سر نجاح الكحك وسبب دوبانه ونعومته
تكات مطبخ ام عمرو خالد
التكات دى خلاصة تجارب وخبرات سنين مش قليلة ومش هتلاقيها باى مكان تانىفرجاء عند اعادة نشرها ذكر المصدر ودا حقى اظن
زى مااتفقنا ان المقادير تكاد تكون واحدة ومتفقين عليها كلنا
بس اوقات بتعمليه وتلتزمى بالمقادير ومع ذلك تقابلك مشكلة ما انا بقى هاجاولك على الاسئلة اللى ماسألتيهاش اصلا ويارب يفيدكم
1-سبب دوبان الكحك ونعومته
يتركز فى كمية السائل المضاف بمعنى انك بتعملى مقدار الدقيق وتحطى نص المقدار سمن وبالرغم من ذلك بيطلع ناشف عارفة ليه ؟ لانك زودتى الماء للعجن وانا بافضل انى اعمله بمية مش بلبن لانه بينشفه
2-لو هتعملى كمية صغيرة ومش هتقعدكتير متقدحيش السمنة اوى يدوبك سيحيهابس تفك ومتسخنش الغرض من قدح السمنة ياجماعة ان اهالينا كانوا بيعملوا كميات كبيرة وبتقعد اكترمن شهر فلماتقدحى السمنة عمره يطول معاكى وميجرالوش حاجة من الحر ولا طول المدة
3-- قصة بقى اعجن بمية ولا لبن مش قضية خالص وانتى حسب راحتك لو هيقعدمدة اعجنى بمية لوهتاكليه فى ظرف اسبوع مثلا اعجنى بلبن او زبادى وداعلشان الجو حرياجماعة والطعم مبيفرقش خالص
4-ياخبر نسيت اضيف ريحة كحك اعمل ايه هيبوظ كدا لا حضرتك عادى ريحة الكحك دى مجرد توابل بتدى له تست مميز ليس الا ولومش موجودة خلاص هيطلع كحك برضه متخافيش هههه
ولو تحبى تعمليها بالبيت دوسى على الصورة دى
5-شوفى يا حبيبتى العجينة المفرولة شوية هى سر نجاح الكحك بمعنى انك اقصى كمية ماء تضيفيها على الكيلو دقيق كوباية ماء و لو لقيتيها مشققة وانتى بتشتغلى ادعكيها تانى وسخنيها علشان السمنة جمدت متضيفيش اى سائل غير اللى احنا اتفقنا عليه
6- الكحك مش بيطلع دايب مع انك التزمتى بالمقادير حرفيا
اقولك ايه السبب انك كسلتى ومش بستيه كويس يا هانم لازم تبسى الكحك بايدك بعد ما تضيفى له السمن قلبى بالملعقة الخشب وبعدين لما يبرد شوية ابدئ بسى الكحك بايدك على قدماتقدرى زى ماقلت لك فشى غلك فيه
وكمان نقطة مهمة الكحك بيتعمل بالايد مش بالعجان ياجماعة محدش يستسهل ويقول اعمله بالعجان وترجعى تقولى ناشف مع ان المقادير مظبوطة هههههههههههههه
7-الكحك حلو بس الحشو ناشف
سواء عجوة او ملبن عجمية حتى دا لان حضرتك سيبتيه مدة كبيرة فى الفرن فالسوايل اللى فيه اتبخرت والملبن والعجمية نشفت والعجوة بقى لازم بنسيحها الاول مع سمن وسمسم اومكسرات عالنار لان العجوة الجاهزة بيضاف ليها عسل اسود فبتكون ناشفة اصلا وانا بافضل اعمله بالتمر اصلا بانضفه من النوى وارفعه عالنارينشف شوية
ودا كحك العيد بالعجوة تحفة دوسى عالصورة
8-فى التسوية تاخدى بالك من حاجة لو الكحك سادة يبقى هنقلل الحرارة شوية علشان يستوى براحته يعنى ممكن 160 لو محشى هتكون زى ماقلنافوق 180 ليه بقى علشان السادة عاوزينه يستوى من جوه وبره كويس اماالمحشى فبيكون سمك العجينة رفيع ومش عاوزينه يقعدمدة كبيرة علشان النار متطولش الحشو فينشف بياخدتقريبا نص ساعة
9-لو الكحك شقق
يبقى ماتبسش كويس الحل بقى حطي عليه حته سمنه وادعكيه تانى هيظبط معاكي ولازم تعرفي انك لازم تبسي الدقيق والسمن كويس جدا مع بعض
10-لو الكحك بعدالتسوية النقشه اللي عليه بتروح
يبقى دا حاجة من 2 يااما الخميرة والبودر كتير يا اما خمره زايد يعنى بتسيبيه يخمر كتير المفروض اول ماتلاقيها نشفت كدا وزادت شوية وبتتحرك من مكانها بسهوله سويه
