بسكويت البرتقال الرائع بدون نشادر
كيلو دقيق حلويات
نص كيلو زبدة أو واقل
400جرام سكر بودرة او اقل
6 بيضات كبار
كوب عصيربرتقال
بشربرتقال
ذرة ملح
كيس بيكنج بودر
اختيارى
معلقة صغيرة فانيليا
روح برتقال او تانج معلقتين
زيت لدهن الصاج
الطريقة سهلة خالص وان شاء الله هيطلع احلى من بتاع المحلات
لو اتبعتى التعليمات والتزمتى بالتكات اللى هاقولها دى
نضرب الزبدة شوية كدا (وممكن تستعملى زبدة على سمنة عادى)
بعدين نضيف السكرالبودرة وياريت تنخليه لو شارياه من بره علشان ميكونش فيه كلاكيع لحد ما يبقى زى الكريمة
وبعدين نضيف البيض واحدة واحدة والفانيليا خلى بالك ميكونش طالع من التلاجة اوك يكون بدرجة حرارة الغرفة كانك بتعملى كيك بالظبط
بعدين نضيف عصيرالبرتقال تدريجيا ونص الكمية بس دلوقتى
البرتقال لو مش موجود نستخدم عصيرتانج برتقال او حتى لبن وروح البرتقال
وطبعا تكونى ناخلة الدقيق والبودر وتضيفى رشه الملح وتضيفي الدقيق شويه شويه لو بتعجني بايدك او بالعجان لحد مالعجينة تلم معاكى مش بتلزق فى الايد بس متماسكة الى حدما لاننا هنشتغل بالمكنة
ولو بالقمع يبقى هتقللى الدقيق شوية وهنضيف الباقى من العصير لواحتجناه
ولو هتفرديه وتقطعيه اشكال يبقى هنزود الدقيق وتبقى بالشكل دا
تسيبي العجين يرتاح عشر دقايق في التلاجه من حراره العجن والجو النار دا و تدهني الصاج بالزيت
ونبدأ نشكله
لو لقيتى العجينة سايحة منك زودى لها معلقتين دقيق مش مشكلة لان نوع الدقيق بيفرق وفى دقيق اصلا بيطرد السمنة
ولو عاوزة تعمليه زى البيتى فور اوك مفيش مشكلة مش لازم الشكل التقليدى يعنى
لو عاوزة تعملى جزء منه بالشيكولاتة شيلى ربع كوباية دقيق
وحطى مكانهم كاكاو خام عارفة يعنى ايه خام يعنى بدون سكر مش اللى فى العلب دا علشان السكرميبقاش كتيرويفرش منك
و تكوني مسخنه الفرن بتاعك علي 200قبلها وبعدين هديه ل 170 عشان يطلع مظبوط لو معندكيش تدريج في الفرن يبقي درجه تسويه الكيك العادي و مبياخدش وقت خالص في الفرن ممكن 10 او 15دقيقة المهم ابقى تابعيه ولمايصفر كدا ويبقى لونه دهبى جميل طلعيه يبرد
اناباسوى فى فرن الغاز اوالبوتاجاز صراحة
تكات مطبخ ام عمرو خالد لنجاح البسكويت
اوقات بتعملى الوصفة صح والمقادير ومع ذلك مبتنجحش
وبالذات البسكويت دا السهل الممتنع فقبل ماتنفذى الوصفة رجاء شوفى الموضوع دا
دوسى على الصورة
يارب الوصفة تعجبكم و كل سنة وانتوا طيبين وياريت تساعدونا نوصل لاكبرعدد ممكن وشير للوصفة فى اى مكان وربنايجعله فى ميزان حسناتكم
الزيت مش موجود فى المقادير
ردحذفممكن اعمل ايه لو عندى كميه من البسكوت ناشف وايه اللى بيخلى البسكوت يفرش بدل ما بنفش
ردحذف