخدام تغلى شوية مية بمعلقة خل فى الحلة الاول للتخلص من المواد الناتجة عن الصناعه
2- قبل ماتطبخى سخنى الحلة على حرارة منخفضة لمدة دقيقة أو دقيقتين
3-طبعا لازم تضيفى زبدة أو زيت علشان الاكل ميتحرقش ولا يلزق منك
4-النار تكون متوسطة مش عالية وتختارى الشعلة المناسبة لمقاس الحلة بحيث النار متطلعش بره القاعدة بتاعتها خالص والا هتتلسع وتتحرق كمان
5- لما نيجى نحط ملح على الأكل نستنى لما المية تغلى او الاكل يغلى علشان ميسببش بقع في الحلة
6-واعملى اكلك والرزبتاعك عادى خالص اول مايتشرب الرز المية وطى عليه وحطى الشياطة لحدمايستوى انا باغلف الحلة من تحت الغطا بورق فويل لان الغطا فيه فتحتين بيخرجوا البخارالزايد
7-الرز واللبن والمحاشى باعملها فيه والله لافى حاجة بتشيط ولا تلسع طالما باعمل زى ماقلت لكم كدا
8-طبعا الاستانلس امن جدا صحيا وكمان فى بيتغسل عادى فى غساله الاطباق بس يفضل انك تغسليه بالطريقة العادية لانه سهل التنضيف اصلا
9-بعدماتغسليه يااما تنشفى الحلة كويس بمنديل ياتخليها تتصفى مقلوبة اوعى تشيليها مبلولة خالص لونها بيغير
10 لو في أكل لازق أغلى شويه ماية في الحلة وبعدين بأستخدام ملعقة خشب أو بلاستيك وشيلى الأكل وهيطلع بسهوله وبعدين نضفيها بالسلكة او الليفة
ودا لينك الطريقة بالتفصيل دوسى عالصورة
او اغلى كركديه فى الحلة وبعدين حطى المية المغلية دى فى حلة اكبر وغطسيها فيه شوية ونضفيها هتلاقيها بتبرق
ودا لينك الموضوع بتاع تنضيف وتلميع الاستانلس ستيل
اللهم اجعل عملى خالصا لوجهك الكريم
طب أنا جيت احمر في الحله الصغيرة لسان عصفور الحله اتلسعت من الجنب ولسان العصفور اتلسع بس انا لسه جايبه جديد اعمل ايه عشان اقدر اطبخ فيه أنا خايفه يبوز منى وانا شاريه غالى وشكرا يا توته
ردحذفاستهدي بالله و صلي على النبي الاول كدا و بلاش غلط
حذففين عدم المصداقية والكذب ؟
انا زي ماقلت كذا مرة ان الاستانلس افضل صحيا من اي نوع حلل تاني ولذلك انا باستعمله من سنين و كل وصفات الرز والمحشي والله عاملاها فيه وانا مش هاكسب حاجة ولا حديديني فلوس علشان اكذب عليكم
لو خضرتك كلفتي خاطرك وقريتي كويس هتعرفي ان انا قلت نختار عين مناسبة لحجم ومقاس الحلة والنار تكون تحت القاعدة السميكة ومتطلعش اطلاقا علي الاستانلس علشان هيتلسع
العيب مش عندي والله سيادتك اللي مش مركزة
أزال أحد مشرفي المدونة هذا التعليق.
ردحذفمشاء الله عليك انا بعمل كدا والامور كويسةجزاك الله خير
ردحذفواياكم يارب نورت المدونة
حذفطيب انا جبت معبود انهارده وغليت مايه ولقيت نقره صغيره جدا في قعر الحله والحله التانيه معملتش نقره هل ده عيب
ردحذفايوه طبعا عيب فى الحلة اناعندى بقاله سنين واشتريت طقم تانى منه من كام شهر وزى الفل
حذفالسلام عليكم انا عوزه اجيب لبنتى حللاستلس افضل نوع زهران ولا ايه فدين لوسمحتى
ردحذفوعليكم السلام ورحمة الله وبركاته
حذفهو زهران كويس طبعا بس للاسف فى ناس بتشتكى انه بيلسع الاكل
بعيدا عن اى مسميات تجارية امسكى الحلة الاول وشوفيها تقيلة ولا لا دى اهم حاجة القاعدة تكون سميكة علشان الاكل ميتلسعش منك
من فضلك قولي افضل الأنواع علشان عايزه اجيب ابنتي
ردحذفاي نوع يعجبك وعلي قد امكانياتك هاتيه بشرط يكون زي ماقلت ١٨علي ١٠ والقاعدة بتاعته سميكة
حذففيه خطأ في معلومة المغناطيس و ده من خبيرة اتكلمت عن الموضوع ده عشان بس منظلمش بائع حرام
ردحذف«الاستانلس ستيل» الأصلي يمكن أن يجذب المغناطيس، لأن بعض المصانع تلجأ إلى تزويد حلل «الاستانلس ستيل» بالألومنيوم والنحاس من الجهة الخارجية للقاعدة وذلك لضمان توزيع أفضل للحرارة وتقليل التصاق الطعام بها.
لذا تجد هذه الأواني تجذب المغناطيس بشدة من الخارج وقد يجذب سطحها الداخلي المغناطيس بشكل أقل، ويعتبر هذا النوع أصلي وآمن في الاستخدام.
أما الأنواع الأخرى من الأواني فتجذب «الاستانلس ستيل» من جميع الجهات الخارجية، سواء من القاعدة والأجناب من الخارج فقط لأنها مطلية نحاس أو ألومنيوم من الخارج فقط وهذا النوع أيضا آمن للاستخدام لكن لونه من الخارج قد يتغير بعد فترة من الاستخدام.
وهناك نوع آخر يجذب المغناطيس من القاعدة والأجناب من الداخل ومن الخارج وهو نوع سيئ وسيتعرض للصدأ بعد فترة قليلة نتيجة عدم حماية الحديد المكون له بطبقة كافية من النيكل.
لذلك إذا التصق المغناطيس بـ«الاستانلس ستيل» ليس دليلا على سوء نوعه وعدم جودته، والأهم هو أي جزء سيجذبه المغناطيس.
أولا شكرا جزيلا علي تشريفك المدونة واهتمامك بالمشاركة فيها
حذفثانيا حضرتك مفيش أدني اختلاف ولا خطأ أنا ماقلتش قاعدة الحلة اناقلت جسم الحلة وأظن دا صحيح
انا بدور علي منتجات كوزماز في القاهره والجيزه فين بيتباع وبعدين في لسعه في قعر الحله استنالس وكنت بسلق فيها ايه سبب اللسعه دي مع ان في قاعده ثلاثيه في قعر الخله
ردحذف