قلقاس بالصلصة بأسهل طريقة
السلام عليكم ورحمة الله وبركاته النهاردة
هنكمل مواضيع و طرق طبخ القلقاس اللي بدأناها
مبدئيا كدا احنا بالارياف متعودين علي القلقاس الاحمر بالصلصة عمرنا ماطبخنا قلقاس بالسلق إطلاقا
السلق عندنا بنعمله محشي زي الكرنب و ورق الغنب بيبقي تحفة و ورقه زي الزبدة ماشاء الله
المكونات
قلقاس
ملح
و فلفل
بهارات مشكلة
توم مفروم
بصل مفروم
سلق وكسبرة خضراء
و دا اختياري مش اساسي معانا بالوصفة
الطريقة ( تحضير القلقاس المصرى )
نسم الله كدا ونجهز القلقاس زي ماسبق قلنا نختار الثمرة النتاية علشان تستوي بسرعة وبتكون طرية زبدة ومسكرة كمان
هتلقيها فيها نتوءات من بره و حمرا اوي من عند الجذع بتاعها ولما تتقشر بتبقي لونها وردي كدا مش فاتحة
وزي ما قلنا مش هنغسله هنقشره بقشارة البطاطس او بسكينة وبفوطة نضيفة يتمسح وبس ولو هتغسليه يبقي بمية دافية ومرة واحدة مش اكتر تمام كدا اتفقنا وهنحضر الصلصة بتاعته معلقة سمن بلدي او زبدة او زيت اللي يريحك حسب رغبتك بقي وتنزلي بالبصلة المفرومة ولماتتشوح شوية ضيفي التوم المفروم مع ملح بسيط وفلفل وكمون لوتخبي اوكسبرة ناشفة معاها لما تطلع ريحتها وتصفر كدا ضيفي عصير الطماطم عليها وسيبيها لماتتسبك شوية وبعدين ضيفي القلقاس بتاعك وسيبيه
معاهاشوية ياخد طعم الصلصة
ولو احتاج مية ضيفي له شوربة او مية سخنة علشان منوقفش السوا بتاعه
ولما تلقيه دخل فى السوا ضيفيله الملح واى توابل تانى تحبيها
لو تحبى تضيفيله سلق وكسبرة خضراء كمان هتقطعي الورق بتاعهم بس وتفرميه ناعم شوية بسكينة
وبمعلقة سمن بلدى تشوحيهم مع فصين توم مفرومين مع كسبرة ناشفة وتضيفيه للقلقاس بالصلصة
نوعي بقي مرة قلقاس بالصلصة مرة بالسلق مرة بالكبيبة كل الوصفات دى موجودة بالمدونة
تحياتى ام عمرو خالد