كيفية تجهيز الطاجين الفخار للاستخدام
كتير مننا بيحب يعمل الاكل فى الطواجن الفخار
ولان ميعرفش تجهيزها لاول مرة بيشترى طواجن مطلية جاهزة للاستخدام مباشرة
ودى بتفرق طبعا فى الطعم عن الطواجن البلدى ولا وجه للمقارنة اكيد
النهاردة هنتعلم ازاى نعتق الطاجن او نودكه باللهجة الصعيدية بتاعتنا
هل الطهى بالطاجن (البرام) صحى وهل يختلف طعم الاكل فيه؟
مبدئيا كدا خلينا نتفق على حاجة ان الفخار والبورسلين والبيركس مع الاستانلس من افضل الاوانى الصحية على الاطلاق اللتى لاتتفاعل مع الاطعمة ولا تسبب اى سمية او ضرر اطلاقا
ولو تحبى تتعرفى على كل الاوانى ومميزاتها وعيوبها دوسى على الصورة دى هتحولك للموضوع
لا مجال للاختلاف ان الاوانى الفخارية والطواجن افضل انواع القدور على الاطلاق وصحية لاقصى درجة وبتدى الاكل طعم تانى طبعا
واخواتنا بالمغرب الغربى بيطبخوا فيها دايما تلاقى اكلهم له طعم تانى
مميزاتها لاتتفاعل مع الاكل
موصلة جيدة للحرارة
تحتفظ بالحرارة وقت طويل بعد انتهاء الطهى
منها انواع تستخدم فوق النار مباشرة وفى الفرن (الطاجين المغربى)
وفى انواع بالفرن بس
ودى اللى هنتعامل معاها هى بتكون زى القلل بتاعتنا لونها كدا محمر
ودى الافضل من المطلية وعلشان نستخدمها لازم نجهزهاونحرقها الاول علشان تكمل سواها لانها تعتبر نية لسه وكمان علشان نسدالمسام بتاعتها والسوايل مترشحش منها زى القلة والزير والبلاص بتاع المش كدا
ودا طاجين من ايد حبيبتى المغربية الجميلة Asmaa fai
ودا طاجين من ايد حبيبتى المغربية الجميلة Asmaa fai
طريقة توديك وتعتيق الطاجن (البرام)باكترمن طريقة
عندنا اكترمن طريقة للتعتيق اختارى اللى يناسبك
المفروض اننا بنحطه فى نارعالية جدا على قدماتقدرى زى نار الفرن البلدى
وطبعا لان مش متوفر حاليا بنعمله فى فرن الخبيز الغاز او حتى فرن البوتاجاز بس هنحرقه اكترمن مرة
لو جنبك فرن عيش بلدى اديله الطاجن وهو يحرقه لك مرة واحدة تكفى لان النارعنده عالية
دى طريقة التسوية بتاعته تمام كدا
نيجى للتعتيق بقى هتختارى اى حاجة من دول تدهنيه بيها
زيت او زيت وعسل او سمنة بلدى اولبن رايب وسمنة
او دهن لية ضانى سايحة دى الاخوة الصعايدة بيعملوها دايما
انا افضل الطرق الاولى علشان لوحبيت اعمل حلويات فيه ولا حاجة ميبقاش كارف اى ريحة
دى الطواجن بتاعتى ودهنتها زيت وعسل بس كدا
حطيتها بالفرن بعد الكيك على طول لان لازم يكون سخن وانتى مدخلاها ودى لمااتحرقت اول مرة
حرقتها مرتين تانى كمان لمابقت كدا ولقيتها خلاص تمام استوت
تعرفى ازاى لماتحطى ايدك على الطاجن تمسحيه كدا متلاقيش اى لون طلع بايدك يبقى تمام كدا مش محتاج حرق تانى اللون متقلقيش منه خالص دا مكان العسل الاسود وخلاص مش هيطلع بالاكل لانه دخل فى المسام وقفلها والزيت عمل طبقة عازلة بين الفخار والاكل
فى طريقة كمان للتعتيق لو مش حابة تعملى الطرق دى
جهزى تسبيكة طماطم كأنك هتطبخى تمام وزودى نسبة الزيت فيها وارميها بالطاجن ودخليه يستوى لمايتشرب كمية الدهون دى وبعدين ارميها لو عندك اى طيور اديهالهم
كدا باقى الطاجن المطلى معظم الشيفات والدكاترة بيحذروا منه ومن الطبقة اللامعة دى اللى بتحتوى على الرصاص وكمان الفخار الملون لأنه مرشوش بمادة الكادميوم السامة التى تتفاعل مع الأطعمة لواتعرضت لحرارة عالية
فى حل اننا نقعد نحرقه اكترمن مرة بالفرن زى الطاجن البلدى لحد مانتخلص من الطبقة اللامعة دى او تخف شوية
او الافضل اننا نطبخ بالفخارالعادى وبعدين نغرف فى الطاجن المطلى ونقدم على السفرة كشكل جمالى مش اكتر ودا اللى بافضله تجنبا لاى مخاطرة بحياتنا وحياة اولادنا
ودا طاجن كوارع يستاهل بقكم
ودا طاجن رزمعمربالفراخ اللى عاوزة طريقته تدوس على الصورة
واخيرا اتمنى لكم الصحة والعافية جميعا
اللهم اجعل عملى هذا خالصا لوجهك الكريم